فەرماندەیی گردینوو یەپەگەی جە ئەرەیاوناێوەنە ئاماژەش پانەیە کەرڎەن، کە شەڕڤان حەڵەبی فەرماندە، بۊنەو مردای دڵیشۊ ١٠ کانوونوو دووەمینە گەشمەرڎە بییەن.

چا بارەوە  ئەرەیاونایەکەنە ئامان: "ڕۊڵەی قارەمانوو عەفرینی، جەنگوانوو گەلەکەیش و فەرماندەو یەکینەکاو پارێزنای گەل (یەپەگە)ی هامڕاما شەڕڤان حەڵەب  ١٠ کانوونوو دووەموو ٢٠٢٤ دڵش مردا و یاوا کارەوانوو گەشمەردا. سەرەوەشی جە بنەیانەی وەڵاتپارێزنوو فەرماندەکەیما، سەرجەموو گەلوو حەڵەبی و وەرنیشتی کەرمێ. سەرەو گەلە وەڵاتپارێزنەکەیما و سەرەو سەرجەموو جەنگواناما بەرەکاو جەنگینە سڵامەت بۊ.

جەنگوانوو ڕەنج و سەرمەشقوو جەنگە قورسەکا، ٣١ ساڵۍ بێوچان کەشوو کورمێنجیوە تا دێرسیم گردوو مەیدانەکانە بە بڕوێوە پتەوەوە، گیانبازیی بەرز و بە ئیرادەی قەوەتۊ پەی دۊزوو گەلەکەیش کۊشیا بەدژواری. پێسە هامڕایاش وەعد مدەیمۍ، کە یادوو هامڕا شەڕڤانی گرد وەخت بەزیندەیی بازمێوە و بەدڵنیاییوە وەرم و ئاواتەکاش، کە پەی عومروو وێش تەرخانش کەرد، بە سەرکەوتەی تاجدار کەرمێ.

هامڕا شەڕڤان کە ساڵەو ١٩٩٣ بەشدارییش جە ڕیزەکاو جمیەروو ئازادیی کوردستانیوە کەرد و دماو ئانەیە ئەکادیمیاو مەعسوم کۊرکمازیش مەیدانوو ڕابەر ئاپۊینە ئەلفبێی ئازادیی فێر بی، ڕووەش کەرڎە کەشەکاو کوردستانی. بۊتانۊ تا کەشوو چەولیکی و دێرسیمی جە دژوارتەرین مەیدانەکاو جەنگینە بەشدارییش کەرد، سەرباروو ئانەیە قاچش بریندار بی، وەلۍ  سەروو پاگێرتەیرەش سەرەمڕ بۍ بەرەکاو وەڵۍ جەنگیوە، چەنی دەسپەنەکەرڎەی شۊڕشوو وەرنیشتوو کوردستانی ڕووەش کەرڎە هەوارگەو شۊڕشی و جە وەڵیوستەی و وەڵێوەبەرڎەی یەکینەکاو پارێزنای گەلینە دەوری گەورەش گێڵنا. جەنگوو حەڵەبینە بە ڕەنج و گیانبازییوە سەرمەشقایەتییش کەرد و گەلوو حەڵەبی بە ڕۊحی سەفەربەریوە سەروو ڕاو فەرماندەکەیشاوە گژیۍ و وێگێرییشا کەرد و پێسە ڕاسیی گەلی جەنگکەروو حەڵەبی بە سەرمەشقایەتیی جەنگوانا ئاما ئاراوە.

فەرماندە شەڕڤان بی بە یۊ جە فەرماندە سەرمەشقەکاو ڕزگارکەرڎەی دێرەزوری جە ساڵەو ٢٠١٨ و ڕووش کەرڎە ئا شارەیە و گەلوو دێرەزوری و بە دەیان ژەنۍ ئێزدییێش دەسوو چەتەکاو داعشیوە ڕزگارۍ کەردێ. فەرماندە شەڕڤان و هامرێش  باغۊزوو دێرەزوریوە مزانیی دماییئامای داعشیشا بە تەماموو ئینسانیەتی دا.

شناسنامەو گەشمەرد شەڕڤان حەڵەبی:

شناسنامێ: شەڕڤان حەڵەب

نامۍ و دمانامێ: حەسەن بەکر

ناوی دایک: نەبیە

نامۍ ئەڎێ: محەمەد

شۊنە و وەختوو گەشمەرڎەبییەی: حەسەکە ١٠ی کانوونوو دووەموو ٢٠٢٤