سامیە خەلیلەی تەمەن ٤٧ ساڵە ٢٦ساڵېن سەرو ویرو ئەندێشەو ڕابەرو گەلوو کورڎی عەبدوڵا ئۆجالانی ژیۋای ۋێش ڕاوەبەر مکەرۆ سامیە خەلیلە کە ساڵەو ١٩٩٨ ویرۆکەکا عەبدوڵا ئۆجالانی مشناسۆ، شناسنامەو ژەناش دیۆ و بە قەرارێوە کە ئیسفاڎەش پەی گلێرگەی بۆ دەس پنەمکەرۆ. ئاڎە دەورێوە عالش بۍ جە شۆرشو ۋەرنیشتینە و بەشداری ئەرەکۆشای مافەکا ژەناش کەردەن. سامیە خەلیلە بەشداری گروپو ۋەنایۆی و وتووێژیش سەرو سۆسیۆلۆژی ئازاڎیی عەبدوڵا ئۆجالانی کەرڎەن و ئەرەیاۋناش کە جە قووڵایی و گرنگی ئەرەکۆشای ژەنۍ یاوێنەنە.

سامیە خەلیلە، چا بارۆ چنی ئاژانسوو هەواڵوو فوراتی قسێش کەردۍ

سامیە خەلیلە واتش: " تا تەمەنی ٢١ ساڵیم، ویرۆکەکۍ ڕابەر ئاپۆی نەشناسێنا، بەڵام هامژینەکەم وڵاتپارێز بۍ. جە ڕاو ئاڎیۆ فەلسەفەو ڕابەر ئاپۆیم ئشناسا. وەڵۍ ئانەی ویرۆکەو ڕابەر ئاپۆی بشناسوو ئەڎاو زاوڵەکام و ژەنەو یانەی بێنا. دماو ئانەی هامژینەکەم چنی هەڤاڵا عیلاقەش بۍ، ئینە بی بە مەڵامەتوو عیلاقەو منیچ چنی هەڤاڵا. دماتەر لوانی قۆناغەو فێربیەی شناسنامەو ژەنا وڵاتپارێزی، چا کاتەنە فشارو ڕژێمیچ زیاڎش کەردەبۍ. هامژینەکەم ماوەو ساڵ و نیمێوە جە لایەن و ڕژێمو بەعسیوە گیریا و ئەشکەنجەدریا. پا مەڵامەتۆ فشار سەرو بنەیانەکەیم زیاڎ بی. ئیتر من چانەی یاوانینە کە سامیەی وەڵینە مشۆم فاڕیۆ و مشۆم ئیسافاڎەم پەی گلێرگەی بۆ. ئیتر پێسە ژەنێوە دەسم بە فاڕیای کەرد."

جە کۆمۆنەکانە خزمەت بە گەلەکەیش کەرۍ

سامیە خەلیلە باسش چانەیچ کەرڎ، کە چنی شۆڕشو ۋەرنیشتی جە کۆمۆنو مڎرامانوو گەشمەرڎانە خزمەتو شۆڕشیش کەرڎەن و واتش: "چنی کناچەکەێم بەشدارۍ هەرمانەو کۆمۆنی بیەیمۍ، ئا ئەرەکۆشایەی کە ساڵانێوەن جە کەسایەتی ڕابەر ئاپۆینە لوۍ ڕاوە، دەنگش دابێوە و شۆڕشو ۋەرنیشتی دەسش پنەکەردەبۍ، ئۍمە پا مەڵامەتۆ عالتەر فەلسەفەو ڕابەر ئاپۆیما شناسا، پی جۆرە ئێمەی ژەنا مافەکۍ ۋێما بەدەس ئاردێوە و بە فەلسەفەو ڕابەر ئاپۆی، ژەنی بیە بە خاوەن هێزو ئەرەکۆشای.

سوسیۆلۆژی ئازاڎیی مووانمێوە

سامیە خەلیلە جە دمادمایی قسەکاشەنە ئاماژەش پانەیە کەرڎ، کە سوسیۆلۆژی ئازاڎیی، کە یۆن جە پەنج پارێزنامەکا ڕابەرو گەلوو کورڎی عەبدوڵا ئۆجالانی موواناوە و واتش: "ئێمە جەمۍ ژەنینمۍ حەفتۍ جارێ کوۍ بیمێوە و بەرهەمەکا ڕابەر ئاپۆی مووانمێوە. ئا بەشۍ کە موونیاوە، قسەو باسشا سەر مکەرمۍ و پی جۆرە وەڵۍ گنمۍ و زانیاری زیاتەر بەدەس مارمۍ."