حەقی ئارمانج فەرمانڎەو قەرارگە و ناوەنڎی هەپەگەی دەس نیشانش کەرڎ کە پیلانگېڵی سەروو ڕابەروو گەلوو کورڎی عەبدوڵا ئۊجەلانی بەگۊشەگیری بەردەواما و ۋاتش،" سەرەڕاو گرڎوو هجومەکا ڕابەر ئاپۊ جە حیچ پرەنسیپېوە ۋېش پەشیمان نەبیەنۊ ۋەران ۋەر بە دوژمنی".
حەقی ئارمانج فەرمانڎەو قەرارگە و ناوەنڎی هەپەگەی سەروو ئاژەو سیاسەتی و سەروازی جە کورڎسانەنە قسېش پۍ ڕادوېن و دەنگوو گەلی کەرڎۍ.
حەقی ئارمانج سەرەتا سڵامش جە ڕابەر ئاپۊی و گرڎوو زینڎانیا کەرڎوو ۋاتش،"پیلانگېڵی میان نەتەوەیی سەروو ڕابەر ئاپۊی ٢٥ ساڵېن بەردەواما. ئامانجشا جە پیلانگېڵی چېش بۍ، گەرەکشانە بەپیلانگېڵی چېش کەرا؟ بېگوومان ئامانجۍ گۊرۍ بېنۍ پەشتەو ئی پیلانگېڵیەیۊ. جە سەرەتاو کۊشیایۊ تا ئیسە ڕابەر ئاپۊ هەمیشە لایەنە تاریکەکۍ سیستمی مۊدېرنیتەی کاپیتالیستی، ڕاسیەکا، مەترسیەکا سەروو گلېرگەی و گەلا ئازاڎییوازیش بەروستېنۍ. نەک تەنیا بەرش وستېنۍ بەڵکم جە ۋەران ۋەریچشانە کۊشیایش کەرڎەن، بی بە هیوا پۍ گەلا ئازاڎیی وازی، چەوەسیای. ۋەرو ئینەیچە کورڎە خائین و نۊکەرەکېچ بەشڎارۍ دلۍ ئی پیلانگېڵیە بېنۍ. ئامانج جە پیلانگېڵی میان نەتەوەیی دلېنەبەرڎەو ڕابەر ئاپۊیا، دلېنەبەرڎەی جە لایەنی جەستەی و قوڵکەرڎەی جەنگی مەنتیقەیی جە بەینوو گەلوو کورڎی و تورکینە بۍ. ڕابەر ئاپۊ جە سەرەتاو پیلانگېڵیەکەینە ئینەش ۋینا و چینەی یاوانە.
ۋەروو ئی مەڵامەتیچە جە ٩ و تشرینو یۋەم و ١٩٩٨ینە جە سوریا لۋا بەرۊ. ۋەرو ئانەی مەترسی بۍ. ئاماڎەکاری کریابۍ. نەک بەتەنیا دۊڵەتوو ترکی، هېزە هەرېمی و میان نەتەوەییەکېچ ۋەروو هجومەکا سەروو سوریای گەرەکشابۍ دەس بەجەنگۍ کەرا. ڕەنگە چا یاگېنە ملۋېنان ئینسانۍ کوشیېنۍ. ڕابەر ئاپۊ ئینەش قبوڵ نەکەرڎ و ۋېش فیداکەرڎ. پۍ ئانەی گەل زەرەرمەنڎ نەبۊ، پۍ ئانەی هەڕەشۍ جە گەلی نە کریا، پېسە گرڎ جارۍ بەشېۋېوە حەکیمانە مامەڵەش کەرڎ. جە سەرەتاو کۊشیاینە تا ئیسە ئینەش پۍ ۋېش بە ئەساس گېرتەن. مشۊم کە کوشتەی نەبۊ، قۊرتەکۍ کورڎی و کورڎسانی مشۊم بە ڕېبازی دیموکراتیک و ئاشتیانە چارەسەر کریا. ئینە هەمیشە داواکاری سەرەتایی ڕابەر ئاپۊی بیەن. ڕابەرایەتی لۋا پۍ ئۊرووپای و ڕوسیای، جە ئاکامەنە کینیانە جە ١٥و شوباتی پیلانگېڵی سەرش ئەنجام دریا. ڕابەرایەتی بە ۋنۍ سەردۊ نزیکوو ئا پیلانگېڵیە بی.
