" دەوڵەتوو توركی بەهامكاری ئەمریكای و دەزگاو ئیستخباراتی موسادی و سی ئای ئەی گەرەکشا جە چن بەرێوە رژێموو ئێرانی تەنگەتاو بکەرۆ و تەوقەش بڎا و چا ڕێچۆ گەرەکشانە رژێموو ئێرانی رووبەروو هەڕەشۍ حەقەتینۍ بكەراوە".
ئیسرائیل جە چن ڕۆی وەڵینەنە بە هجوومېوە مووشەكی باڵەخانەو کونسڵیەو رژیموو ئێرانیش جە پایتەختوو سوریاینە کەرد ئامانج و لەوێدا حۊت ئەندامۍ پلە باڵۍ سوپاو پاسدارا و بەگرڎیی پېسە ئانەی جە یاۋنەریەکاوە وەڵا کریاوە چواردە كەسۍ کوشیێنۍ. دمابەدماو هجوومەکەی بڕۍ جە وڵاتا پېسە ئەمریكای ۋێشا بێ بەری كەرد چانەی كە هیچ ئاگاڎارۍ پلانەی پێشوەختەو هجوومەکەو ئیسرائیلی بیۍ با و داواشا جە ڕژېموو ئێرانی كەرد كە ئانەی نەقۆزۆوە پەی پشېوی زیاتەری و تەشنەسانای و قووڵكەردەیۆ ناكۆكیەكا و بەتینتەرکەردەی ئېروو جەنگەکەی جە مەنتیقەکەنە و بڕۍ وڵاتۍ و ئەرەمەرزیۍ میان دەوڵەتیچ هجوومەکەشا شەرمەزار کەرد و بڕۍ تەریچشا؛ هجوومەکەشا بەمەترسیڎار بەنامۍ کەرد و ژمارېوە تەرشا پېسە دەوڵەتوو توركی بێدەنگیشا هۊرچنی و بەبێ دەنگیشا هجوومەکەشا پەسەنڎ كەرد.
ئەمریكا و سەرۆكوو ئا وڵاتیە فرەو وەختی ئانەشا ئەرەیاۋنان كە ئاڎۍ و ئیسرائیل ساحیبوو یەك ستراتیجی نیەنۍ. ئی قسۍ، پرۆپاگەنڎەو ئەرەیاۋناینۍ و ئانەیچ تەنیا پەی هۊرخەڵەتنای رای گرڎین كە وچیۆ، جە ئەساسەنە ئیسرائیل پیلان و بەرنامەكاو ئەمریكای جە ۋەرکەوتوو دلېڕاسەی و جەهانینە جابەجێ مکەرۆ و رەنگە جە ڕېبازەنە بڕۍ جیاوازیشا بۆ، بەڵام جە ئاکامەنە یەك ئامانجی هامبەششا هەن.
چەولایچۆ رژێموو ئێرانی دماو ڕوویوە جە بێدەنگی سەروو هجوومەکەیرە؛ هەڕەشۍ حەقسانایشۆ جە ئێسرائیلی كەردۍ و ئەرەیاۋناش؛ شۊنە و وەختوو جوابدایۊکەیما دیار مەبۆ، بەڵام جوابما بۆ پەی ئیسرائیلی و ئیسرائیلیچ ئەرەیاۋنانش كە ئاڎۍ ئاماڎۍ جوابدایۆ رژێموو ئێرانینۍ.
ئەگەر فرەو كەس و لایەنا و دەوڵەتا و ئەرەمەرزیا میاندەوڵەتیا بانگەشەو ئانەی مکەرا كە رژێموو ئێرانی جوابش بۆ پەی ئا هجوومەیە، بەڵام شەخسیەن باوەڕیم پاسەن کە رژێموو ئێرانی جوابش مەبۆ جە ۋەرا ۋەروو ئا هجوومەو ئیسارائیلینە کە حۊت ئەندامۍ سوپاو پاسدارا کوشیۍ، چونكی هەم جە قسۍ ۋەرپرسە باڵاكاو رژێموو ئێرانی و هەم ئا هێزۍ کە وەلاشا پەی رژێموو ئێرانی هەن، ئا هێز و باوەڕیە مە پیویۆ كە تواناو جوابدایۆ ئیسرائیلیشا بۆ.
