ئەرەگیریەکۍ دەوڵەتو تورکی ئەرەگیری پەی سەرو خاکو پانیشتوو کورڎەسانی بە هامکاری پەدەکەی بەردەوامێنۍ، ئینەیچ بیەن بە مەڵامەتوو ناڕەحەتی گەلی، سەبارەت بە ۋەرفراوانبیەی ئەرەگیریەکا دەوڵەتو تورکی هەر یۆ جە؛ مامۆسایی ئایینی تەها گەرمیانی و کاوە لەتیف پارێزنەر، پەی ئاژانسوو هەواڵوو فوراتی (ANF)ی قسێشا کەرڎۍ.

' پەنەوازا مامۆسایا ئایینی بێدەنگۍ نەبا جە ۋەرا ۋەرو ئەرەگیریەکانە'

مامۆسا تەها گەرمیانی ئاماژەش پانەیە کەرد ئەرەگیری هەرکەس و هەر لایەنێوە ئەنجامش بڎۆ ناڕەوان پیجۆرە دوا: "ئا ئەرەگیریەی ئارۆ ڕووەش کەردێنە هەرێموو کورڎەسانی، ترسناکا و خەڵکی کوشۆ و دارسان و دارەکاما بڕۆوە. پەنەوازا حکومەتو هەرێمی هەڵوێسش بۆ و جوابێوە جدیش بۆ جە ۋەرا ۋەرو ئی دەسدرێژی و ئەرەگیریانەی کە سەرو خاکەکەیماوە ئەنجام مڎریۆ.

پۊکەی مشۆم حکومەتو هەرێمو کورڎەسانی چنی عێراقی هەڵوێسوو ۋێشا نیشانە بڎا چونکی چی کاتەنە جە لایەن و ئەرەگیراوە ژیۋگەو هەرێمو کورڎەسانی شێویۆ و هاموڵاتیۍ کوشیانە."

' جە ۋەرا ۋەرو ئی ئەرەگیریانە مشۆم دەنگما بیاوۆ بە نەتەوە یۆگێرتەکا و جیهانی'

جە درێژەو قسەکاشەنە مامۆسا تەها گەرمیانی باسش جە دەورو مامۆسایا ئایینی کەرد، کە مشۆم بێدەنگۍ نەبا و هەڵوێسشا بۆ جە ۋەرا ۋەرو ئەرەگیرانە، واتش: "ئەگەر مامۆسایا ئایینی و ڕۆشنۋیرا و وڵاتپارێزنا بێدەنگۍ با، ئانە زیاتەر ئەرەگیری ڕووە مڎۆ و وڵاتەکەما کاول بۆ. هەرپۊکەی پەنەروازا بێدەنگۍ نەبیمۍ و دەنگو ۋێما بە نەتەوەیۆگێرتەکا و ئا شۆنۍ کە مافوو مرۆڤی چنەشانە پارێزیان پەی ئانەی بەیا دەنگماوە و هامکاریما بکەرا."

'ئی ئەرەگیریۍ تورکیای تاوانەنە دژوو مرۆڤایەتی'

لاو ۋێشۆ پارێزنەر کاوە لەتیف، ئاماژەش پانەیە کەرد کە دەوڵەتو تورکی ئەرەگیر هیچ بەهانێش نییەنە و تەنیا مەرامش ئەرەگیرکەردەی و دلێنەبەردەی کوردین، واتش: "ئی هرووژم و ئەرەگیریۍ دەوڵەتو تورکیای تاوانەنە دژوو مرۆڤی و مرۆڤایەتی و هیچ بەهانێوەش نییەنە، تەنیا نیازش ئەرەگیرکەردەی هەرێموو کورڎەسانیا و دلێنەبەردەی کوردین. ئی ئەرەگیریۍ تا ئیساتۍ  بەردەوامێنۍ و پەنەوازا گرڎما هەڵوێسی جدیما بۆ دژش مردمێوە."

' پەنەوازا هاموڵاتی فشار جە هەرێموو کورڎەسانی و عێراقی بکەرۆ'

واتیچش: پەنەوازا حکومەتو هەرێموو کورڎەسانی و عێراقی هەڵوێسی جدیشا بۆ پەی ئانەی وڵاتا بارانە دەنگ، هاموڵاتیۍ ڕەییەو ۋێشا بەربڕا بە نوویستەی یا ۋێنیشاندای. چی ڕێوە متاوا نەتەوەیۆگێرتەکا و دەوڵەتە زلهێزەکا بارانە دەنگ جە ۋەرا ۋەرو ئی ئەرەگیریانە، ڕاش ۋنە بگێرا. ئەرکو هاموڵاتی ئانەنە فشار جە حکومەتو ئێراقی و هەرێموو کورڎەسانی بکەرۆ دژوو ئی ئەرەگیریا دەوڵەتو تورکیای."