چنی گرڎوو هەرمانە بۍ ئەخلاقیەکا تیمی تایبەت و دۊڵەتوو ترکی ڕابەر ئاپۊ بە ۋن سەردیۊ نزیک و ئی مژاریە بۍ و سەرنجش وست سەروو ئامانج و پیلانگېڵیەکەی. پی جۊرە پیلانگېڵیەکەش جە پڕاکتیکەنە پوچ کەرڎۊ، ڕاش ۋنەگېرت. جە پڕۊسەو پیلانگېڵینە، پېسە مزانیۊ، گەلی ۋڵاتپارېزماو کادیرۍ تەڤگەرەکەیما، هامسۊزۍ و دۊساما بە دروشمەو"شمە مەتاودۍ ڕۊما تاریک کەردۍ"دەسشا بە چالاکی کەرڎ. ۋېشا سۊچنا، چالاکی فیدایشا ئەنجامدا و دەوروو ڕابەر ئاپۊیرە کوۍ بیۍ. تا ئیسە ملۋېنان ئینسانۍ پۍ ماڕای ئی پیلانگېڵیە و دلېنەبەرڎەی کۊشیایۍ گۊرەشا ئەنجام دا.
"ڕابەر ئاپۊ جە هەڵۋېسەکا ۋېش پەشیمان نەبیۊ، ۋەروو ئینەیچ سزاو گۊشەگیریش سەرەرە سەپیۊ"
ئارمانج دەسنیشانش کەرڎ کە گۊسەگیریەکۍ سەروو ڕابەر ئاپۊی چی ساڵا دماینە فاڕیان پۍ ئەشکەنجەی و ۋاتش،"ئینە ئانەما نیشانە مڎۊ کە هېزە دەسەڵاڎدارەکۍ چن جە ڕابەر ئاپۊی تەرسا. قسەکۍ ڕابەر ئاپۊی ۋەران ۋەروو ۋېسەنە پېسە مەترسیۍ ۋینا. ئا هېزۍ ئاگاڎارۍ ئانەینۍ کە سیاسەتەکېشا سەروو گەلا ۋەرکەوتوو میامینی و کورڎسانی دمایشا پنە ئامان. ۋەروو ئانەی سورېنۍ سەروو سیاسەتوو گۊشەگیر کەرڎەی. ئی گۊشەگیریەی کە فاڕیان پۍ ئەشکەنجەی نەک تەنیا سیاسەتوو جەنگی تایبەتی دۊڵەتوو ترکی فاشیستین بەڵکم پارچېوەن چا پیلان گېڵیەکە هېزە میان نەتەوەییەکۍ، هېزە هەرېمیەکۍ ونۊکەرە کورڎەکېچ ئینۍ دلېشەنە. ئېمە مزانمۍ کە دوژمنەکەما ئی هەرمانۍ کەرۊ، ۋەروو ئانەی ڕابەر ئاپۊ جە هەڵۋېسوو ۋېش پاشەکشە مەکەرۊ. دلۍ ئی ٢٥ ساڵەو دماینە جە ۋەران ۋەروو پیلان گېڵانە دلۍ هەلوومەرجۍ فرە قورسینە کۊسش کەرۊ. ڕابەر ئاپۊ چنی گرڎوو هجومەکا دەسبەرڎارو هەڵۋېسی بە کەرامەتوو ۋېس نەبی و هەنگامېش پۍ دمای نەنیا.