حەسەن نەسرۆڵا ئەمینداروو گرڎیی حیزبوڵڵاو لوبنانی جە وتارێوە ئایرینەنە ئەرەیاۋناش كە رژێموو ئێرانی جوابش پەی ئیسرائیلی بۆ و ئانەیچ رابەری باڵاو ئێرانی و ۋەرپرسە باڵاکا ئا وڵاتیە قەرارش سەر مڎا كەی و چکۆ جواب مڎاوە.
قاسم ئەعرەجی ئەنداموو لوجنەو ئاسایشی نەتەوەیی عېراقیچ ئەرەیاۋناش؛ ئاڎۍ ڕا بەیەكلایی کەردەیۆ ناكۆكیەكا وڵاتا و هیزگەلی تەری مەڎا سەروو خاكوو عیراقیۆ. ئا پەیامەو قاسم ئەعرەجی پەیامێوە راسەوخۆی بۍ پەی ئا هێزا كە وەلاشا پەی رژێمەكەو ئێرانی جە عێراقەنە هەن كە بەهیچ جۊرۍ دەوڵەتوو عێراقی رازی نییا پانەی کە ئا هێزۍ ئینۍ عېراقەنە هجووم بکەرا سەروو ئیسرائیلی.
ژمارېوە جە ۋەرپرسە باڵاكاو خۆدوو رژێموو ئێرانیچ ئەرەیاۋنانشا كە مشۊم رژێموو ئێرانی بەهەستیاریوە چنی ئا مژارەیە مامەڵە بکەرۆ و دەموو دەس قەرار نەڎۆ؛ چونكی وڵاتا پېسە ئیسرائیلی و ئەمریكای و فرەو وڵاتا تەریچ چانیشا دەوڵەتوو توركیچ دلېشانە گەرەکشانە رژێموو ئێرانی جواب بڎۆوە و تا ئانەی بكەرا بە بەهانۍ پەی هجوومکەردەی سەروو ئەرەمەرزیا ئەتۆمی و سەروازیەكا ئا وڵاتیە و پا جۊرەیچە رژێموو ئێرانی وزانۍ دلۍ تەڵەكەیۆ.
ئامانجوو ئیسرائیلی جە دایۋنەو ئا باڵەخانەیە و کوشتەی ئا ئەنداماو سوپاو پاسدارا و سەركردەکا حەماسی فەلەستینی و بڕۍ هیزۍ سەر بە رژێموو ئێرانی سوریانە پۍ ئانەی بۍ كە رژێموو ئێرانی وزا ئاژېوە کە نەتاوۆ جوابوو ئا هجووما بڎۊوە.
ئیسرائیل وەختېنە ئا هجوومشە کەرد قەناعەتش چانەبۍ كە رژێموو ئێرانی تواناو جوابدایۊیش مەبۆ، نە ۋەروو ئانەی چەك و جبەخانەی پەنەوازش نیا ۋەروو دەسینە، یا خوڎ ئا مووشەكۍ رژێموو ئێرانی مەتاوا بیاوا ئیسرائیل و حەقەو ۋێش کەرۆوە، نا ئەسڵەن مژارەکە ئانە نییا. مژارەکە چانەی گەورەتەرا. ئەگەر بێ و رژێموو ئێرانی جە دلېنەو وڵاتەكەیشەنە جوابوو ئیسرائیلی بڎۆوە ئانە بۆ بە بەهانېوە راسەوخۆ دەسوو ئیسرائیلی و هامپەیمانەكاشۆ ئەمریكا و توركیا و بریتانیا؛ چونكە جوابدایۆ پا جۊرە پېسە ئەرەیاۋناو جەنگی بۆ جە ۋەرا ۋەر بە ئیسرائیلینە نەخوازەڵا ئەگەر چا هجوومەنە خەڵكێوە مەدەنی ئیسرائیلی بانۍ بە قوربانی ئا وەختە كاروەدایەکۍ جە ئاستۍ بەرزەنە با و رەنگە ئیسرائیل و ئا وڵاتېچە هجووم بكەرا سەروو ناونڎوو ئەتۆمی و سەروازییەكا رژێموو ئێرانی، ئەگەریچ هەر بێ دەنگ مەنۊوە ئانە سەروو ئاستی میان دەوڵەتی و هەرێمی و تایبەت جە ۋەرا ۋەروو ئا هێزانە کە وەلاشا پەی رژێموو ئێرانی هەن رسوا و شەرمەزار بۆ و رەوایەتی ۋێش زیاتەر جە دەس مڎۆ و بانگەشەكېش پېسە بڵقوو سەروو ئاوێشا پنە مۍ. ئەگەر رژێموو ئێرانی گەرەکش بۆ بە یۆ چا هێزا کە وەڵائشا پەی رژێموو ئێرانی هەن جواب بڎۆوە، ئا وەختە ئێروو جەنگی جە سوریا و لوبنان وعێراق و یەمەنەنە زیاتەر تەشەنە مسانۆ و ئیسرائیلیچ دەسەوسان مەمەنۆوە و جوابوو ئا هێزا مڎۆوە.
