ئاشکرا بی کە حکومەتوو ئەڵمانیای سەبارەڎ بە گەریلاو هەپەگەی ئازاد شەڕکەر کە جە ١٥و حوزەیرانوو ٢٠٢٣ چنی دووۍ هەڤاڵاش گەشمەرڎۍ بیۍ، داواو ڕۊشنکەردەیشۆ جە حکومەتوو تورکی کەرڎەن بەڵام نەتاوانش حیچ جوابۍ هۊرگېرۆوە.
ڕۊو ١٥و حوزەیرانوو ٢٠٢٣ جە مېڎانوو مدرامانوو کەش و گەشمەرڎە شاهینی جە هەرێموو خواکورکی جە هەرێمەکاو پارېزنای مەدیای، یۆ چا ٣ گەریلایەی جە مدرامان دژوو هجومە ئەرەگیریەکاو دەوڵەتوو تورکینە گەشمەرڎە بی، شۆرشگێڵنی ئینترناسیۆنالیستی ئەڵمانی ئازاڎ شەڕکەر ( تۆماس ژوهان سپیس)بۍ.
ئازاد شەڕکەر، جە ئەڎابیەو شاروو ماینبورگوو ئەڵمانیاین، ساڵەو ٢٠١٦ بەشداریش جە ڕیزەکاو گەریلاکا ئازاڎیی کوردستانینە کەرڎ. چن ڕووۍ چېوەڵتەر پەرلەمانتاراو پارتوو چەپی سەبارەڎ بە گەشمەرڎەبیەو ئازاد شەڕکەری پرسیارێوە نوویسیېشا پێشکەش بە ئەنجومەنوو فیدراڵی کەرڎ و داواشا جە حکومەتی کەرڎ جوابشا بدۊوە.
'پرسیارەما جە تورکیا و عێراقی کەردېنە''
حکومەت بە سەرۆکایەتی راوێژکار ئۆلاف شۆڵزی، جوابوو پرسیارە نوویسیاکۍ گۆکەی ئاکبولوت پەرلەمانتاروو پارتوو چەپیش داوە. حکومەتوو بەرلینی ئەرەیاۋناش، کە زانیاریشا سەروو تۆماس یۆهان سپیسی جە ڕۆنامەکاوە ژنیەن و ئەرەیاۋنانش کە چا بارۆ حیچ قسېوە ڕسمیە جە تورکیا و عێراقۆ نەکریېنە.
جە جوابوو وەزارەتوو بەرینە بەنامۍ حکومەتی فیدراڵیوە، بەردەوام ئەرەیاۋییان جە فرەو ڕوواوە پرسیارە جە دەسەڵاڎ داراو تورکیای و عێراقی کریان کە ئایا هەواڵەکەو تۆماس یۆهان سپیسی ڕاسا یان نا؟ بەڵام حکومەتوو ئەڵمانیای تا ئیسە نەتاوانش حیچ جوابېوە جە ئەنقەرەی و بەغڎایۆ هۊرگېرۊوە.
'ئێمە چەکی گرنگ بە تورکیای مەڎەیمۍ'
سەبارەڎ بە پرسیارەو 'ئایا ئەڵمانیا و وڵاتا تەروو ناتۆی پەشتگیری ئۆپەراسیۆنە سەروازییەکا دەوڵەتوو تورکیای کەرا یان نا؟' حکومەتەکەو شۆڵزی ئەرەیاۋناش:"حیچ زانیاریېوەما سەروو ئی مژارەیە نییا."
سەبارەڎ بە پرسیارەو،"ئایا جە هجومە ئەرەگیریەکاو دەوڵەتوو تورکی جە پانیشتوو کوردسانی کەرەسەی سەروازی و چەکی ئەڵمانی بەکارمۍ؟" پېسە جوابش داوە:"حکومەتی فیدراڵی سیاسەتێوە سنووردار و وەرپرسیارانەو ورەتەو چەکیش هەن، پۊکەی پۍ جەنگوو کوردی یا ئۆپەراسیۆنە سەروازییەکا مەنتیقەکەی چی ساڵا دماییەینە، حیچ کام جە چەکە گرنگەکاش مەورەشۆ بە تورکیای."
