ئەنجوومەنوو ئەڎایا ئاشتی بۆنەو ڕۊو ئەڎایاوە ۋەروودەم و بارەگاو ۋێشانە جە ئامەد ئەرەیاۋنێوەشا دا. جە چالاکیەکەنە پارتوو هەرێمە دیموکراتیکەکا (دەبەپە)، پارتوو یەکسانی و دیموکراتیکی گەلا (دەم پارتی) و بنەیانەو زینڎانیا کە ئینۍ ئێشکگیری دادپەرەوریینە بەشدارۍ ۋەنایۆ بەیاننامەکەی بێنۍ.

ئەڎاو ئاشتی کوردەت ئەریلمازە جە بەیاننامەکەنە ئاماژەش پانەی کەرد کە جە ڕۆڵەکاشا دوورێنۍ، پۊکاتی ڕۊو ئەڎایا پەی ئاڎیشا پېسە "ڕوۍ سیاوی" ۋییەرۊنە و واتش: "وەختۍ چنی ڕۆڵەکاشا شاڎۍ بیێوە ئا وەختە بۆ بە ڕۊو ئەڎایا پەی ئێمە. فرۆکۍ ئینۍ سەروو سەرەیماوە و ئێمە نارەحەت مکەرا. هەتا مۍ گۆشەگیری سەختتەر مکریۆ. گەرەکمانە ئی قۊرتۍ دمایشا بۍ. قۊرتەکۍ ئەڎایا کوردیچ هەمان قۊرتەو ئەڎایا تورکین. داواو من جە گرڎ لێوە ئانەن؛ جەنگ قۆناغێوە خراپا. با ئاشتی بۍ ئاراوە، جە زینڎانەکاوە جەنازۍ گێڵاوە، با ئیتر ئەڎایا هەڵسی نەمجا و ئاشتی بەرقەراربۆ چی وڵاتەنە."

دماو ۋەنایۆی بەیاننامەکەی، ئەنداماو ئەنجوومەنوو گەنجاو دەم پارتی گوڵێشا پێشکەش بە ئەڎایا کەردۍ.

ئیزمیر 

 ئەنداماو ئەنجوومەنوو ئەڎایا ئاشتی جە ئیزمیر بۆنەو ڕۊو ئەڎایاوە جە مېڎانوو کۆناکینە گلێرۍ بیۍ و تا ئیسکەلیە ڕاپیمایشا کەرد. جە ڕاپیماکەینە لافیتەو " دیاری هەرە بەقیمەت پەی ئەڎایا بیەی ئاشتییا" بەرزکریاوە. حەرپاسە دروشمەکاو "بژیۋۆ مدرامانوو ئەڎایا" و "بژیۋۆ مدرامانوو زینڎانیا" وچیێوە.

دماو مردای ڕاپیماکەی ئەڎاو ئاشتی حەنیفە زەنگینە قسێش کەردۍ و واتش ئارۆ ڕووێوە غەمگینا پەی ئاڎیشا، باسش چانەی کەرد کە ڕۆڵەکێشا جە زینڎانەکانە کوشیانە و پی جۊرە بەردەوام بی: "ڕۆڵەکێما جە زینڎانەکانە توشوو چنڎین نەوەشیا با و مرا. پېسە گرڎوو ئەڎایا ئێمەیچ گەرەکمانە چنی ڕۆڵەکاما بیمۍ. پېسە ئەڎایا دڵ بە زامی، وڵاتێوە ئاشتی و دادپەروەرییما گەرەکا پەی زاوڵەکاما."