حیزبۆڵڵاو لوبنانی پېسە جە قسەکاو ئەمینداروو گرڎیی حەسەن نەسرۆڵڵاینە بەدی كریا، مافوو جوابدایۆ راسەوخۆیش وست سەروو خودوو وڵاتوو ئێرانی و تۆپەكېش وستۆ مېڎانوو رژێمی و ئەرەیاۋناش؛ بێگۆمان رژێموو ئێرانی هەر جوابش بۆ و بێدەنگ مەبۆ. ئا قسۍ نەسرۆڵڵایە ئانەشا بەر وست كە پېسە حیزبۆڵڵای مەتاوا جوابشا پەی ئیسرائیلی بۆ جە وەختێنە جە دلېڕاسەو كۆنسولخانەو ئێرانینە هێزەكۍ سوپای و حەماسی فەلەستینی کوۍ باوە و بانۍ بە ئامانجوو هجووم و ئیسرائیلی. واتە ئانە ئەركی سەرەكی خودوو ئێرانی ۋێشا كە جوابوو ئا هجوومە مووشەكیا ئیسرائیلی بڎۆوە.
حۆسیەكۍ یەمەنیچ بەهەمانشێوە. حۆسیەكۍ ئانڎەشا دەسەنە مۍ كە پەلامارەو كەشتیە ئەمریكایی و ئیسرائیلیەكا جە بەحری سورەنە بڎاوە و چانەیچ زیاتەر گەرەکشا نیا ۋێشا بکەرا ئامانجوو هجوومەکا ئەمریكای و بەریتانیای.
ئانەی کە مەنۆ، بەرەی مەقاومەی ئیسلامی ئێراقی و حەشدی شەعبی و كەتایبوو حزبۆڵای و كەتایبوو سەیدۆلشۆهەدای سوریاینۍ. پرسیارەکۍ ئانېنە كە ئاخۆ ئی هێزۍ متاوا جوابېوە هامشێوە بەئیسرائیلی بڎاوە و حەقەو رژێموو ئێرانی و کوشتەی سەركردەكا سوپاو پاسدارا جە ئیسرائیلی بکەراوە.
رژێموو ئێرانی بەگرڎیی دلۍ دووڕیانېنە مەنەنۆ و جە هەردووە حاڵەتەكەیچەنە قازانجێوە ئێرانیش چنە مەبۆ. بەتایبەتی ئەگەر ئامانجش جوابدایۆ بۆ. ئا وەختە جەنگەکەی کېشۆ دلۍ وڵاتەکەیشۆ و ئانەیچ بە ماناو بەسوریا و عێراق بیەی ئێرانی و کاول بیەی ئا وڵاتیە و كوشتە و بڕیەی هامووڵاتیا و وڕای رژێمی بەتەمامەتی.
