٧٧ ەمین ساڵیاڎوو جە قەنارەدای قازی محەمەڎی و هامڕایاشەنە کۆنسەو ڕاوەبەری کەنەکەی ئەرەیاۋنێوەش وەڵا کەردۆ و یاڎوو گەشمەرڎا کۆماروو کوردسانیش بەرزڕاگێرت.

جە ئەرەیاۋناکەو کەنەکەینە ئامان: "٣١و ئاداروو ١٩٤٧ی دماو وڕای کۆماروو کوردسانی ئەرەمەرزنەر و سەرۆککۆمار پێشەوا قازی محەمەڎ، وەزیروو وەرگیری و یاگەگیروو سەرۆککۆماری سەیفی قازی و نوێنەروو مەهابادی جە پەرلەمانوو ئێرانینە و نوێنەروو قازی محەمەڎیی تارانەنە سەدری قازی، جە قەنارە دریۍ. قازی محەمەڎ و هامڕایاش بە دڵسۆزیێوە ئێژاوە پەی ئازاڎیی و سەربەخۆیی کوردسانی کۊشیۍ. بە ئەرەمەرزناو کۆماروو کوردسانی بە ئاراسەو رزگاری گەلوو کوردی هەنگامێوە گرنگەشا هۊرگێرتە".

جە درێژەو ئەرەیاۋناکەینە ئامان، "چا سەردەمەنە بڕیاردای و ئەرەیاۋنای دەوڵەتی سەربەخۆی، بە نامۍ کۆماروو کوردسانیۆ قەرارێوە سیاسی و کۆمەڵایەتی ئازایانەبۍ، دلۍ ئا هەلومەرجە دژوارەو دماییئامای جەنگی دووەمی جەهانینە بۍ.  حەرپۊکەی ئا گیانبەخشا سەرمەشقۍ کۆماری پۍ ئێمە بیۍ نمونە و پێشەوا قازی محەمەڎیچ پێسە ڕەمزێوە گەورەی دلۍ پەڕەکا تاریخینە یاگۍ ۋێش گرتە و پا جۆرە نویسیاوە".

جە بەشێوەتەروو ئەرەیاۋناکەو کەنەکەینە ئامان، "ئارۆ جە ۋەراۋەروو دەسەڵاڎداری دەوڵەتوو ئێرانینە، گەنجا کوردی، ژەنا کوردی، بە دروشمەو 'ژەنی، ژیۋای، ئازاڎیی' بە رێکوستەی و ئەرەمەرزیای سیاسی، کۆمەڵایەتی و پارێزنای رەوای کۊشییایۍ ئەفسانەیی ڕاوەبەرکەرا. سەرەڕاو ئانەی دەوڵەتوو ئێرانی ڕووانە سزاو قەنارەدای سەروو گەنجاو کوردیرە سەپنۆ، کۊششکارا، سیاسەتمەدارا و چالاکا کوردی جە زینڎانەنە بە بارمتە گێرۆ و کۆمکوشی ئەنجام مڎۆ، گەلوو کوردی بە خاوەنداری جە دۆزوو قازی محەمەڎی و هامڕایاش درێژە بە کۊشیایشا مڎا".

جە دمادمایی ئەرەیاۋناکەینە ئامان، "ئێمە پێسە کەنەکەی جە یاڎوو ٧٧ ساڵەو گەشمەرڎەبیەو پێشەوا قازی محەمەڎیی، سەیفی قازی و سەدری قازینە گرڎوو گەشمەرڎا کوردسانی یاڎ مارمێوە و بەرێز و پنەزانایۆ ۋەروو دەم و یاڎوو ئاڎیشانە سەرەو ۋێما منامنمێرە"، حەرپاسە کەنەکە گرڎوو ئەرەگیرا کوردسانیچش بە تنی شەرمەزار کەردەن.