ئەڎایاو شەممەی وەنەو کۊکوشیی باسایشا پەرساوە
ئەڎایاو شەممەی حەفتەو ٩٨٠ هەمینینە،جە چارەنویسوو کۊکوشیی باسایشا پەرساوە، کە وەڵۍ ٢٨ ساڵانە ڕووەش دا و دلێشەنە١١ کەسۍ دلۍ مینی پاسێوەنە گولەوارانۍ کریۍ و سۊچیێ.
ئەدێ/ ئینساناو شەممەی پەی زانای چارەنویسوو کەسە گومبییە و کوشیایەکاشا و دادگاییکەردەی تاوانبارا، پەی ٩٨٠هەمین جاری مەیدانوو گاڵەتەسەراینە کوۍ بیێوە.
ئەرەیاونیاو واڵۍ حەسەن ئۊجاکی، کە ٢١ ئاداروو ١٩٩٥ بە ئەشکەنجە کوشیا و جەنازەکەش قەبرسانوو بێکەسانە وێزیاوە، لاو ماسیدە ئۊجاکیوە ونیاوە، ئاماژەش پانەیە کەرد ٩٨٠ حەفتێن هاوارۍ کەرا و هەڵای تاوانبارۍ سزا نەدریێنێ.
ئۊجاک ئاماژەش بە نۊعوو کوشتەی و سۊچنای دڕندانەو قوربانییاو کۊکوشییەکەو باسای کەرد، حەر ئاوەختیچ بە هەلیکۊپتەر کۊمەڵێوە ڕۊنامەنویسێشا نامەوانیان بەردۍ وا و چا کۊنفرانسێوەنە واتش "پەکەکە ئی کۊکوشییەشە کەردەن و ئاویربەسشا تێک دان". ڕاشا نەدا دەگانشینۍ و شایەتحاڵەکۍ پەی ڕۊنامەوانا دوا. دماو ئانەیە شاندوو کۊمەڵەو مافەکاو ئینسانی و کۊمەڵەو خەباتی پەی ئاشتی لوۍ واگە بەرکەوت حەرگیز پەکەکە ئی هەرمانێشە نەکەردێنە، بەڵکوم هێزەکاو دەوڵەتی کۊکوشییەکەشا کەردەن. دماتەر ساڵەو ٢٠٠٩ وەزیر عەدنان ئەکمان ئی ڕاسییەشي وات کە دەوڵەت کۊکوشییەکەش کەردەن. ساڵەو ٢٠١٢ ، فەرماندەو جەندرمەو شەرناخی سەرواز ئۊزجان تۊزلو دادگانە ئیفادەش دا و واتش: "کۊکوشییەکە بە ئەمرەو فەرماندەو توگای ئەکچای، سەرهەنگ سەڵاحەدین ئوگورلو بییەن". وەلۍ هەڵای بکوشۍ سزا نەدریێنێ.
ئۊجاک جە حەفتەو ٩٨٠ەمینینە داواش جە گردوو یاگە دادپەروەری و سیاسییەکا کەردە و واتش: "داوا کەرمۍ جە پەرسەو کۊکوشیی باساینە، وەرپەرسبییەی گێرا گەردەن. وردەکارییەکاش ئاشکرا کەرا، جەسزا بەرشییەی تاوانبارا دمایی پەنە بارا و دادپەروەرۍ با. چند ساڵۍ ویەردەن ئێمە دەس جە داواو دادپەروەری ورمەگێرمۍ پەی ئا ١١ کەساو کۊکوشیی باسایە و گردوو بێسەروشۊنکریایا. هۊشتا وزمێوە دەوڵەت ناچارا بەپاو نەریتە یاساییە جیهانییەکا جمۊوە".
چی تاتەم سۊچناتا؟
دمایی، ئەمینە کایا کناچۍ قوربانیێوە کۊکوشیی باسای ئەحمەد کایا، قسێش کەردێ.
واتش کە چند ساڵێوەن پەی ڕۊشنۊکەردەی کۊکوشییەکا مەیامەیدانوو گاڵەتەسەرای، واتش: "تاتەتا کوشتا و سۊچناتا. دماو کوشتەیش، چی سۊچناتا؟ ئی شەرمەیە چەنی شاردێوە؟ ئێمە پەی نەشارتەیۊ ئی شەرمییە و بەدیئاردەی دادپەروەری ئینایمۍ چێگە. بەداخۊ چی وەڵاتەنە دادپەروەری نییا. وەختوو ڕووەدایەکەی زارۊڵیوە گولانە بێنا، ئارۊ پیر بییەنا و هەڵای داد و ئاشتیم گەرەکا. با ئیتر کەس نەمرۊ و کۊکوشی ڕووە نەدۊ".
"جە ٨ ساڵییوە تاتەم جەدەس دان"
کناچێوە تەرەو ئەحمەد کایای، لەیلا کایا ئاماژەش کەرد یادش مەنەن چەنی سەروازەکۍ تاتەشا گێرتەن، واتش: "جە ٨ ساڵییوە تاتەم جەدەس دان و نەتاوانم بوانوو، ئێمە تاوانما چێشا؟ باجوابما بداوە".
دماتەر بەشداربیۍ گوڵشا سەروو پەیکەروو گەڵەتەسەرایۊ نیارە، کە بە پۊلیسا تەوقە دریابێ.
