ئۆپەراسیۆنی شۆڕشگێڵنی زاپی: چندین ئەرەگیرێ سزێ دریێ
ئەرەیاویا گەریلاکاو ئازادیی کوردستانی ئۆپەراسیۆنێوە شۆڕشگێڵنیشا زاپنە کەردەن، چندین ئەرەگیرێ سزێ دریێنێ و دەس گیریان ملوو تفەنگەکاشارە.
ئۆپەراسیۆنی شۆڕشگێڵنیی گەریلاکاو ئازادیی کوردستانی هەرێمەکاو مدرامانوو سەردەموو زاپینە بەردەواما.
بەپاو زانیارییەکا جە سەرچەمەکاو هەپەگەیوە، گەریلاکێ زاپنە دژوو سوپای ئەرەگیرەو تورکی چالاکیی شۆڕشگێڵنیی گەشمەردە هەڵمەت دێرەلوکیشا کەردەن. چالاکییەکەنە ژمارێوە فرە ئەرەگیرێ سزێ دریێنێ و دەس گیریان سەروو چەکەکاشارە.
چەند ساتێوە جە ئۆپراسیۆنەکەی.
بەپاو سەرچەمەکەی جە ئۆپەراسیۆنە شۆڕشگێڵنیەکەنە بنکەو بارەگاکۍ سەروازا تورکی جە مېڎانەکەنە تێکۍ دریېنۍ و جە تەرەفوو گەریلاکاوە کۆنتڕۆڵکریێنۍ.
چا دیمەنانە کە جە مەنتیقە مەدەنییەکا ئامێدیینە دوور جە ئۆپراسیۆنەکەیۆ تۊمار کریېنۍ، سەڎاو جەنگەکەی بە ئاشکرا مژنەویۆ.
وەزارەتوو وەرگیری تورکیای شکسەکاش مشارۊوە
وەزارەتوو وەرگیری تورکیای تا ئیسە ناچار بیەن کوشیای ٦ سەروازا و زامڎاربیەی ٧ سەروازا پەشڕاس کەرۊوە.
بەپاو بڕۍ جە سەرچەمە هەرێمیەکا ئاماژە پانەی کریان کە گەریلاکۍ هجومشا کەردەن سەروو هەرێموو بنکەو ژمارە ١٧٤٠ جە مەتینا، کە ئەرەگیرا سەر بە فەرماندەیی لیواو ٤١ی جە فەرماندەیی کرکلارەلی چنەشەنە بیێنۍ؛ بە پاو ئی سەرچەمەیە چی جەنگەنە زیاتەر جە ٩ سەروازا کوشیېنۍ و لاوکەمیۆ ١٧ سەروازۍ زامڎارۍ بیېنۍ و ٤ سەروازېشا بە سەختی زامڎارۍ بیېنۍ
بە پەشت بەستەی بە وەڵینەو دەوڵەتوو تورکی ئاشکران کە ئی دەوڵەتە زەرەرەکاش جە ئۆپەراسیۆنەکەنە مشارۊوە و ژمارېوە کەموو سەروازە سزادریایەکا پەشڕاس کەرۊوە.
چانەی مشۊ جە چن سەعاتی ئایندەنە ناوەندوو ئەرەیاۋنای و چاپەمەنی هەپەگەی سەبارەڎ بە چالاکییەکەی وردەکاریی زیاتەر وەڵا کەرۊوە.
