ئەندامەو کۆمیتەو مېیانی پەکەکەی هێلین ئومێدە جە مېیانو بەشداریکەردەیشەنە جە بەرنامەو مەدیا خەبەر تیڤینە هۆرسەنگنایش پەی جەنگو گەریلای دژ بە ئەرەگیری کەرد.

جە سەرەتاو قسەکاشەنە هێلین ئومێدە بە حورمەتۆ سڵامش جە مڎرامانوو ئێمراڵی کەرد و واتش: "بە نامۍ گرڎوو هەمڕایاماوە وەشەسیایی و حەسرەتو ۋێما پەی ڕابەر ئاپۆی بەربڕمۍ. بێگومان جە دژوو سیستەمو قڕکەردەی و گۆشەگیری ئیمراڵی ئەرەکۆشایۍ ۋەرفراوان ڕاوەبەر مکریۆ. گەریلا سەرمەشقی ئی ئەرەکۆشایە مکەرۆ و پەی هۆرشێونایۆ سیستەمو ئیمراڵی ئەرەکۆشمۍ."

هێلین ئومێدە ئانەش دەسنیشانکەرد کە پەنەوازا جوانۍ کورڎەسانی پەی ڕابەرو گەلوو کورڎی عەبدوڵا ئۆجالانی هەڵوێسی چالاک و ڕادیکاڵتەر ئەنجام بڎا و واتش: "سەرو گردیۆ پەنەوازا جوانۍ سەرنیشتوو کورڎەسانی ۋێشا چا ئەرکەیە لانەڎا. بەڵێ گرنگە ڕابەر ئاپۆی بوانمۍ. چونکی ئینسان تا جە چێوۍ نەیاوۆنە نمەتاوۆ جابەجێش بکەرۆ. پۊکەی گەر پا گرنیگیەیە نەزانۆ نمەتاوۆ جابەجێش بکەرۆ. بەڵام بەپاو ئانەی چنەش میاوۆنە بەئەنجامش مېیاونۆ و هەڵوێس بە پاو ئا ئەنەیاوایە نیشانە مڎۆ."

هێلین ئومێدە جە بەردەوامی قسەکاشەنە سەرنجش وست سەرو هرووژم و ٢٣ۍ ئابو سلێمانی کە جە لایەنو دەوڵەتو تورکیوە کریاو هەردووە ڕۆنامەوانۍ ئەرەیاۋنای ئازاڎیی؛ گوڵستان تارا و هێرۆ بەهادینە چنەشەنە گەشمەرڎۍ بیۍ، بە ڕێزدارییوە یاڎش کەردێوە و واتش: "ئا دووە ڕۆنامەوانۍ جە وەختو ئەنجامدای هەرمانەو رۆنامەوانینە کوشیۍ، هیچ کەسۍ نمەتاوۆ  نکۆڵی چی حەقەتینەیە بکەرۆ. چونکی ئەرەیاۋنایەکۍ پەدەکەی چی ڕوانگۆ پڕوپاگەنڎەی فرەشا کەرد. هەر جە سەرەتاو ڕووەدای بۆردوومانەکەینە کەناڵ ٢٤ لوا شۊنەماو بۆردوومانەکەی، ئاشکران ئینە هامکاریکەردەی تاوانێن یەکسەر واتش ئینۍ کێنۍ، بە شێوێوە واتش ئینۍ پەکەکێنۍ و چەکڎارۍ و ڕاوەبەرۍ پەکەکەینۍ، بە بوختانە و پڕوپاگەنڎەی پی جۆریە نمەتاوا حەقەتینەکا شێونانە."

هێلین ئومێدە ئاماژەش بە ئەرکو ئەرەیاۋنای ئازاڎیی کەرد و واتش: "پەنەوازا نەریتو ئەرەیاۋنای ئازاڎیی بەشێوێوە قەوەتتەر ۋێش بەڕێکوستەی بکەرۆ و کاریگەری زیاتەرش بۆ. گەر گوڵستانە و هێرۆ گەشمەرڎۍ بیۍ بە دڵنیاییوە پەنەوازا چڼین ژەنۍ تەرۍ جوانۍ ئە هەرمانۍ بەرا ڕاوە. پەی ئینەیچ داوا جە جوانە ژەنا، گرڎوو جوانا و گلېرگەکەیما مکەرو."

