ڕێکوزیاکە نامێوەش دەربارەو پاشێلکارییەکا ماف مرۆڤی جە ئێرانەنە ئاڕاسەو نەتەوە یۊگێرتەکا کەرد تاوەکو وزۆشەنە بەرنامەو هەرمانەو ۋێشۆ.

جە نامەکەنە ئاماژە پانەی کریان، ئیتڵاعاتو ئێرانی دەربارەو وریشە مورادیۍ و پەخشان عەزیزیۍ فیلمێوەش وەڵا کەردەنۆ و هەوڵ مڎۆ ڕەوایەتی بە سزاو جە قەنارەدایشا بڎۆ. ڕێکوزیاکە بە تنی ئینەش شەرمازار کەرڎ و ئەرەیاۋناش مەبەس چی هەرمانۍ ڕەوایەتیداین بە سزاو جە قەنارەدای. 

ڕێکوزیاکە ئەرەیاۋنۆش جە سنە و مەهاباد و کرماشانەنە لاو کەمیۆ ١٢ چالاکۍ بە بەهانۍ ئانەی کە جە ۋەرکۊتوو کوردەسانینە بەشداری مانگېرتەی گرڎینیشا کەرڎەن، جە لایەنو هێزەکاو ئێرانیوە باڵبەسۍ کریێنۍ.

هەرپاسە جە پارێزگاو خوزستانینە ٦٩ چالاکۍ کۆمەڵایەتی و ژیۋگەیۍ زینانیۍ کریێنۍ و جە ١٠ ڕوێنە ۋنەپەرسایۆ چنی ١٢ چالاکا ئازەری دەسش پنە کەرڎەن.

پارێزنەرو پەخشان عەزیزیۍ، ئەمیر ڕەئیسیان ئەرەیاۋناش دادگاو باڵاو ئێرانی سزاو جە قەنارەدای عەزیزیێش پەسینان. هەرپاسە جەختش کەرڎۆ، بەڵگەکۍ وەرگیریکەردەی جە موەکیلەکەیشا پێشکەش بە دادگای کەردێنۍ، بەڵام ڕەڎۍ کریێنێوە.

سزاو وریشە مورادیێچ دماو ئەرەنیشتەی ١٦ و حوەزیرانی و ٤ و تشرینی یووەمو ٢٠٢٤ بە پارێزنەرەکاش ئەرەیاۋېیا بۍ.

ناڕەزایەتییەکۍ دژو سزاو جە قەنارەدای وریشە مورادیۍ و پەخشان عەزیزیۍ بەردەواما. ڕێکوزیاو مافەکا مرۆڤوو ئێرانی بانگەوازش جە گلېرگەی مېیاننەتەوەیی کەرد دژو ئی پاشێلکارییا هەنگامەی پەنەوازە بنیۆ.