'ئەڎام مەتاوۆ زینڎانەنە مەنۊوە'
ڕەیحان ئۆرانە کناچۍ زینڎانیېوە نەوەشۍ حەنیفە ئەرسەلانی تەمەن ٧٦ ساڵۍ باسش چانەی کەرڎ، ۋەروو ئانەی ئەڎاش نەوەشیېوە قورسش هەن مەتاوۆ جە زینڎانەنە مەنۊوە.
حەنیفە ئەرسەلان-ە جە ١و کانوونوو دووەمیۆ، فاڕیاوە پۍ خەسەخانەو دورسون ئۆداباشی زانکۆو یوزینجویڵی وانی.
ئەرسەلان-ە ئشیۍ پۍ ماوېوە چېروو چامڎاری دکتۊرینە بیۍ، کەچی دماو وشکنای، ڕاستەوخۆ فاڕیاوە پۍ زینڎانی. حەنیفۍ جە سەرەتاو ساڵەو ٢٠١٧ ی گیرییا. دماو ٩ مانگا جە زینڎانیکەردەی ئازاڎەکریا. دماتەر دادگا بە تۆمەتەو 'ئەندامێتی ڕێکوستەی' ماوەو ٦ ساڵا و ٣ مانگا تەری سزاش سەرەرە سەپنا. دماو ئانەی زینڎانەنە بەرەشیە، هەمڎیسان گیریاوە و پۍ ماوەی زیاتەر جە ١٢ مانگان ئینا زینڎانەنە.
نەوەشیۍ فرێش هەنۍ
حەنیفە ئەرسەلان-ە چل ساڵېن نەوەشی قەنیش هەن، حەرپاسە زەخت و کێشەو لووایش هەن و ئێساڵ بە تەمامی جە لوای ڕانەی کۊتېنە. حەروەختۍ بەراش پۍ خەسەخانەی، بەبێ چارەسەرکەردەی گێڵناشۆ پۍ زینڎانی.
'داوا کەرمۍ بە زینڎەیی جە زینڎانەنە بۍ بەرۆ'
کناچەکېش ئاماژەش پانەی کەرڎ، حۊڵ و ئامانجما ئانەن ئەڎېما جە زینڎانەنە بەربارمۍ. باسش چانەی کەرڎ گەرەکما یانەنە چارەسەروو ئەڎېم کەروو واتش: "پی تەمەنۆ، زینڎان پۍ ئەڎېم فرە زەحمەتا، گەرەکمانە ئەڎاما بە زینڎەیی جە زینڎانەنە بێنە بەر، گەرەکمانە ئەڎېما چارەسەر کەرمۍ و ئاگاما چنەش بۆ. پی ئاژۆ فرە زەحمەتا جە زینڎانەنە مەنۊوە، چونکی ئەڎام ئاگا و هۆشش لاو ۋېشۆ نیا".
