ئێران دەسش سەرۇ کەشتیېوە ئیسرائیلیرە گېرت
هێزەکاو سوپاو پاسدارا گەروو هورموزیەنە دەسشا سەرۇ کەشتیېوە بارهۊرگیریرە گېرت، کە ئاڵاو پورتوگالیش سەرۆ بۍ، بەڵام وچیۆ ساحیبەکەش سەرمایەدارێوە ئیسرائیلییا.
دما بەدماو هجۇمەکەو سەرەتاو ئی مانگۍ ئیسرائیلی پەی سەرۇ کونسوڵخانەو ئێرانی جە دیمەشقەنە کە پا مەڵامەتۆ ١٦ کەسۍ چانیشا ٧ ئەندامۍ فەرماندەیی سوپاو پاسدارا کوشیۍ، ئاژەو ۋەرکەوتۇ دلېڕاسەی بەمەڵامەتۇ ئەگەرۇ کاروەدای ئێرانیۆ تا مۍ گرژی زیاتەر بە ۋێشۆ موینۆ.
جە تازەتەرین پێشئامانە ئاژانسوو هەواڵوو ئەسۆشیتدپرێسی وەڵاش کەردۆ کە ئێران گەروو هۆرموزینە دەسش گێرتەن سەروو کەشتیېوە بارهۊرگیریرە، کە ئاڵاو پۆرتوگالیش سەرۆ بیەن.
دما بەدماو ئا هەواڵیە ئاژانسی ڕسمی هەواڵوو ئێرانی (ئیرنا) هەواڵەکەش پەشڕاس کەردۆ و وەڵاش کەردۆ، کە کەشتیەکە سەر بە ئیسرائیلیا و ساعیبەکەش سەرمایەدارێوە ئیسرائیلیا بە نامۍ ئەیال ئۆفێری.
کەشتی ئێم ئێس سی ئاریەسی سەر بە کۆمپانیاو زودیاک مریتایمیا کە ئۆفیسەکەش ئینا لەندەنەنە.
رادوێنوو سوپاو ئیسرائیلی پەشڕاسش کەردەنۆ کە کەشتیەکە خاوەنداریەکەش پەی ملیاردێرێوە ئیسرائیلی گېڵۆوە.
پېسە رێکوزیاو بازرگانی بەحری بەریتانیای وەڵاش کەردەنۆ، ئا کەشتیە جە دووری ٨٠ کیلۆمەتراوە جە سەرنیشتۇ ۋەرکەوتۇ بەندەرۇ فوجەیرەی ئیماراتی جە بەحرۇ عومانیەنە دەسش سەرەرە گیریان.
میدیای ڕسمی ئێرانی وەڵاش کەردەنۆ کە هێزەکاو سوپاو پاسدارا جە ڕاو هەلیکۆپتەریوە هێزشا کیاستەن دلۍ کەشتیەکەی و جە ئیساتېنە کەشتیەکەی بەرەو کەناراوەکا ئێرانی بەرا.
