کەمتەر جە مانگێوەش مەنەن پەی دەسپنەکەردەو ساڵێ تازێ کوردیێ، چا چوارچێوەنە ڕۆو چوارشەممەی ئایندەی جە هۆرامانەنە بۆنۆ ئامای نەورۆزو کوردا زەماوەنە گێڵنا و جە دەگاو چەشمیدەرو سەر بە سەوڵاوای سنوورو پاریزگاو سنەی  چێرو نامێ "ڕۆو تاوییایۆ وەروێ و بەستەڵەک و دەمدایۆ گوڵەکا و ئاما و نەورۆزو کوردا"  هەزاران کەسێ جە دەگاکا دەوروبەرو هۆرامانیۆ بەشداری مەراسیمەكەی مکەرا.

جە ڕووەکا سەرەتاو ئاماو گرڏ ساڵێوە کوردی و جە دماو چوارشەممەو دمای ساڵی، کە بە چوارشەممە سوور شناسیان جە ناوچە جیاجیاکا وەرکەوتوو کوردەسانی مەراسیمەكێ پەشوازی جە زەمەاوەنەو نەورۆزی ملۆڕاوە و گرنگیێ تایبەت پی بۆنەیە دریۆنە.

چا چوارچێوەنە دەگاو چەشمیدەری سەرمەشقو دەستپێکو مەراسیمەكا نەورۆزین، گرڏ ساڵێ بە هەزاران کەسێ جە دەگاکا دەوروبەرو هۆرامانیۆ بەشداری چالاكیەكەی بانە، بە هورگێرتەو مەشخەڵی و گیزیانە و ئێری، هورپڕای کوردی و واتەو گۆرانی کوردیێ و پۆشتەو جلوبەرگو کوردیی مەراسیمەكە ئەنجام مڏریۆنە.