بەپاو هەواڵێوە تۆڕەو مافوو مرۆڤوو کوردسانی چوار زینڎانیۍ سیاسی کوردی بە نامەکا پزمان فەتحی، موحسین مەزڵوم، محەمەد فەرامەرزی و وەفا ئازەرباری دماو پەشڕاسکردەیۊ سزاو جە قەنارەدایشا جە لایەنوو دەسەڵاتوو دادوەری ئێرانیوە جە هەر ئان و ساتێوەنە ئەگەروو جابەجێکەردەی سزاکېشا ئینا ئارانە.

ئا چوار زینڎانیە سیاسیە کە ئەندامۍ کۆمەڵەی بێنۍ جە ٢٣ۍ تەمووزوو ٢٠٢٢ جە لایەنوو هێزە ئەمنییەکاو ئێرانیوە جە دەگێوە سەر بە ورمێنە گیریۍ و دماو ماوېوە جە لایەنوو لقوو ٢٦و داڎگاو ئاخېزوو ئیسلامی ئێرانیوە  بە سەرۆکایەتی دادوەر ئیمان ئەفشاری بە تۆمەتەو "جەنگ جە دژوو خوڎا"ی و "سیخوڕی پۍ ئیسرائیل"ی سزاو جە قەنارەدایشا سەرەرە سەپیان.

دماو ئانەی تانە چا سزۍ دریا، جە ڕووانی ۋیەردەنە لقوو ٩و دیوانوو باڵاو داڎوەری سزاکېش پەشڕاس کەردۆ و دۆسیەکەش روانەو بەشوو جابەجێکەردەی سزۍ جە داڎگاو تارانی کەرد، پینەیچ مەترسی جابەجێکەردەی سزاکۍ زیاتەر بیەن.

محەمەڎ فەرامەرزی تەمەن ٢٨ ساڵ و خەڵکوو دێوڵانی، موحسین مەزڵوم تەمەن ٢٧ ساڵ خەڵکوو مەهابادی، وەفا ئازەربار ٢٦ ساڵ خەڵکوو بۆکانی و پژمان فاتحی تەمەن ٢٨ ساڵ خەڵکوو کامیارانی جە دماو گێرتەیشاوە جە ٢٣ۍ تەمووزوو ٢٠٢٢ ێوە تا ئیسە ڕاشا پنە نەدریان دیڎار چنی بنەیانەکەیشا ئەنجام بڎا و مافوو هۊرچنیەو پارێزنەریشا ۋنە زەوت کریان و دادگا پارێزنەرێوەش پۍ دیاری کەردېنۍ و تا ئیسەیچ یاگۍ گێرتەیشا مەزانیۆ.

تا ئیسە دووۍ جارۍ فیلموو دڎان نیایپۊرەو زۆرەملێ ئا چوار زینڎانیە سیاسیە کوردەیە جە میدیای ڕسمی دەوڵەتوو ئێرانیوە وەڵاکریانۆ و چنەشەنە باس چانەی کریۆ ئا چوار کەسە جە ئەسفەهان و جە وەختوو سیخوڕینە گیریېنۍ، بەڵام کەسوکارەکەشا ڕەتش کەراوە و باس چانەی کەرا حەرچوارشا جە وەختێنە بە بێ چەک خەریکوو هەرمانەو رێکوستەی بیێنۍ جە دەگێوە ورمێنە گیریێنۍ.

مەترسی جە قەنارەدای ئا چوار زینڎانیە جە وەختێنە کە ڕۊو ٢٩و کانونوو یووەموو ٢٠٢٣ چوار زینڎانیۍ سیاسیی کوردی بە نامەکا وەفا هەنارە، ئارام عومەری، ڕەحمان پەرهازۆ و نەسیم نەمازی بە تۆمەتوو سیخوڕی پۍ ئیسرائیلی جە زینڎانوو ورمێنە جە قەنارە دریۍ.