یۊ جە فەرماندەکاو هەپەگە سەرحەڎ ژیهات باسوو ئانەیش کەرڎ، کە گەریلا ئازاڎ شەڕگەر کە خواکورکنە گەشمەرڎە بی، دڵسۊزوو پەکەکەی بۍ، گەلوو کورڎی پێسە گەلوو وێش وینۍ و واتش، "وەختۍ ئینسان  دیێش پەی، پێسە کەسێوە کە چندین ساڵۍ کورڎستاننە مەنەبۊوە وینێش".

جە ئەرەیاونیاو ٢٣ی حوزەیرانوو ناوەندوو ئەرەیاونای و چاپەمەنیی هەپەگەینە ئامان، کە جە چالاکییەکەو ١٥و حوزەیرانینە کەشوو گەشمەرڎە شاهینوو خواکورکینە ١٨ سەربازۍ کوشیێنۍ و یۊ جانیشایچ ئازاڎ شەڕگەر (توماس یوهان سپەیس) بییەن، جەئەدابییەو شاروو ماینبورگوو ئەڵمانیای بۍ. چا بارەوە ئەرەیاونیاکەی واتەبێ:

"هامڕا ئازاڎ وەختۍ زانکۊنە بۍ بە وانایۊ  و پەیجۊری پەیش بەرکەوت، کە کریۊ جیهانێوە ئازاڎ و یەکسانی جیاواز خوڵقنیۊ و جە ئەنجاموو ئا گێڵای و شۊنیرەلوایرە دماجار پەکەکەش ئشناسا و ساڵەو ٢٠١٦ بەشدارییش ڕیزەکاو گەریلاینە کەرڎ. پێسە نامەکۍ وێش کەشە ئازاڎەکاو کورڎستانینە ئازاڎ بۍ.

ئامێتەو فەلسەفەو ڕابەرایەتی و جەوهەروو پەکەکەی بۍ، پێسە جەنگاوەرێوە قارەمانی گرڎ وەختۍ ڕیزەکاو وەڵیوە بۍ، بەتووڕەیێوە فرەوە وەراوەر بە کۊلۊنیالیستەکا گژیێ".

هەڵوێستش ژیواینە هەقەتین بۍ

یۊ جە فەرماندەکاو هەپەگەی سەرحەڎ ژیهات قسێش پەی ئاژانسوو هەواڵوو فورات (ANF)ی، کەرڎۍ و باسوو ئانەیش کەرڎ، کە جە ساڵەو ٢٠٢٢ینە، جە مەیدانوو خواکورکینە ئازاڎ شەڕگەرش ئشناسان و واتش، "هامڕا ئازاڎ، هەڵوێستوو ئادی دلۍ ژیواینە هەڵوێستێوە هەقەتین بۍ. وەختێو قسۍ کەرۍ، واچۍ دلۍ پەکەکەینە وێش ئشناسان، چون پەکەکەی پێسە ڕاو ڕزگاریی ئینسانیەتی وینۍ. دڵسۊزوو پەکەکەی و گەلوو کورڎی بۍ. وێش جە فەلسەفەو ڕابەر ئاپۊینە قووڵ کەرڎەبێوە. ڕەنجدەر کەسێوە ساعیب کرڎەوە بۍ. گرڎ هەرمانێوە کە کەرێش، یاونێش سەرکەوتەی. گەریلایەتینە پسپۊڕ بۍ. بەدیسپلین بۍ، تاکتیکەنە دۊڵەمەند بۍ. بەرڎەوام وێش پەروەرڎە کەرۍ و پەی وەڵۍ لوۍ.

پەی گەنجاو کورڎیچ نموونە بێ

هامڕا ئازاڎ شۊڕشگێڵنیوە بۍ، کە پەی گەنجاو کورڎیچ نموونە بۍ. کورڎستان ئەرەگیریا و ئشناسنامە و مافەکێما زەوتۍ کریۍ. هامڕا ئازاڎ پێسە ئەڵمانیێوە ئاما و جەنگش کەرڎ. گیانوو  وێش پەی گەلوو کورڎی بەختە کەرڎ. گەنجاو کورڎی مشۊم زیاتر هاگاداری جە لە کورڎستانی و گەلەکەیشا کەرا. ئا گەنجۍ کە مەتاوا یاوا کەشەکا زروفشا مەکەرۊش، وەلۍ مشۊم بە  کەسایەتیی هامڕا ئازاڎی پەی هێزەکاو تورکی ئەرەگیری گرڎیاگۍ کەرا بە مەیدانوو جەنگی.

وەعد بە بنەیانەکەیشا مدەیمێ

ئا چالاکییە بە سەرمەشقایەتیی ئاسیا کانیڕەش، کۊچەر مەدیا و ئازاڎ شەڕگەی کریا، گیانبازانە بۍ. چا بنکەنە دەوڵەتوو تورکی ئەرەگیری، کە چەمەڕوانی نەکەرۍ گەریلا هجوومشا کەرۊ سەر، گەریلۍ جەنگشا کەرڎ و گورزشا شانا سەروازاو تورکی. جە سەیەو ئا هامڕایاوە بڕوا بە ئازاڎی و هومیدی فرە گەشتەرە بۊ. پێسە هێزەکاو هەپەگەی و یەژاستاری تا ئاخیر سەروو ڕێبازوو هامڕایاوە بیمۍ. ڕۊحوو ئینتەرناسیۊناڵیزمی بەرڎەوام بەزیندەیی مرمانمۍ و هاگادارییش کەرمۍ، وەعد بە بنەیانەو هامڕایاما ئازاڎ، ئاسیا و کۊچەرۍ مدەیمۍ، کە هەقەشا کەرمێوە و تا ئاخر ڕاشا  وەر مەدەیمۍ. "

س.ز