بەپاو زانیارییەکا جە سەرچەمێوە تایبەتۆ دەسکۊتەن، دۊڵەتو تورکی ئەنقەرەنە گلېرۊبیەیێش چنی ئەمیرەکاو داعشی ئەنجامدان کە فرەییشا عێراقیێنۍ! جە گلېرۊبیەکەینە قەرارو هرووژمکەردەی سەرو بیابانو سووریای (ڕەقە، دێرەزۆری و حەسەکە)ی دریان!
دۊڵەتو ئەرەگیرو تورکی کە پېسە پەشتیوانی سەرەکی داعشی مشناسیۆ و بە دەیان جارۍ بە بەڵگۆ سەلەمیان، هەڵای هەوڵمڎۆ پلانەکاش جە دژو کوردا و گەلا ناوچەکەی جە ڕاو داعشیوە جابەجێ بکەرۆ، ۋەرو ئینەی پەشتگیریشا مکەرۆ، پەروەردەشا مکەرۆ، چەکڎارێشا مکەرۆ و جە چوارچێوەو بەرژەوەندییەکا ۋێشەنە بەکارشا بەرۆ.
دماو وڕای ڕژێمو بەعسو سووریای و ئامای سەرو دەسەڵاتو جەمۍ چەکڎارۍ پېسە هەتەشەی، دۊڵەتو تورکی بە چەتەکا ۋێش بە نامۍ 'سوپاو نیشتیمانی سووریای' هرووژمش کەرڎ سەرو هەرێمو فراتی و گرڎو سەرنیشت و ۋەرکۊتوو سووریای، ئی هرووژمۍ چەتەکا بە پەشتیوانی ئاسمانی دۊڵەتو تورکی دژو بەنداوو تشرینی و سردەو قەرەقۆزاقی و دەگایەکا ناوچەکەی بەردەواما.
هامتەریب چنی ئی هرووژما، زانیا کە پیلانێوە مەترسیڎارەو دۆڵەتو تورکی هەنە پەی زیڼەکەردەیۆ داعشی و جمنایش دژو قەسەدەی، بەپاو زانیارییەکا کە جە سەرچەمېوە تایبەتیوە بەدەست ئامان، جە دما دمایی ساڵۊو ٢٠٢٤ینە گلېرۊبیەیۍ گرنگ و کاریگەرو داعشی جە پایتەختو تورکیاینە ئەنجامدریان و فرەو داعشە بەشدارەکا گلېرۆبیەکەی عێراقیێنۍ و خەڵکو تەلەعفەرو موسڵینۍ.
بەپاو ئا زانیارییا کە دەسو ئاژانسەکەیما کۊتێنۍ، گلېرۊبیەکەی جە ٢٣-١٢-٢٠٢٤ ی ئەنقەرەنە جە یانەو ۋەرپەرسێوە داعشینە بە نامۍ "عەلی سەرحان سلێمان ئەل-مشکۆ"ی، جە لایەنو ۋەرپەرسو ئەنجوومەنو سەروازی داعشی جە تورکیانە سەباح محەمەد عەلی ئەل-حەمۆیۆ ئەنجامدریان، فرەو چەتە بەشدارەکا خەڵکو تەلەعفەرینۍ و دلېشانە ئەمیرۍ داعشی جە موسڵ، ئەنبار و سەڵاحەدینی بێنۍ.
هەمان سەرچەمە کە ۋەرو مەڵامەتی ئەمنی گەرەکش نەبۍ نامێش ئاشکرا بکریۆ، سەبارەت بە ئشناسنامەو چەتە بەشدارەکا گلېرۊبیەکەی ئی زانیاریێشە دۍ: 'ئەمیر و ۋەرپەرسو داعشی جە ئەنقەرە تەڵعەت یونس محەمەد ئەل-شەرۆ، عەبدولحەکیم شێخۆ عەبدولعەزیز ئەل-شێخۆ، عیماد خالید وەلید وەلید ئەل-عیزدۆ ئەل-ڕاوی، عەبدولغەنی حەسەن محەمەد ئەل-سیلۆ، ڕائید ئیسماعیل عەباس ئەل-ناسر ئەل-هەیالی بەشدارۍ بیێنۍ. ئی داعشۍ فرەیشا خەڵکو تەلەعفەرو موسڵینۍ.
