یانەو ژەناو هەورامانی و ڕێکوزیاو واران-ی بە بۆنەو کۆچی دمایی شاعیر و نویسەر جەلال مەلەکشا-ی پەیامی سەرەوەشیشان دان و ئاشکراشان کەردەن: مەلەکشا قولەنە بێ و کەسایەتیێوی مودێڕن و ئەوەکریا بە وینگایێوی ئازاد و سەربەوێ بێ.
یانەو ژەناو هەورامانی و ڕێکوزیاو واران-ی بە بۆنەو کۆچی دمایی شاعیر و نویسەر جەلال مەلەکشا-ی پەیامی سەرەوەشیش دان و کۆچکەردەش بە کەسایەتیێوی مودێڕن و ئەوەکریا بە وینگایێوی ئازاد و سەربەوێ بەنامێ کەردەن و غەمباری وێشان بە کۆچەکەیش بەروستەن.
تەمامی پەیامەکەو یانەو ژەناو هەورامانی و ڕێکوزیاو واران-ی:
بەداخەی گرانەوە وێرەگاو هیزی جە شارو سنەی، نویسەر و شاعیر و ڕۆچنامەنویسی دیار ونامی کوردستانی مامۆستا جەلال مەلەکشا، دماو دەیان ساڵێ خزمەتی ڕاسین بە فەرهەنگ و ئەدەب و ڕۆشنویری کوردی، تۆشەو سەفەری هەتاهەتاییش پێتەوە و ڕۆحو نەمریش جە ئاویەری باڵابەرزی نەخشینیەنە پڕا پەی ئاسمانەکان. مامۆستا جەلال مەلەکشا پێسەو کەسایەتیێوە ئازا، ئەندێشمەند، مودێڕن و ئەوەکریا بە وینگایێوی ئازاد و سەربەوێ جە قاڵبو نویسیای و شیعرەکایچشەنە، دیێ پەی پەرسەکاو کۆمەڵگای کوردی و حەز و ئارەزووش وەڵکەوتەی خەڵکو وڵاتەکەیش بێ جە سەرجەم بوارەکاو ژیوای و جیانەمەنەی جە ڕەوتو وەڵێکەوتەی کۆمەڵگای جەهانی. پەوکەی بەنیسبەت پەرسەو ژەنەو کۆمەڵگایچش هیچ کەی کەمتەرخەم نەبێ و پەرسەو ژەنی لاشەو، بەشێو جە پەرسەو کۆمەڵگایش بێ و حەز و ئاواتش، وەڵکەوتەی و ژیوایێوی سەردەمیانە و مافمەند بێ پەی ژەنان.
بە ڕاسی کۆچی دمایی مامۆستا جەلال مەلەکشای خەسارێوەن پەی سەرجەم کۆمەڵگای کوردی و بەتایبەت کاروانو فەرهەنگ و ئەدەب و ڕۆشنویری.
ڕێکوزیاو واران-ی و ڕێکوزیاو یانەو ژەناو هەورامانی، پڕ بەدڵ خەمبارێنێ بەئی کۆچەیە و سەرەوەشی جە بنەماڵەی ماتەمبارو مامۆستا جەلالی و سەرجەم چینی فەرهەنگی، ئەدەبی و ڕۆشنویری کوردی مەکەرانێ. هومێدوارێنمێ ڕۆحو مامۆستای ئاسوودەگیەنە بۆنە و ڕا و ڕێوازش پەڕەو ڕاویەراو پێسە وێش بۆ.
