شالیارەو جبەرو ئەڵمانیای ئەنالیانا بیربۆکە دەربارەو هرووژمەکا سەرو سەرنیشتیوو وەرکەوتوو سوریای، ئاگاڎیش دا بە دۆڵەتو تورکی و واتش: "جە جەنگو دژ بە کوردینە، داعش ئیسفاڎە مکەرۆنە و ئیسفادەش پەی کەسی نمەبۆنە".

بەپاو هەواڵو (DW) ئەنالیانا بیربۆکە ئەرەیاونانش ئی جەنگە بۆ بە هەڕەشێوە ئەمنی پەی سوریای و تورکیای و ئەوروپای، مشۆم خاکو سوریای پارێزیۆنە، واتش: "نمەبۆ پێسەو ئێرانی و ڕوسیای، جارێوە تەر لایەنە سیاسییەکێ فێڵە جە وڵاتەکەی بکەرانە".

شالیارەکۍ جەختش کەردەنۆ کوردەکێ دەورێ گۆرەشا بییەن جە ماڕای داعشینە جە سوریا و نمەبۆ تنوتیژی وەرا وەر بە کوردا بکریۆ.

هەرپاسە ئاماژەش پانەیە کەرد، مشۆم گلێرگەو مییانەتەوەیی پەیامو "گردما وەرپرسیارێنمێ پەی ڕاگێرتەی جە تنودژی و سەرهۆرداو هێزو ڕادیکاڵی تازەی".

بیربۆکە جەختش وستەن سەرو کۆمکوژییە دڕندانەکا تیرۆریستا داعشی دژو کوردا و واتش، ئەرەکۆشاو کۆبانێ بییەن بە "سیمبولو جەنگی ئازایانەو کوردی دژو داعشی".