ناوەندو پارېزنای و ئەوەکۊڵیای مافەکا ژەنۍ، بە پاڵپەشتی یاساییوە بۊنەو مافەکا ژەناوە جە دژوو یاساکا 'جیاکاری' هەرمەنەکاش مکەرۆ. هەرپاسە گرڎوو ئا پاشلێکاری و جەنگا تۆمار مکەرۆ، پېسە دۆسیێوە ڕادەسوو دادگاو تاوانەکا مېیاننەتەوەیشا مکەرۆ.
ناوەندو پارېزنای و ئەوەکۊڵیای مافەکا ژەنۍ شارو قامیشلۆینە دەورێوە کاریگەر جە مافەکا ژەنا و یەکسانی ڕەگەزی کۆمەڵایەتینە مگێڵنۆ. جە ڕەقە، کۆبانێ، شەهبا، حەلەب و حەسەکەنە پېسە ناوەندێوە چنی گلێرگەو هەرێمەکەینە ئینا پەیوەندینە، پاشێلکاریی و تاوانەکا دژ بە ژەنا چا هەرێمەنە دیاری مکەرۆ و هەوڵو پێڎاکەردەو چارەسەرکەردەی ئا گرفتا مڎۆ، چا ڕوانگەیچۆ جە ڕاو بەرنامەی پەرەوەردەیی، ڕێکوستەی سیمیناری و کۆنفرانسیوە هۆشیاری یاسایی بەخشۆوە بە ژەنا.
حەرپاسە جە برۆکسلەنە ناوەندێوەش هەن و دژوو پاشێلکارییەکا دژ بە ژەنا هەرمانەکاش ڕاوەبەرمکەرۆ.
جە باەرەو کار و چالاکیەکاشاوە پارێزنەرە ئاینور پاشا ئەندامەو ناوەندو پارېزنای و ئەوەکۊڵیای مافەکا ژەنۍ پەی ئاژانسیما قسێش کەردۍ و ئاماژەش پانەیە کەرد ئامانجشا شۆنیرەلواین دژ بە پاشێلکارییەکا دژ بە ژەنا.
پارێزنەرە ئاینور پاشا جە سەرەتاو قسەکاشەنە ئاماژەش پانەیە کەرد کە ئامانجش بەدیئاوردەی مافەکاو ژەنان و واتش: "جە بوارو مافەکا ژەنا و یەکسانی جنسینە کارەکاما ڕاوەبەرمکەرمۍ. پەی ئێستەیۆ چارەسەری یاسای پەی گرڎوو ئا سەختیا کە ڕووبەڕوو ژەنا باوە و هەرپاسە پەی ئامای ئارای هۆشمەنڎی کۆمەڵایەتی خەباتێوە ۋەرفراوان ڕاوەبەرمکەرمۍ. پۊکەی پېسە ناوەندەکەیما پەی پارێزنای و فەراهەمکەردەی مافەکاو ژەنا جە ئاستی هەرێمی و مېیاننەتەوەیینە کارەکاما ڕاوەبەرمکەرمۍ."
'سەرو ژیۋای ژەنە ڕزگاربیە ئێزدییەکا هەڵوێسە مکەرمۍ'
جە بەردەوامی قسەکاشەنە ئاینورە ئاماژەش پانەیە کەرد کە ناوەندەکەشا جە ساڵەو ٢٠١٩ینە ئەرەمەرزیان و واتش: "ناوەندەکە جە لایەنو جەمۍ جە ژەناوە ئەرەمەرزیان، سەرو پارێزگاریکەردەی جە ژیۋای ژەنە ئێزدییە ڕزگاربیەکا هەڵوێسە مکەرا. چەمپنەکۊتەیشا چنی ئەنجام مڎەیمۍ و ئانەی ئامان ملشارە گرڎ کریان بە بەڵگە. سەرو بنەماو ئا زانیاریا جە ژەنە ڕزگاربیەکاوە یاوێنۍ دەسما ، یاوێنمۍ بە ژەناو داعشی جە کامپو هۆلینە. بڕۍ چا ژەنا ئاماڎۍ نەبێنۍ جە بارەو داعشیوە قسۍ بکەرا. بەڵام جە کۊششەکاما بەردەوامۍ بیەیمۍ جە کامپو هۆلینە چنی ژەناو داعشی چەمپنەکۊتەیما ساز کەرد و گۊشما جە ڕازەی جیا جیاو هەریۆ چا ژەنا گێرت و پی جۆرە بناغەو ناوەندەکەی نریارە."
'ئامانجما پارێزنای مافەکاو ژەنان'
جە دمادمایی قسەکاشەنە ئاینور پاشا باسش چانەیە کەرد کە هەرمانەکێشا ئینۍ چوارچێوەو بەیاگۍ یاونای مافەکاو ژەنانە و واتش: "ئامانجی سەرەکیما پارێزنای مافەکاو ژەنان و جە دژوو یاساکاو جیاکاری هەرمانە مکەرا. چا چوارچێوەنە پاشێلکارییەکا دەوڵەتو ئەرەگیرو تورکی جە هەرێمەکەنە تۆمار مکەرمۍ و دژوو ئا پاشێلکاریا پەشگیری جە ژەنا مکەرمۍ."
