سەرسەعبوو ئارۊی پۆلیسوو تورکی هۊرش کوا سەروو فرێوە جە یانا ئەستەنبوڵی. فرێوە جە ژەنا و ئەڎایا ئاشتی گیریۍ و فاڕیێوە پۍ ناوەنڎوو پۆلیسوو ئەستەنبوڵی.

نامۍ ئا کەسا کە گیریێنۍ پی جۊرەنە: چالاکا ئیشکگیری داڎپەروەری، قومری ئەکگولە و گوڵسوم ئۆزتورکە، ئەڎایا ئاشتی فاتمە یڵمازە و بەدیا گۆکگوزە، سەرۆکەو جەمەو دەما ژەنی دیلەک باشالانە، ئەندامەو ئەنجومەنوو ژەنا دەم پارتی بەسەر چەلیکە، چالاکا جمیەروو ژەنا ئازاڎیی (تەژەئا) ڤەتا بینگۆڵە و سونا قەیمازە، هامسەرۆکەو وەڵتەروو مەنتیقەو گەڤەروو هەدەپەی سەلجان سایغە، جە هونەرمەنڎا جەمەو ڕۆشنۋیری میزۆپۆتامیای (نەچەم) دیلان سویو و زەهرا سویو، سیهات یڵماز، شوکران توگای، گۆنول قەهرەمانە و یوسف ئاچارەنۍ.

دیلۆک

جە دیلۆکەنە بە ئەمرەو داواکاری گرڎی جە ناحیەو گوزڵڤادی سەر بە قەزاو ناوەندیی شاهینبەی پۆلیس هورش کوا سەروو یانا. جە ئاکامەنە، کامیلێ ئاراسی (٥٥ ساڵ) و فەرهاد ئۆزمەن ئەنداموو ئەنجومەنوو گەنجا دەم پارتی جە وەختوو هورکوای سەروو یانانە گیریێنۍ. سەبارەڎ بە مەڵامەتوو گێرتەکەیشا تا ئی وەختە حیچ زانیاریێوە بە بنەیانەکەیش نەدریان. حەرپاسە زانیا کە پۆلیس ئەنداموو ئەنجومەنوو گەنجا دەم پارتی، بویامین دۆغان دریان سەروو یانەو ئاڎیچیرە، بەڵام بە مەڵامەتوو ئانەی کە یانەنە نەبیەن نەگیریان. ئانەیچ زانیا کە ئاراس و ئۆزمەن پۍ بارەگاو ئاسایشوو شارەکەی فاڕیێنێوە.

ئامەد

جە ئاکاموو هورکوای سەروو یانانە جە ئامەد، محەمەد ئۆروچلو، فەرهاد چیچەک و ئومید ئۆکتای گیریێنۍ. جە وەختوو هەڵمەتەکێنە وشکنایشا پۍ یانەکا کەرڎەن. مەڵامەتوو گێرتەو ئا گەنجا نەزانیان و فاڕیێنێوە پۍ ڕاوەبەری ئاسایشوو شارەکەی.

ئەدەنە

جە چوارچێوەو بانگەشەو "پڕوپاگەنڎەو ڕێکوستەینە" جە تەرەفوو سەرۆکایەتی داواکاروو گرڎی ئەدەنەیۆ، پۆلیس ژەنېوەش بە نامۍ بێریڤان ئاکالینۍ جە مەنتیقەو یورەگیرەی بە بەهانۍ "پڕوپاگەنڎەو ڕێکوستەی" سەروو میدیای دیجیتاڵی گێرتێنە و بریێنە پۍ بارەگاو ئاسایشوو شارەکەی.

وەزیرو دلېینەو دەوڵەتوو تورکی، عەلی یەرلیکایا جە بەیاننامېوەنە ئەرەیاۋناش، جە ٢٨ شارانە هورکویان سەروو یانا و ١٦٥ کەسۍ گیریێنۍ.