هېزی شەوۍ دێرۍ سوپاو پاسدارا ئەرەیاۋناش، دژۇ هجۇمەکەو ئیسرائیلی پەی سەرۇ کونسوڵخانەو ئێرانی جە دیمەشق جە ڕاو دەیان فڕۆکا بێ فڕۆکەوانی و موشەکاوە تەلئەبیب-ش کەردەن ئامانج.

کەناڵەو ١٢و ئیسرائیلی وەڵاش کەردۆ بەشێوە جە موشەکەکاو ئێرانی سوریانە و بڕێچشا ئەردەنەنە وزیێنێرە واری.

بە پاو دووۍ سەرچەما ئەمنی هەرێمی، فڕۆکە جەنگیەکۍ ئەردەنی جە مەنتیقەکا سەرنیشت و دلېڕاسەو ئا وڵاتەینە دەیان فڕۆکۍ بێفڕۆکەوانۍ ئێرانیشا وستېنێرە واری، کە ڕووەو ئیسرائیل ئاراسە کریێبێنۍ.

ئەردەن وەڵتەر ئەرەیاۋنابێش، کە جە بەرزتەرین ئاستەنە ئاژەی کتووپڕش ئەرەیاۋنان و سیستمۇ رادارۇ وڵاتەکەیشا چەمڎاری جوڵەو ئا درۆنا مکەرۆ کە ئاراسەو ئیسرائیلی کریێنۍ.

بەپاو قسۍ سەرچەمە ڕسمیەکا ئیسرائیلی هجۇمەکەو ئێرانی هیچ زەرەرێوە گیانیش ۋنە نەکۊتەنۆ.

دمابەدماو هجۇمەکەی چنڎین وڵاتۍ ئەوروپیۍ و ئەمریکا هجۇمەکەشا شەرمەزار کەرد.

جە ئیساتېنە تەرسەو ئانەی ئینا ئارانە جەنگ و پشېوی بەینۇ ئێرانی و هامپەیمانەکاش جە لېوە و ئیسرائیل و ئەمریکای پەشتویانش جە لېوەتەرۆ تنتەر بۆوە. میسر داواش کەردێنە، گرڎۇ لایەنەکا پەو پەڕۇ دڎان گېرتەی وێرە و هەست کەردەی بە ۋەرپرسیارییۆ جماوە.

وەڵتەر نوێنەرۇ ئێرانی جە نەتەوەیۊگېرتەکانە جە ڕاو پەڕەو ۋێشۆ جە تۆڕەو کۆمەڵایەتی ئێکسیوە وەڵاش کەردەبێوە کە ئانە جەنگوو بەین و ئێرانی و ئیسرائیلیا و "مشۊم ئەمریکا ۋێش چا جەنگەیە دوور دارۆ".