دەسوەڵیوزیی گەلی پەی ئازاڎیی جەسەیی ڕابەرو گەلو کوردی عەبدوڵا ئۆجالانی لە سەرنیشت و وەرکەوتو سوریاینە ٩و شوباتینە هەڵمەتێوی کۆکەرڎەیۆ ئیمزایش دەس پەنە کەرڎەن،٤و نیسانینە هاموەخت چەنی ڕۆو  پەیدابییەی ڕابەرو گەلو کوردی عەبدوڵا ئۆجالانی ئا هەڵمەتێ دماییش ئاما. هەرپاسە  ٨و نیسانیچنە کۆنفڕانسێوی ڕۆنامەوانیینە ئەنجامەکاو هەڵمەتەکێ ئاشکرێ کریێ.

چا چوارچوەنە فەرزەندە مونزورە قسەکەرەو دەسوەڵیوزیی سوریی پەی ئازاڎیی ڕابەرو گەلو کوردی عەبدوڵا ئۆجالانی و نوها عومەرە ئەندامەو دەسوەڵیوزییەکەی، بارەو هەڵمەتەو کۆکەرڎەیۆ ئیمزایانە پەی ئازاڎیی جەسەیی عەبدوڵا ئۆجالانی قسێشا پەی ئاژانسو هەواڵو فورات (ANF)ی کەرڎێ.

فەرزەندە مونزورە قسەکەرەو دەسوەڵیوزی سوریی  پەی ئازاڎیی جەسەیی ڕابەرو گەلو کوردی عەبدوڵا ئۆجالانی سەبارەت بە هەڵمەتەو کۆکەرڎەیۆ ئیمزێ واتش، "ئەنجامەکاو هەڵمەتەو کۆکەرڎەیۆ ئیمزایا پەی ڕێکوزیایەکا پێسە؛ پەرلەمانو یۆبییەی ئەورووپای، ئەنجوومەنو ئەوروپای، دادگاو مافەکاو ئینسانی و سی پی تی ڕوانە مکریانێ. هەرپاسە نەک حەر پەی ئا ڕێکوزیایا، بەڵکوم ئەنجامو هەڵمەتەکێ پەی سەرجەمو ڕێکوزیا پەیوەندیدارەکای تەریچ ڕوانە مکریانێ."

'هەڵمەتەکێ بە شێوێوی سەرکەوتانە بەرڎەوامە بییە'

فەرزەندە وستش ڕووە، کە هەڵمەتەو کۆکەرڎەیۆ ئیمزای پەی ئازاڎیی جەسەیی ڕابەرو گەلو کوردی عەبدوڵا ئۆجالانی بە شێوێوی فرە وەرفراوان درێژەش پەنە دریا و واتش، "هەڵمەتەکێ کە ٩و شوباتینە دەسش پەنە کریا و  ٤و نیسانینە هاموەخت چەنی ڕۆو پەیدابییەی ڕابەر ئاپۆی دماییش ئاما، مانێوە گەورەێش بێ. ٩و شوباتی بە ماناو ڕاگێریکەرڎەین جە پیلانگێڵنا. گەلو کوردی بە گردو ئیرادەو وێشۆ پێوەس بی پۆشۆ. بە گردو گەلو سەرنیشت و وەرکەوتو سوریایۆ، کە ئیمزێشا کوێ کەرڎێنێوە ماچوو، ئێمە سەرێمگنمێ."

' ٣ملوێنێ و ٦٦٩ هەزارێ و ٩٠ ئیمزێ کوێ کریێنێوە'

فەرزەندە مونزور ئاماژەش بە وەرفراوانبییەی و بەشداربییەی فرەی هەڵمەتەکێنە کەرد و واتش، "ئەنجامو هەڵمەتەو کۆکەرڎەیۆ ئیمزایانە پەی ئازاڎیی جەسەیی ڕابەر عەبدوڵا ئۆجالانی، بە گردین ٣ ملوێنێ و ٦٦٩ هەزارێ و ٩٠ ئیمزێ چوار وەڵاتە جیاجیایاوە کوێ کریێنیوە. ئاخرو هەڵمەتەکێنە سەرکەوتەێوی فرە گەورە دەس وزیا. ئێمە داوا وەنەو پەرلەمانو ئەورووپای وگردو ڕێکوزیا و ئەرەمەرزیایەکای تەری مکەرمێ، کە وەختشانە هەرمانەو وێشا بکەرا. ڕابەر عەبدوڵا ئۆجالان ماوەو ٢٦ ساڵان بە بارمتە گیریان. نموونەو ئا  پاشێلکارییە یاساییە حیچ وەڵاتێونە نییا و حیچ یاساێوە قبووڵش نمەکەرۆ".

ئیمزاێوی فرێ کوێ کریێوە

نوها عومەرە ئەندامەو دەسوەڵێوزیی سوریی پەی ئازاڎیی ڕابەرو گەلو کوردی عەبدوڵا ئۆجالانی باسش کەرد، کە هەڵمەتەکێ بە ئامانجو کۆکەرڎەیۆ ٣ ملوێن ئیمزایا دەسش پەنە کریابێ و واتش، " چی هەڵمەتێنە جە ژمارەو ئامانجەکەیما زیاترما کوێ کەرڎێوە. هەم پێکئامایەکاو سەرنیشت و  وەرکەوتو سوریای بەشدارییشا هەڵمەتەکێنە کەرد، هەم بڕێو شارێ تەرێچ پێسەو: حەڵەب، حومس و دیمەشقی بە ڕێژێوی وەرەچەم بەشدارێ بیێ. هاموەخت کۆچبەرێچ لوبناننە بەشدارییشا کەرد".

نوها وستیچش ڕووە، کە ئا ئیمزێ کوێ کریێنیوە پەی پەرلەمانو یۆبییەی ئەوروپای مکیانیا و واتش: "ئامادەکاریی مکەرانێ تا ڕاو ڕێگەی لوجنێوە بیاوناشا پەرلەمانو ئەورووپای. هەرپاسە ئامانج چا هەڵمەتێنە مسۆگەرکەرڎەی ئازاڎیی جەسەیی ڕابەر عەبدوڵا ئۆجالانین. تا ڕێکوزیا میاننەتەوەییەکاو مافو ئینسانی هەرمانەو وێشا بیاونا یاگێ، ئێمە هەوڵێ زیاتەرێ مڎەیمێ ".