وێرەگاو هێزی دەوڵەتوو تورکی ئەرەگیری دەگاو ڕەزکای سەر بە تلعزێروو شەنگالیش کەرد ئامانجوو هجومێوە ئاسمانی. فەرماندەیی یەکینەکاو مدرامانوو شەنگالی (یەبەشە) جە بارەو هجومەکەیۆ ئەرەیاۋنێوەش وەڵا کەردۆ.

یەبەشە جە ئەرەیاۋناکەیشەنە ئاماژەش پانەی کەرڎەن، کە جە هجووم و دەوڵەتوو تورکی ئەرەگیرینە جەنگەوانێشا گەشمەرڎە بیەن.

جە ئەرەیاۋناکەینە ئامان، "رۆو ٨/٣/٢٠٢٤ سەعات ١٧:٣٠دەیەقۍ جە دەگاو ڕەزکای جە تەرەفوو دەوڵەتوو تورکی فاشیستی و قڕکەری تورکیوە هجومێوە ئاسمانی کریا سەروو هێزەکاما کە سەرحاڵۍ ویەرنای ئەرکەکاشا بێنۍ. چا هجوومەنە جەنگەوانێما گەشمەرڎە بی.

****

 چی ماواو دمایینە دەوڵەتوو تورکی فاشیستی جارێوە تەر بە دڕندەیی فرەوە هجوومش کەرد سەروو مەیدانوو ئێمە شەنگالنە. ئا هجوومە فاشیستی و قڕکەرییە یوەم جار نییا، کە وەراوەروو ئێزدییەکاوە کریۆ.  ئا هجوومەو دەوڵەتوو تورکی درێژەو قڕکەرڎەی و جینۆسایدوو ئێزدییەکان. وەراوەروو مافوو وێپارێزنای و وێڕاوەبەریی  ئێزدییەکانە هجووم ئینا ئارانە. بەتایبەتی چی ساڵاو دماینە دوژمن تاکە یەک ئامانجش هەن کە ئارڎەیدیی وەرمەکاشا پەی ئەرەگیری. سەروو ئا بنەمێوە گردوو هێز و پلانە چەپەڵەکاش وزۆ هەرمانە.  دەوڵەتوو تورکی فاشیستی چی بوارەنە شکستوو داعش، دەسکەوتەکاو وێڕاوەبەریی دیموکراتیکوو شەنگالی و هێزی سەروازیی سەربەوێش حەرگیز پەی هەرس نەکریان و سەروو ئا بنەمێوە گرد وەختێ بە فرتوفێڵێ و بە هجوومێ هەوڵێ مدۆ دەستکەوتا دلێنە بەرۆ. بەتایبەتی ماوەی وەڵیننە پلانێ فرێشا بێنێ و ئێمە پێسە هێزی درکشا پەنە کەرمێ و  هاگادارێشانمێ. جە دیای ئی ڕاسیوە فشارەکاشا پەی سەروو حکومەتوو عێراقی و هێزەکاو هەرێمەکەی فرە زیادش کەرڎەن. قسێ پارێزگاروو نەینەوای سەروو ڕێککەوتەی ٩و تشرینوو یوەمی چانەیە نەبڕیێنەرە. هەرپاسە تا هێزەکاو پەدەکەی مەیدانەکەنە باڵادەسێ با، حکومەتی ئاکەپە-مەهەپەی دەسشا وست دلێ ئەنجامەکاو ورچنیەیە وێمانەکاو نەینەوایۆ. بەتایبەتیچ بازنەو شەنگالینە. هەڵای جە هەوڵەکاشا بەرڎەوامێنێ تا سیاسەتوو قڕکەرڎەی بە ئەنجام بیاونا. پەی ئانەیچە هیچ یاسا، هیچ ئەخلاق و هەستیارێوە گلێرگەی مەشناسا.

 قۆناغێوەنە کە گەلەکەما ڕووەش کەرڎە خاکوو وێش،گێڵاوە پەی خاکوو وێشا دوژمنەکەما هەوڵێ مدۆ ئارامیی هەرێمەکەی بشێونۆ و گەلەکەما، کە گێڵاوە چەمتەرسنێ با. بەتایبەتیچ جە ڕوێوە مەبارەک پێسەو ٨وو مارسینە کەرڎەی ئی هجوومەیە ماناش هەنە. جە وەڵیوەلوایەکاو  ژەنە ئێزدییا پاسە ناڕازیین، هەمان وەختەنە سیستمێوە بە سەرمەشقایەتیی ژەنایچش گەرەک نیا. ئا ڕوە گەرەکش بێ بە هجوومی دڕندانەو وێش بە ونی ڕوەکەیما کەرۆ بە شیوەن. بێگومان ئینە ڕاسیی دوژمنی قڕکەری نیشانە مدۆ.

هامڕاما مەجدەل ساڵەو ٢٠١٦ ئاما دلێ ڕیزەکاو یەبەشەی و بەشدارییش  جە کۆشیایی ئازادیینە کەرد.  هامڕاما مەجدەل فەقیر عەشیرەتوو فەقیرانەینە،  کە دژوو دوژمنی، ئایینی ئێزدایەتی هەرگیز سەرەشا نەکۆمنانرە. هامڕاما مەجدەل پاهەرماناو دلێ جمیەری کە دریێبێنێ ملشرە، هەرمانە و دەوروو سەروو شانەیش و وەرپەرسیی سەرڎەموو وێش یاونا. دلێ ژیواینە هەرگیز دژوو دژوارییەکا هەنگامەش پەی دمای نەنیا و ڕیزەکاو وەڵیوە دلێ هەرمانێ و خەباتینە بێ. هامڕاما مەجدەل فەقیر چی دمایوە جە هەرمانەو  فەرماندەیی تابورینە  پەی ئارامی و ئاسایشووو شەنگالی سەرەمڕ کۆشیێ و وەرپەرسیی قورسش سەروو شانەیۆ بی.

بەڵام با دوژمنی قڕکەر بزانۆ پا هجوومە تەرسنۆکانەیە نمەتاوۆ پاشەکشێما پەنە کەرۆ. وەرگێریکاراو شەنگالی مەبارەکی  ئێمە درێژە بە کۆشیای ڕەواو وێما مدەیمێ و ئانێ  هامکاریی دوژمنی کەرا وەنەشا پێچمێوە. سەروو ئا بنەمایا ئێمە سەرەوەشیی جە بنەیانەو هامڕا گەشمەرڎەکاما کەرمێ. جارێوە تەر ئا وەعدەیە بە گلێرگەکەیما مدەیمێوە، کە تا ئا وەختە وێڕاوەبەریی شەنگالی مسۆگەر بۆ درێژە بە کۆشیای مدەیمێ.

شناسنامەو هامڕا گەشمەرڎەکەیما ئینەن:

شناسنامێ: مەجدەل فەقیر

نامێ و دمانامێ: مەجدەل حەسەن خەڵەف خەلیل

وەخت و شۆنەو پەیدابییەی: ١٩٩٢/ خرباتێ قەواڵا- تلعزێر

وەخت و شۆنەو بەشداری: ٢٠١٦/ تلعزێر

وەخت و شۆنەو گەشمەرڎەبییەی: ٠٨-٠٣-٢٠٢٤- دەگاو سکەنیە (رەزکا)".