بەپاو هەمان سەرچەمەی، ئامانج چی گلېرۊبیەیە هرووژمکەردەین سەرو ناوچەکا چێرو کۆنترۆڵو هێزەکاو قەسەدەی و ئیدارەو ۋێڕاوەبەری، جە گلېرۊبیەکەینە داوا جە چەتەکا کریان پەی لوای دلۍ بیابانو سووریای. مەبەس جە بیابانو سووریایچ ڕەقە، دێرەزۆر و حەسەکە بیەن.
جە گلېرۊبیەکەینە باس چانەی کریان کە پەنەوازا چی ناوچانە دژو هێزەکاو قەسەدەی چالاکی بکەرا پەی دەسسەرەرەگېرتەی گرڎو بیرە نەوتیەکا ناوچەکەی کە ئینۍ دەسو قەسەدەینە. هەواڵگری تورکیای گرەنتیش دان بە چەتەکا داعشی کە جە ئاسمانۆ یارمەتیشا مڎا و پی جۊرە هرووژم مکەرا سەرو حەسەکە، دێرەزۆری و ڕەقەی.
ۋەرپەرسو ئەنجوومەنو سەروازی داعشی سەباح محەمەد عەلی ئەل-حەمۆ داواش جە بەشدارا گلېرۊبیەکەی کەرڎەن کە هەر ئەمیرێوە ١٠ چەتۍ سەر بە ۋێش بکیانۆ پەی سووریای و مووچەی مانگانەشا ٨٠٠ دۆلارۍ ئەمریکین جە لایەنو دۊڵەتو تورکیوە پنە مڎریۆ و پەنەوازی خێزانەکایچشا جە لایەنو دۊڵەتو تورکیوە مەیسەر مکریۆ. زانیان کە قاسم سەلیم محەمەد ئەل-حەنەش و نەوزاد محەمەد عەلی ئەل-شەلەش ۋێشا پێشنیار کەردەن.
یاگۍ باسیا کە ماوێوە فرەن دۊڵەتو تورکی هەوڵ مڎۆ زینانەکا چەتەکاو داعشی کە ئینا چېرو کۆنترۆڵو قەسەدەینە، ڕادەسو هەتەشەی بکریا، جە حاڵەتێوە پێچەوانەنە هەڕەشۍ دەسوەردای و وستەی چېرو کۆنترۆڵو ۋێش جیای هێزە مېیاننەتەوەییەکا و ئیدارەو ۋێڕاوەبەری مکەرۆ. وەڵتەرێچ هەوڵدایۍ دۊڵەتو تورکی دژو زینانو غوێرانی جە حەسەکەنە بۍ!
یاگۍ سەرنجیەنە چەتە بەشدارەکۍ فرەیشا عێراقیێنۍ و خەڵکو موسڵینۍ. جە پیلانەکېنە حەسەکە هەن کە هامساو شەنگالیا، ئینەیچ مەترسی گېڵایۆ داعشی پەی شەنگالی وەش مکەرۆ، سەری گردیشاوە پەی ئێزدییەکا و گرڎو گەلا ناوچەکەی مەترسیڎارا! جە هەمان کاتەنە مانگێوە دماو ئی گلېرۊبیەو ئەنقەرەی، سەرو داواو بڕې فراکسیۆنا سونی نزیک جە دۊڵەتو تورکی، پەرلەمانو عێراقی پڕۆژەیاساو چنە وېیەردەی گرڎینیش پەسینا. مزانیۆ کە سەڎان داعشۍ ئینۍ زینانەکا عێراقینە و ئاڎێچ گنانە ۋەرو چنەوېیەردەیۆ.
