سەرۆکوو دادگاو تاوانە قورسەکا ئامەدی، ئەرهان چاوشئۆغڵو، تانەش جە دەسەو باڵاو هۊرچنیەکا (ی.س.ک) دژوو یاگەگیروو سەرۆک شارەوانی وانی، عەبدوڵا زەیدانی دان، واتەنش، نەتاوانش مافوو هۊرچنیەی ۋێش بەدەسبارۆ، بە بانگەشەو ڕشوەی بەرتیلی  کۊتەن ۋەروو ۋنەپەرسایۆ ئا قەرارشە بەرکەردەن.

ئەرهان چاوشئۆغڵو نزیکەو چوار ساڵا شاروو وانینە خزمەتش کەردەن. سەرۆک و لوجنەو دادپەروەری وانی بیەن، بە تایبەتی مۆرەو ۋێش سەروو قەراروو گێرتەی سیاسەتمەداراو کوردی دان ۋنە. دماو جەنگوو دەسەڵاڎداری ١٥و تەمووزوو ٢٠١٦ بە قازانجوو ئاکەپەی، خەڵکێوە فرەش جە هەرمانەکاشا دوورۍ وستۍ. چاوشئۆغڵو جە ماوەو سەرۆکایەتییەکەیشەنە جە وان، تابلۆو سەرکەوتەی 'پۍ سەرکەوتەی جە دژوو تاوانە تیرۆریستییەکا جە وان'ەنە بە فرێوە جە دادوەرەکا بەخشا. وەختۍ شاروو وانینە هەرمانە کەرۆ، فرەو وەختی جە تەرەفوو پارێزگارەکا و ئەنداماو ئاکەپەیۆ سەرش ۋنەدریان. بەردەوام سەروو دیجیتاڵ میدیاو ۋێشۆ مەدحوو ئەردۆغانی و ئاکپارتیش کەردەن.

ئاشکرا بیەن جە وەختێنە چاوشئۆغڵو سەرۆکوو لوجنەو دادی بیەن، ماددەی هۆشبەرش پێسە ئاردا جە فەرمانگەو ئاسایشوو وانینە تۆمار کەردەن و دماتەر بە کەسا تەری ورەشیانۆ. حەرپاسە جە تاڵانکەردەی ئاسەوارە تاریخیەکانە و بازرگانیکەردەی بە زەڕی ساختۆ، ٤ داواکارۍ گرڎینۍ تاوانبارۍ بیێنۍ دادگایی کریێنۍ.

چاوشئۆغڵو بە تۆمەتەو بەرتیلدای ۋنەپەرسایش چنی کریان و ڕووانەو دادگاو دادوو مەنتیقەو ئەرزرۆمی کریان. چاوشئۆغڵو سەروو دیجیتاڵ میدیایۆ بەردەوام مەدحوو ڕەجەب تەیب ئەردۆغانی سەرۆکوو ئاکەپەیش کەردەن. دماتەر جە ساڵەو ٢٠٢٢ ێنە پێسە ئەنداموو دادگاو دادوو هەرێمی ئەدەنەی هۊرچنیا و دماتەر پێسە سەرۆکوو دادگاو تاوانە قورسەکا ئامەدەنە دەسنیشانکریا.

بنەیانەو چاوشئۆغڵوی جە ناحیەو سۆڵحانی سەر بە چەولیکی هۊرکۊتێنۍ. ڕۆنامەنوویس فیرات بولوت سەبارەڎ پا پرسەیە ئی زانیاریێشە وەڵۍ کەردۍ: "پەیوەندی بەینوو بنەیانەو چاوشئۆغڵوی و ئاکەپەی جە سۆڵحانەنە دماو جەنگێوە چەکڎاری بە مەڵامەتوو ئەرەنیشتەیۆ دەسش پنەکەرد. ساڵەو ٢٠٠٩ بی بە کاندیدوو ئاکەپەی و سەرکەوتەیش بەدەسئارد، دماتەر بی بە سەرۆکوو شارەوانی شاری و دماتەر بی بە کاندیدوو پەرلەمانی، براکەو، ئەرهان چاوشئۆغڵوی، جە تەرەفوو ئاکەپەیۆ پلەش بەرزکریانۆ."