جە هەورامان چ جە ویەردەنە و چ جە ئیسەنە، ئەگەر هەمیشە ژەنی پێشەنگە و سەرقافڵێ گلێرگەی نەبیێبۆنە، بێگومان جە سەرجەم بوارەکانە و سەرەڕاو یانەداری و زارۆڵەوێکەردەی، سەختکۆشانە هامشانە و هامکارە پیای بیێنە.
دمابەدمای ئانەی کە ئێساڵ بە هۆکارێ چوون، کەموارانی، وشکەساڵی، بەرزەوبییەی پلەکێ گەرمایی، فاڕیای ئاۋێ و هەۊای، ئایر جە دارستانەکانو هەورامانی ۋەربی و ژیوگە زیانش پنەیاوا، ژەنێ و پیێ هەورامانی وێبەخشانە بەشدارێ ئەوەکوشنایشان بیێ. یوە جە ئا ژەنانە کە ئەڎایێ هێقمە چەشنەو داربەلووەکانو هەورامانیەنە، ئەڎا (وەنەوشە)نە.
ئەڎا وەنەوشە دەسی هاڵی، بەڵام بە ئیرادەی پتە و ئازایانە و نەتەرسانە، شان بەشانو پیایا و ژیوگەپارێزانو پاوەشاری و هەورامانی بەشدارەو ئەوەکوشنای ئایرو دارستانەکان و ئەوەژیونای داستانەکان بیێنێ. هامکات ئەڎا وەنەوشە بیێنە بە ئلگو و نمونە و هاندەرە پەی خەڵکی و تەنانەت ژیوگەپارێزە وێبەخشەکان و ئاڎێ پەی پارێزنای ژیوگەی و ئەوەکوشنای ئێرو دارستەکان، ئیلهامش چنە هۆرمەگێرانێ.
هەر ئانەیچ پاسەشە کەردەن، تا ژیوگەپارێز و هاموڵاتیێ وێبەخشێ و ژیوگەدوسێ، نامێش بنیانە ”ئەڎایێ جە ڕەگەزو داربلووەکان“.