" کۆنفرانسو یەکڕیزیی و یەکهەڵوێسی کوردی جە وەرنیشتوو کوردەسانینە" پەیامو یۆبییەو نیشتیمانیی کوردەسانی (یەنەکە) ونریاوە و دلێشەنە ئامان: "بە یەكڕیزیی و یاواینە و نیشتیمانی یاومێنە ئامانجەکاما".
ئارۆ کۆنفرانسو یەکڕیزیی و یەکهەڵوێسی کوردیی جە وەرنیشتوو کوردەسانینە جە شارو قامیشلۆینە دەسش پنەکەرد، جە کۆنفرانسەکەنە پەیامو یۆبییەو نیشتیمانیی کوردەسانی (یەنەکە) جەلایەنو ئەمین بابە شێخی ونریاوە.
پەیامەکەنە ئامان: "هیواو سەركەوتەی پەی كۆنفرانسەكەی وازمێنە و پەشتیوانیتا بیمێ، هەمیشە یۆبییەو نیشتمانیی كوردەسانی پەشتیوانی یەكڕیزیی و یەكهەڵوێسی كوردی بییەن و ئیسەیچ پەشتیوانی مافو ڕزگاریخوازی كوردینمێ جە سووریانە، چونكە سەقامگیری سووریای واتە سەقامگیری ناوچەكەی، پۆکەی مسۆم مافو گرڏو پێكئامایەکا بەتایبەت كوردی پارێزیا بۆنە."
جە درێژەو پەیامەکەینە ماچۆنە: " بە یەكڕیزیی و یاواینە و نیشتیمانی یاومێنە ئامانجەكاما، نزیكۆ ئاگاداری ئاڵنگاری و پێشئامایەکا ناوچەكەینمێ و پەی رووبەڕووبییەو ئا ئاڵنگارییا، پەنەوازا گرڏ و لایەنە سیاسی و پێكئامایە نەتەوەیی و ئاینییەكا یەكڕیزێ و یەكهەڵوێسێ بانە پەی بەدەسئاردەو مافە ڕەواكاشا.
سەقامگیری سووریای كاریگەرییش سەرو سەقامگیری ناوچەكەی هەن و یەكڕیزیی و یەكهەڵوێسی لایەنەكا بۆنە یاگێ ئومێدو گلێرگەی مییاندەوڵەتی و گەلوو كوردی، پۆکەی پەنەوازا ڕاگیرێ بیمێ جە حەر پیلانێوەنە كە پەی تێكدای یەكڕیزیی گەلوو كوردی مچیارە بۆرە".
