ئارنهایم و دویسبۆرگەنە نەورۆز پیرۆزکریا
کوردسانیا و دۆسەکێشا سڵامشا ۋنەو نەورۆزوو ئامەدی و مزانی هەپەگەی کەرد، داواو ئازاڎیی جەسڎەیی ڕابەروو گەلوو کوردی عەبدوڵا ئۆجالانیشا کەرد.
نەورۆزوو جەژنەو ژیۋایۆ گەلوو کوردی جە شاروو دویسبۆرگوو ئەڵمانیای و شاروو ئارنهایم و هۆڵەنداینە بەجۆشێوە ئێژاوە پیرۆزکریا.
دویسبۆرگ
نەورۆز سەروو بانگەوازو ناوەندوو گلێرگەو کوردی دیموکراتیکی دویسبۆرگ (دەکتەم)ی و مەجلیسوو ژەنا گەشمەرڎەی ئاسیا یوکسەلۍ ڕێکوزیا، مەراسیموو نەورۆزی کریاوە، سەڎان کوردسانیۍ و دۆسەکێشا جە دویسبۆرگ و دەوروبەرینە بەشدارۍ بیۍ.
جە مەراسیمەکەنە گەشمەرڎۍ ئازاڎیی کوردسانی و گەشمەرڎۍ نەورۆزی یاڎۍ کریێوە، بەشدارا سڵامشا ۋنەو نەورۆزوو ئامەدی و مزانی هەپەگەی کەرد، داواو ئازاڎیی جەسڎەیی ڕابەروو گەلوو کوردی عەبدوڵا ئۆجالانیشا کەرد. حەرپاسە سڵام جە مدرامانوو گەریلاکاو ئازاڎیی کوردسانی کریا.
درووشمەکۍ "بژیۋۆ سەرۆک ئاپۆ" و "بژیۋۆ مدرامانوو گەریلا"ی و "بژیۋۆ مدرامانوو زینڎانیا" و "بژیۋۆ نەورۆز"ی بەرزۍ کریێوە.
تا دێرۍ جە دەوروو ئێروو نەورۆزینە هۊرپڕای کریا.
بانگەوازکریا پۍ بەشداربیەی جە مەراسیموو نەورۆزوو فرانکفۆرتینە جە ٢٣ ۍ ئادارینە.
ئارنهایم
کوردسانیا جە شاروو ئارنهایموو هۆڵەنداینە کوۍ بیێوە و نەورۆزشا پیرۆز کەرد. سەڎان کەسۍ وێنۍ ڕابەروو گەلوو کوردی عەبدوڵا ئۆجالانی و ئاڵاو پەکەکەیشا بەرزۍ کەردۍ، ئێروو نەورۆزیشا کەردۆ. جە مەراسیمەکەنە داواو ئازاڎیی ڕابەروو گەلوو کوردی عەبدوڵا ئۆجالانیشا کەرد، جەماوەر دەموو مۆسیقایۆ هۊرپڕۍ.