هەر ۋەروو ئی گمانانە كە بڕۍ جە گەورە ۋەرپرسا و تەنانەت ژمارېوە جە نوېنەرا خامنەیی گومانەكاو ۋېشا چا بارۆ مەشاراوە و بەئاشكرا ماچا كە مشۊم بەهەستیاریوە مامەڵە چنی ئا مژاریە بكریۆ و بەشێوېوە ئاقڵانی و لۆژیكیانە جماوە. ئینەیچ ئانەی بەروزۆ كە رایەدارا ئێرانی دوودڵېنۍ جە حەق کەردەیۆ و قەراری دماینشا نەڎان.
ئانەی چی بەینەنە بێدەنگیش هۊرچنیەن و بە خاس و خراپ نقەش چۆوە نمۍ، دەوڵەتوو توركی سەرۊک کۊمارەکەشا. ئەردۆغان و دەوڵەتەكەش فرەو وەختی پەی ئانەی گەرەشابۆ دژایەتی گەلوو كوردی و جمیەروو ئازاڎیوازی گەلوو كوردسانی بكەرا، دەوڵەتوو ئێرانی و رژێمەكەیش بەدۆس و هامپەیمانی ۋێش نامۍ بەرۆ. بەڵام بەڵام چی دماییەنە ئانە پەی گرڎ کەسۍ و بەتایبەتی پەی رژێموو ئێرانیچ یەكلایی بیەنۆ كە دەوڵەتوو توركی و حكومەتەكەو ئاكەپەی و مەهەپەی ئینۍ پەشتەو گروپە چەتەكاو داعشیۆ و پېسە مقاشی بەكارشا مارا.
ئیسرائیل و حكومەتوو ئاكەپە و مەهەپەی و دەوڵەتوو توركی هامپەیمانۍ و هامبەشېنۍ جە ۋەرکەوتوو دلېڕاسەینە، تەنانەڎ جە هجوومەکا ئیسرائیلی پەی سەروو كەرتوو غەزەی بەمیلیۆنان دۆلارۍ چەك و جبەخانەش بە ئیسرائیلی ورەتەن. پۊکاتی چا هجوومەی کە كریا سەروو كۆنسولخانەو رژێموو ئێرانیچ بەخاس و خراپ نە ئەردۆغان و نە دەوڵەتو توركی هیچ كاروەدایێشا مەبۆ سەروو ڕووەداکەی و گېرە ۋېشا بێدەنگ بکەرا و بەبێدەنگیەكەیشا هجوومەکەی پەسڎەن بكەرا. تەنانەت رەنگە ئا زانیاریۍ جە بیەو ئەنداما سوپاو پاسدارا و کۊبیەیۆ حەماسی چا بینایێنە جە تەرەفوو دەوڵەتوو توركی و دەزگاو میتیوە بەئیسرائیلی دریابۆ؛ چونكی دەوڵەتوو توركی و ۋەرپرساو حەماسیچ پەیوەندیېوە نزیكشا پېوەرە هەن. هۊرگیسناو ئا جەنگەو بەینوو فەلەستینی و ئیسرائیلیچ بەفیتوو دەوڵەتوو توركی و ئەردۆغانی بۍ. ئیساتېچ گەرەکشانە بەهەر قیمەتېوە بیەن، رژێموو ئێرانی تووش و جەنگەکەی بکەرا .
دەوڵەتوو توركی بەهامكاری ئەمریكای و دەزگاو ئیستخباراتی موسادی و سی ئای ئەی گەرەکشا جە چن بەرېوە رژێموو ئێرانی تەنگەتاو بکەرۆ و تەوقەش بڎۆ و پانەیچ رژێموو ئێرانی رووبەروو هەڕەشۍ جدیۍ بكەراوە و ئاسایشوو ئا رژێمەیە و ۋەرپرساش وزانۍ ۋەروو تەرسۍ و جەنگی دلێینەی.
پێگېوە ئەمریكی بەئاشكرا ئەرەیاۋنۆش كە رژێموو ئێرانی ئینا حۊڵوو هجومکەردەینە پەی سەروو ئیسرائیلی ئانە پا مەعنۍ مۍ كە ئەمریكایچ گەرەکشا ئا هجووم و جوابدایۆ ڕووەبڎۆ. هەرچەنڎە رژێموو ئێرانی تا ئیساتۍ دوودڵا چانەی كە چنی و كەی و جە چ ئاستێوەنە جوابوو هجوومەکەو ئیسرائیلی بڎۆوە. بەڵام پاسە مەزنڎە کریۆ، کە رژێموو ئێرانی چی مژارەنە ۋێش جە کەری بڎۆ.
