جە ١٠/١٠/ ٢٠٢٣ هەڵمەتەو "ئازاڎیی پەی عەبدوڵا ئۆجالانی و چارەسەری سیاسی پەی پرسوو کوردی" دەسشپنەکریابۍ، بە نەورۆزوو ٢٠٢٤ ئا هەڵمەتۍ پایێش وستۍ قۆناغەی دووەمۆ. جە چوارچێوەو قۆناغەی دووەموو هەڵمەتەکۍ کە جە تەرەفۇ دۆسا گەلۇ کوردی، سیاسەتمەدارا، رۆشنۋیرا، نویسەرا، ئەکادیمیستەکا و مافناساوە دەسشپنەکریابۍ، بە بەشداری ٣ هەزار کەسا پەی شەرمەزارکەردەی گۆشەگیری ۋەروودەم و ئەنجومەنۇ ئەوروپای  و سی پی تینە چالاکی ئەرەنیشتەی ساز مکریۆ.

سی پی تی ئەرەیاۋنابېش، کە جە مانگەو کانونۇ دووەمینە لوان تورکیا بەڵام نەلان پەی زینڎانوو ئیمراڵی. پۊکاتی چالاکیەکە ۋەروودەم و سی پی تینە گرنگیۍ فرەش هەن.

هامسەرۆکوو کەجەدەکە-ئەی ئەنگین سەڤەر جە بارەو ئامانجەکاو چالاکیەکەیشا، ژمارە و پرۆفایل و بەشداربیاوە و پەیاموو چالاکیەکەیۆ جوابۇ پرسیارەکاو ئاژانسوو هەواڵوو فوراتی (ANF)ی دێوە.

کەجەدەکە-ئە تا چ ئاستێوە جە رێکوستەی ئی چالاکیەینە بەشداربیەن؟ متاودۍ بڕۍ باس جە ئاماڎەکارییە رێکوستەییەکا بکەردۍ؟ کێنۍ ئانۍ کە چنەشەنە بەشدارۍ با؟

ئێمە ڕۊو دووەشەممەی ۋەروودەم و ئەنجومەنۇ ئەوروپاینە چالاکی ناڕەزایەتی ساز مکەرمۍ. نزیکەو ٣ هەزار کەسا بەشدارۍ با. ئیساتۍ گرڎوو پلانسازی و ئاماڎەکاریە تەکنیکیەکېما بەرەو دمایی ملا. جە فرەو ناوەندا گرنگوو ئەوروپاینە چالاکا بەشداری چی چالاکیەینە مکەرا، بە دڵنیاییوە گرڎ کوردۍ نیەنۍ؛ هەڤاڵاما، سیاسەتمەدارا، نویسەرا، چالاکا سەندیکایی، دکتۊرۍ، ئا پارێزنەرۍ پەی ئازاڎیی رابەر عەبدووڵا ئۆجالانی و چارەسەری پرسوو کوردی جە ١٠ /١٠/ ٢٠٢٣ دەسشا بە هەڵمەتەکۍ کەرد، گردشا چا با. حەرپاسە پارێزنەراو رابەر عەبدوڵا ئۆجالانیچ چا بەشدارۍ با. ئا گۆشەگیریەی ٢٥ ساڵېن پەیڕەو مکریۆ و ٣ ساڵېچا هیچ هەواڵ و زانیاریېوە جە رابەر ئاپۆیۆ هۊرنەگیریان، کۊسپەکۍ ۋەروودەم و دیڎاری چنی بنەیانە و پارێزنەرا، چا وزیاڕووە.

کەواتە فیدراسیۆنەکاو سەر بە کەجەدەکە-ئەی جە وڵاتا و هەرێمەکانە بەشدارۍ با؟

گرڎوو نوێنەراو رێکوزیاکا و سیاسەتمەداراما، بەشدارۍ با و پەیامشا بۆ. پېسە مزانیۆ رابەر ئاپۆ جە دژوو سیستمۇ گۆشەگیری کە ٢٥ ساڵېن بێ مردای بەردەواما، مدرامانېوە گەورە مکەرۆ. ئا مدرامانە ئیتر گرڎوو جەهانیرە وەڵابیەنۆ و فاڕیانۆ پەی جموجوڵی و چالاکیېوە گەردوونی. دەوڵەتۇ تورکی فاشیستی جە ۋەرا ۋەروو ئا مدرامانەینە شکسش ئاردەن. سەرکەوتەی گەورەو گەلۇ کوردی جە هۊرچنیە دلېینەییەکا ٣١و ئادارینە راسەوخۆ رژێموو ئاکەپە-مەهەپەیش بەرەو وڕنای بەرد. بەڵام دەوڵەتاو ئەوروپای کە گەرەکشانە ئا وڕایرە بە زینڎەیی بازاوە، گەرەکشانە سیستمۇ مەسڵەحەتی و هامکاری ۋېشا بێ مردای درێژە پنە بڎا.