بېگوومان چی دماییانە گەلەکەما جە گرڎ پارچەکا کورڎسانینە، جە ئۊرووپا و جە گرڎوو جەهانینە بەردەوام ئینۍ چالاکینە.نەک تەنیا گەلوو کورڎی بەڵکم دۊسۍ گەلەکەیچما ئینۍ سەروو پەیاوە و بەردەوام ئینۍ چالاکینەو مدرامان کەرا. چی دماییەنە زیاڎ جە جارانی دۊسۍ گەلەکەیما، بینیەکۍ فەلسەفەو فکروو ڕابەر ئاپۊی قبوڵ کەرا. سەروو ئی بناغەیە کۊشیا و جە دژوو ئی پیلانگېڵیە پۍ ئازاڎیی جەستەیی ڕابەر ئاپۊی جە فرېوە جە ۋڵاتانە کۊشیایۍ بە کۊمەڵ ئەنجام مڎا، چنی گەلوو کورڎی کۊشیای مکەرا. ئەگەر بیانیەکۍ و دۊرووبەر ئانڎە جە ڕابەر ئاپۊی میاوانە وپېسە هیوېوە پۍ ئازاڎیی تەماشەش کەرا، ئە وەختە گەلوو کورڎی زیاڎ جە جارانی مشۊم چنەش بیاۋۊنەو خۊتانکەرڎەیش ۋنەکەرۊ".
"گەریلا هیواو گلېرگەو ئېمەن"
حەقی ئارمانججە بەردەوامی قسەکاشەنە سەرنجش وست سەروو مدرامانوو گەریلای و ئەرەیاۋناش، کە جە چن ساڵی ۋیەرڎەنە دوژمن جە فرەو مەنتیقەکا سەرنیشتینە سەرەمڕە هجوم کەرۊ. حەقی ماچۊ،"دووژمن جە گرڎ وەختەکا ساڵینە ئۊپەراسیۊن ئەنجام مڎۊ. دۊڵەتوو ترکی ئەرەگیری جە گەریلاکا سەرنیشتی فرە تەرسۊ. تەنیا گەریلېوەیچ جە سەرنیشت مەنۊ تەرسی گنۊدلۍ دڵ و دوژمنی. ۋەروو ئانەی گەریلاکۍ کورڎسانی هیواو ئازاڎیینۍ. هیواو گەلی و گلېرگەگەیمانۍ. ساڵانېوەن تەرسیشا وستېنە دلۍ دڵ و دوژمنی ۋەروو ئی مەڵامەتینە چالاکیەکۍ سەرەمڕە ۋەردەوامېنۍ. گەریلا بە چالاکیەکاش هېزوو تەکنیکی دوژمنی دلېنەبەرا".
ئارمانج جە کەسایەتی ئاخین موشی و ٣ گەریلایا تەرینە کە چنیش گەشمەرڎۍ بیۍ، گرڎوو گەشمەرڎا ئاخېزیش ۋیرئاردۍ و ئانەش ئارڎ سەروو زۋانی کە یۊ جە شەهادەتە هەرە گرانەکا ئاخروو ساڵۍ گەشمەرڎەبیەو ئاخین موشی بۍ، کە فەرمانداروو فیداییەکا بۍ.
"مدرامان هەنگام بە هەنگام بەهاکا خوڵقنۊ"
حەقی ئارمانج سڵامش جە مدرامانەکا کەش و جودی، گەشمەرڎە دۊغان، کەش و گەشمەرڎە مەزڵومی و کەش و ئامېدی کەرڎوو ۋاتش،"چی ساڵا دماینە گەریلا بە مدرامانوو ۋېش جە هەرېمەکا پارېزنای مەدیای هەنگام بەهەنگام بەهاشا خوڵقنا. مدرامان دژوو دوژمنی هەڵای بەردەواما. ئەنجام و مدرامانەکا گرڎ ڕووۍ پۍ ڕای گرڎینەی و گەلەکەیش بەیان کەرۊ. کۊشیایۍ گۊرە هەن. دوزمن هجوومە ئەرەگیریەکېشپۍ سەروو مەنتیقەکا گەریلای جە ساڵەو ٢٠٢١ی جە گارەنە دەسپنەکەرڎ. جە ساڵەو ٢٠٢٢ېنە گەرەکش بۍ کە گرڎوو کورڎسانی ئەرەگیر کەرۊ. بەڵام بەڕاسی مدرامانۍ گۊرەو گەریلای هەن. ئا هەڤاڵۍ کە ئینۍ ڕیزەکا وەلېوە جەنگینە ماچا کە سوپاو ترکی جە ڕوو مۊڕاڵی و دەروونیۊ دلېنەشیەن.ئا دوژمنەی کە مەتاۋۊ مدرامانوو گەریلای ماڕۊ سەرە جە ڕېبازی بۍ ئەخلاقانەی مڎۊ. بەبەکارئارڎەی چەکی کیمیاۋی گەرەکشا ئەنجام بەدەس بارۊ. سەرەڕاو ئینەیچ ڕووانە بە دەیان سەروازۍ دوژمنی جە لایەنوو گەریلایۊ سزا دریا. دۊڵەتوو ترکی بە سوپاکېش، بە دەرفەتەکاش، بە چەتۍ و جاشەکاشۊ هجوم کەرۊ، بەڵام مەتاۋۊ جە ۋەران ۋەروو گەریلاینە حیچ ئەنجامېوە دەس وزۊ.
