یەکەمین ئەتڵەسو دێرینەشناسی ناوچەکێ هەوراماناتی ئامادە کریا
یەکەمین ئەتڵەسو دێرینەشناسی ناوچەکێ هەوراماناتی (پاوە، جوانڕۆ، ڕەوانسەر، سەلاس و باوەجانی) ئامادە کریان کە سەدان نەقشێ بە زانیاریێ وردێ و زانستیێوە جەوەێش مەگێرۆن و بەزوویی مەوزیۆنە ڕووە.
دکتۆر پویا تالب نیا، ڕاوەبەرو پایگاو مللی فەرهەنگی تاریخو هەوراماناتی بە دەزگاکێ یاونەری ئێرانیش یاونان کە یەکەمین ئەتڵەسو دێرینەشناسی شارستانەکێ(پاوە، جوانڕۆ، ڕەوانسەر، سەلاس و باوەجانی) سەر بە هەرێمو هەوراماناتی کە ئا شارستانێ سەر بە پارێزگاو کرماشانیەنێ، ئامادە کەردەن و بەزوویی مەوزانێش ڕووە.
تالب نیا ئاشکراش کەردەن: چەنڎین ساڵێن سەرقاڵێ ئامادەکەردەو ئەتڵەسەکەیەنێ و پەی ئا مەبەستەیە دەیان کارشناسێ و مامۆسێ دێرینەشناسی و تاریخی کۆشش و کارشان کەردەن.
نامبریا واتەنش: دەرەنجام جە شارستانەکێ(پاوە، جوانڕۆ، ڕەوانسەر، سەلاس و باوەجانی) مەتاوانشان زیاتەر جە ٢٠٠ شۆنەوارێ تاریخیێ دەستنیشانێ بکەرانێ کە ڕیشەی تاریخی سەدانوهەزاران ساڵەشان هەن و هامپێچ چەنی زانیاریێ وردێ و دروسێ و زانستیێ و تاریخیێ دەربارەشان، جە چوارچوەو ئەتڵەسێویەنە ڕێکێشان بوزانێ و هاموەخت دەربازێ سیتەمو GISی بکریانێ.
دکتۆر تالب نیا واتش: پەی ئامادەکەردەی ئەتڵەسەکەی سود جە دۆسییە و کار و کۆشای تۆمارکەردەی هەورامانی جە یونسکۆنە هۆرگیریان و بەگردی ئەتڵەسەکە سەدان نەقشێ بە زانیاریێ وردێ و زانستیێوە جەوەێش مەگێرۆن.
دکتۆر پویا تالب نیا، ڕاوەبەرو پایگاو مللی فەرهەنگی تاریخو هەوراماناتی، سەبارەت بە ئەتڵەسو دێرینەشناسی هەوراماناتو سەر بە پارێزگاو سنەی دەستنیشانش کەردەن: وەڵتەر ئەتڵەسو دێرینەشناسی ناوچەکێ هەوراماناتو سەر بە پارێزگاو سنەی ئامادەکریان و وزیان ڕووە و بە ئی جۆرە ئەتڵەسێ دێرینەشناسی ناوچەکێ هەوراماناتو هەر دوێ پارێزگاکێ کرماشانی و سنەی تەمامکەرێ هەنتریەنێ.