یۆ چا وڵاتا حۊڵمڎۆ و پنەش وەشا کە رژێموو ئێرانی جواب بڎۆوە، دەوڵەتوو ئەرەگیروو توركین. دەوڵەتوو ئەرەگیروو توركی پېسە داشېوە دەسوو مۆدیرنیتەی سەرمایەداری مەنتیقەکەنە، بیەن بە زەمینېوە پەی لوای ڕاوەو پیلان و پرۆژەكا سیستموو سەرمایەداری و دەسەڵاتداریەتی پەنج هەزارساڵەو پیا سالاری. دەوڵەتوو توركی، دەوڵەتۍ پەنهانی خانەدانییا. دەوڵەتێوەن سەروو بنەماو مۆڵكایەتی ۋێش بنیاڎنیان. مشۊم چانەی عال بیاومێنە.
دەوڵەتوو ئێسرائیل حەفتاوپەنج ساڵۍ چېوەڵتەر بەدەسوو سیستموو مۆدیرنیتەی سەرمایەداری مەنتیقەکەنە بنیاڎنریا. ئا دەوڵەتە قاچێوە ئیحتیاتوو سیستمی دەسەلاتداریەتی مۆدیرنیتەی سەرمایەداریا. حەرچنە ئیساتۍ گرڎ دەرفەت و ئیمكانێوە وزا ۋەروودەم و سەرۆكوو ئۆكرانیای پەی ۋەرەنگاربیەیۆ و لاوازکەردەو روسیای، بەهەمانشێوە نزیكەو هەشتا ساڵان دەوڵەتوو ئیسرائیلی مەنتیقەکەنە ئاماڎە كەرا کە جە ۋەرا ۋەر بەگەلانە بەكارش بارا. جە ڕاو ئا دەوڵەتەیۆ كە تا بیناقاقاش پڕچەك كریان و بەچەنگ و دڎانۍ پەلاماروو گەلوو فەلەستینی مڎۆ، گرڎ تەكنەلۆجیایۍ كۆمكۆشیشا وستەن ۋەروو دەسی. دەوڵەتێوەن سەروو لۆژیكوو هێزی و كۆشت و بڕی و كۆمكۆشی ئەرەمەرزیان. حۊڵ مڎۆ حەقە جە جەهانی ئیسلامیچ بکەرۆوە و پەی بەدیئاردەو ئا ئامانجیە گەرەکشا وڵاتا ئیسلامی گرڎیی بڎۆ جەنگ. مۆدیرنیتەی سەرمایەداری گەرەکشا جە ڕاو یەهودیەتی و مەسیحیەتیوە، ۋەرا ۋەر بەجەهانی ئیسلامی بەكارش بارا، ئانۍ ساحیب هزرێوە حەقسانێنۍ. گەرەکشانە بەهزر و رامانوو یەهودیەتی و مەسیحیەتی و ئیسلامی خەسیای ئایدۆلۆجیایۍ خوڵقنا و جە دلېینەنە گەلا مایەپووچ و هەستوو مدرامانی و ۋېڕاگریی مرۆڤەكا جە ۋەرا ۋەر بە هجوومەکا مۆدیرنیتەی سەرمایەدارینە لاواز و قەڵس بکەرا و ۋېڕاگریشا دلېنەبەرا.