دوژمن چی پڕۊسەنە پەشتیوانی جە پەدەکەی هۊرگېرۊ و گەرەکشا تلنۊشا پی جەنگیۊ. حەرۋېش ماوېوە فرەن پەدەکە چی جەنگەنە بەشڎارا. پەدەکە چی ئاخراوە حۊڵ مڎۊ بە ئاشکرا بلۊ دلۍ ئی جەنگەیۊ. چی لاوە خەریک و ئاماڎەکارین. گەرەکشا جارېوەتەر جەنگېوەتەر وزۊ دلۍ یانەو کورڎی. دۊڵەتوو ترکی پاگیرا سەروو ئی مژاریە. بەشۍ جە هېزەکا پەدەکەیچ ئی سیاسەتەو دۊڵەتوو ترکی پەیڕەو کەرا. چی بارۊ تەڤگەرەکەما چنین ئاگاڎیش دېنۍ . ڕای گرڎینەو کورڎی ئاگاڎارۍ ئانەینۍ. بەڵام مەترسی ئانەی هەن جە چن ڕووۍ تەرەنە ئینە فاڕیۊ پۍ جەنگی. گرڎ کەس ۋینۊ کە پەدەکە هامکاری دۊڵەتوو ترکی کەرۊ. جە مېڎانوو جەنگینە ئی ئاژە زیاتەر ۋینیۊ. بەپاو ئینەیچ هەڤاڵەکېما ئینۍ حاڵەتی ئاماڎەیینە.
ئېمە گەرەکما نیا دلۍ کوردانە جەنگ ڕووە دۊ. فەرمانڎەیی ئېمە، ڕاوەبەروو تەڤگەرەکەیما سەبارەڎ پی مژاریە چنڎین جارۍ بانگەوازشا کەرڎەن. جە ڕاسینە ئېمەفیداکاری و سەبرېوە گۊرەما نیشانە دا. ئېمە ئاگاڎرۍ سەختیەکا ۋەروو دەموو هەڤاڵاما هەنمۍ. حەرپۊکەی ڕاوەبەرۍ و فەرمانڎەیی ئېمە بە وریایۊ مامەڵەشا کەرڎ. بېگوومان تا دمایی درېژە پی هەڵوېستەیما مڎەیمۍ. ئېمە ڕانوماییەکا ڕابەریما ، ڕاوەبەرا تەڤگەرەکەیما پۍ ۋېما بەئەساس گېرمۍ . ئەگەر ئاژېوە جیاواز ڕووە بڎۊ ئېمە پۍ ئانەی ئاماڎېنمۍ. واتا ئېمە ڕاوجاو ۋېما گېرتەن ۋەر. ئاژەو مەنتیقەکا پارېزنای مەدیای پی جۊرەنەهەم جەنگوو دلۍ مەڕەکاو هەم مدرامانو دلۍ مەڕەکا جەنگی مدرامان کەرا و ئاماڎەکاریەکا کەرا، تیمە نیمچە جوڵیاکا ڕای پەنەوازشا گېرتەن ۋەر. وەختۍ کە چالاکی کەرڎۍ ۋېتا پارېزندۍ. بە تەجرووبەو ساڵانۍ متاومۍ واچمۍگرڎوو هەڤاڵاما ئینۍ سەروو ئەرکوو ۋېشاوە".