سی پی تی ئەرەیاۋناش کە جە مانگەو کانۇنۇ دووەمینە سەردای تورکیایشا کەردەن، بەڵام نەلېنۍ ئیمراڵی. جە بارەو سەردای وەڵینیچشا پەی ئیمراڵی گوزارشتەو ۋێشا ئاشکرا نەکەردەبۍ. ئانە چ کێشېوە خوڵقنۆ؟

هەڵبەتە سی پی تی سەر بە ئەنجومەنوو ئەوروپاین و بەردەواما جە بێدەنگی ۋېش. گەلۇ کوردی چا پەیامێوە ڕۊشنش پنەمڎۆ. جە حەقەتینەنە مشۆم ئێمە چا پەرسمۍ سی پی تی چېش جە کوردا مشارۊوە؟ ئیمراڵینە چېش رووەمڎۆ؟ ئاژەو رابەر ئاپۆی چنینا؟ مشۊم ئا پرسیارا و فرەو پرسیارا تەریچ بکەرمۍ و چایچەنە پاگیری بکەرمۍ. گرڎوو ئا مېڎانە ئینایمېش چنە فاڕمۍ پەی مېڎانوو چالاکی. ئا ڕووە تەنیا ۋەروودەم و سی پی تینە ۋېنیشاندای ئەنجام مەڎریۆ، بە شێۋېوە هاموەخت جە وڵاتا پېسە کەنەدا، ئوستراڵیا، ژاپۆن، قوبرس و یۆنانەنە چالاکیۍ ئەنجام مڎریا.

ئێمە جە دیڎارەکانە ئانەی وزمۍ ڕووە، کە مشۊم دەموودەس ئێمە زانیاری جە بارەو رابەر ئاپۆیۆ بەدەسبارمۍ، گۆشەگیری مەڕیۊنە و ئازاڎیی جەستەیی رابەر ئاپۆی جە ساڵەو ٢٠٢٤ ینە مسۆگەر بکریۆ. سەروو ئا بنەمایۍ، ئێمە گرڎوو ئا مېڎانا فاڕمۍ پەی مېڎانوو ئازاڎیی رابەر ئاپۆی، ساڵەو ٢٠٢٤ ی پېسە ساڵەو ئازاڎیی رابەر ئاپۆی ئەرەیاۋنمۍ، رۆحۇ نەورۆزی و رۆحۇ ڕاپیماو ١٧و شوباتی جە ئەوروپاو دلېڕاسەینە نیشانە مڎەیمۍ.

جە دما دمایینە بانگەوازتا پەی ئی چالاکییە هەن؟

سەروو ئا بنەمایۍ ئێمە جە حەوت تا حەفتا ساڵ سەروو بنەماو پەشتیوانی جە رابەر ئاپۆی ستراسبورگەنە پێشوازی جەگەلەکەیما مکەرمۍ. پەی ئازاڎیی رابەر عەبدوڵا ئۆجالانی و پەی ئانەی بۆ بە چالاکی لوتکەو قۆناغەو دووەمەو هەڵمەتەو چارەسەری پرسۇ کوردی، ئێمە حۊڵی تەمام وزمېنە گەڕ.

مشۊم پەی رای گرڎیی ئا پەیوەندییە چەپەڵا و ئا سیاسەتۇ بە تاوانبارنیشاندایەو کوردی، کە جە تەرەفوو دەوڵەتا ئەوروپایۆ پەرەش پنەمڎریۆ، ئاشکرا بکەرمۍ. سەروو ئا بنەمایۍ داوا جە گرڎ لېوە مکەرمۍ کە بەشداری جە چالاکیەکەو ستراسبورگینە بکەرا.