جە سەردای ئیبراهیم رەئیسی سەرۆككۆماروو ئێرانینە پەی توركیای و كۆبیەیۆیش چنی ۋەرپەرسا ئا وڵاتیە داواش ۋنەکریا کە دژوو جمیەری ئازاڎیوازی گەلوو كوردسانی پېوەرە رێكۍ گنا و ۋەرا ۋەر بەکوردا گژیا. بەتایبەتی جە وەختوو كۆنفرانسە ڕۊنامەوانیەکەینە ئەردۆغان بەئاشكرا داواش جە رەئیسی و رژێموو ئێرانی كەرد جە ۋەرا ۋەروو پەژاكی و پەیەدەی و پەكەكەینە جەنگ بکەرا. جە ئەساسەنە دەوڵەتوو ئەرەگیروو توركی و نوێنەروو مۆدیرنیتەی سەرمایەداری مەنتیقەکەنە گەرەکشا رژێموو ئێرانی جە گرڎ لېوە توشوو جەنگی بکەرۆ و جەئێرانەنە خەتەو نەتەوەپەرسی بەتینتەر بکەرۆ. ئەردۆغان كە جە ڕاو گروپە چەتەكاو داعشیوە کرمانەنە كۆمكۆشیش کەرد، گەرەکشا سەروو ئاستوو كوردسانیچەنە خەتەو نەتەوەپەرسی كوردی بەتین بكەرۆ و جە ۋەرا ۋەروو رژێموو ئێرانینە پېسە كارتێوە بەكارش بارۆ. بێ ئاگا چانەی کە ۋێشوو دەوڵەتە ئەرەگیرەکەش ماوەو پەنجا ساڵان جە ۋەرا ۋەروو جمیەروو ئازاڎیوازی گەلوو كوردسانی"پەكەكە"ینە جەنگ و سیاسەتوو قڕکەردەی بەکارمارۆ و چا جەنگانە جگە جە یانە وێرانی پەی گەلاو توركیای چېوۍ ئەوتۆش بەدەس ناردەن. مشۊم سیاسەتمەدارا پرسیارەو ئانەی جە ئەردۆغانی و حكومەتی و دەوڵەتە ئەرەگیرەکەیس بكەرا كە جە ماوەو ئا پەنجا ساڵەینە شمە گرڎوو وزە و چېرخان و سەرخانوو توركیایتا هەڕاج كەرد و کەرتا بە خەرجوو جەنگی و چا گرڎ جەنگ و كوشت و بڕانە چېشتا دەسکۊت.
ئەردۆغان گەرەکشا جە ڕاو هاندای نەتەوەپەرسی و دین پەرسی و مەزهەبگەرایی و دۆگمایۆ گەلا ۋەربۆنە گیانوو یۊترینی بەتایبەتی گەرەکشا رژێموو ئێرانی جە گرڎ لېوە تەوقە بڎۆ و هەناسەش چنە بڕۆ. جە لېوە ئازەربایجان، جە لېوەتەرۆ توركمەنستان و پاكستان و عەرەبستان و جە لېوەتەرۆ خودوو دەوڵەتوو ئەرەگیروو توركی كە رژێموو ئێرانیشا بەتەمامی تەوقە دان. پۊکەی متاوا جە ماوێوە کەمەنە بەدەیان گروپۍ و جمیەرۍ چەكڎاری و ۋێکوشی پڕناوە پەی دلۍ ئێرانی و دەس بە نیایۆو ئاڵۆزی و پشێوی بکەرا و ئاژەو دلېینەو ئێرانی شڵەقنا. ئامانجی سەرەكی ئەردۆغانی و دەوڵەتوو توركی و ئەمریكای و ئیسرائیلیچ هەر ئانەنە، واتا خاوەن ستراتیجېوە هامبەشېنۍ، بەڕا و رێبازی جیاواز.
هەرچەنڎە ئەمریكا و عەرەبستان و ئێران جە مژاروو ڕاڕەوو بازرگانی و فاڕایۆ كاڵاو شمەکی جەهندستانۆ پەی كەنداوی و گەروو هۆرمزی و عەرەبستانی و میسری و غەزە و ئیسرائیلی و یونانی و بەحروو مدیترانەی و ئەوروپای و ئەمریكای رێكېکۊتێنۍ، بەڵام پاسە بەرگنۆ رێككۊتەکاشا بێ كێشە و ملەملانۍ نەبۆ و پا سەهلیە رژێموو ئێرانی پېسە ۋێش پەسەنڎ نەكەرا و گەرەکشابۆ بەزۆر بڕۍ چێوێش سەرەرە سەپنا.