جە بەردەوامی قسەکاشەنە هێلین ئومێدە هۊرسەنگنایش پەی جەنگو گەریلای دژوو ئەرەگیری کەرد و جە سەرەتانە سڵامش جە مڎرامانوو گەریلاکاو ئازاڎیی کورڎەسانی کەرد و واتش: "یۆ جە شکۆمەڼتەرین مڎرامانەکا تاریخی ئانەن کە ئیساتۍ هەن. مڎرامانوو گەریلای مڎرامانێوە ئاسایی نیا. متاویۆ پی جۆرە بوچیۆ، پېسە چنی جەنگو بەینو ئیسرائیلی و حەماسی، یان بواچمۍ جەنگو واگەی جەنگو هەژموونوازییا، پا مەعنۍ ئیسرائیل هەوڵمڎۆ هەژموونو ۋێش سەرو هەرێمەکەیرە سەپنۆنە، مڎرامانەکۍ گەریلاکاو ئازاڎیی کورڎەسانیچ دژو ۋێسەپنای و ئەرەگیری تورکین، جەنگو ئازاڎیی گەلان دژو قڕکەری تورکی، جەنگو بیەی گەلا ڕاوەبەر مکەرا.

پې جۆرە جە ۋەرکۊتوو مېیامینینە دووۍ ملەملانێ جە دژوو یۆترینی ملۆڕاوە. مڎرامانوو گەریلای بە تەنیا دژو ئەرەگیری نیا، بەڵکم پەی دیاریکەردەی ئاینڎەو ناوچەکەی و جیهانین، وە جەنگیچا پەی ئاینڎەو گەلا، بێگومان ئینەیچ گرنگی مڎرامانوو گەریلایا. ئێمە باس جە ئەرەگیرکەردەی هەرێمێوە نمەکەرمۍ، گەریلا هێزێوە پی جۆرە نیا و بە گەریلایەتیش نمەزانمۍ. گەریلا جە تاریخەنە گرڎ کاتێ بیەن بە ڕێبازو مڎرامانی و چێردەسا، ڕێبازو ئاڎیشا ئەرەکۊشاین؛ جە دژوو دەسەڵاتدارا و ستەمکارا، بیەن بە مەڵامەتوو مەنەیۆ گەلا. ئی جۆرە ئەرەکۊشایچە ئارۆنە جە کەسایەتی مڎرامانو گەریلاینە ملۆڕاوە. کە تەنیا هێزا جە ئیسەو جیهانینە پی جۆرە جەنگ بکەرۆ. پۊکەی گرڎ جۆرە ئەرەکۊشایەکۍ گەلا جە مڎرامانوو گەریلاینە ماناڎارتەر مبۆ."

'تەنیا چێوۍ کە پەدەکە مکەرۆش زەرەر یاۋناین بە کورڎی'

دەربارەو هامکارییەکا پەدەکەی پەی جەنگو ئەرەگیری دەوڵەتو تورکی، هێلین ئومێدە پی جۆرە هۆرسەنگنایش پەی کەرڎ:

"باسو پەدەکەی و بنەیانەو بارزانی مکەرو. چونکی جە ڕوو ئایدۆلۆجییی و فکرییوە هیچ هێزێوەش نیا ، ۋەرو ئانەی پایێوە زانستی نیا پۊکەی گرڎ چێوۍ جە ڕاو زەڕی و دەسەڵاتدارییوە بەرۆڕاوە، چێش مکەرا؟ مامەڵە و بازرگانی مکەرا، چونکی تەنیا مەرامشا زەڕ و قازانج کەردەیا. عیلاقاتەکۍ ئیساتێش جە جەنگو ئەرەگیری تورکیاینە سەرو ئی بنەمێنە. پەی نمونەی دەربارەو نێچریڤان بارزانی وچیۆ یۆن جە دۆڵەمەڼنە سەرەکیەکا دنیۍ."

'پەدەکە ڕووەی سیاوە و دماکۆتەیی کورڎەسانین'

هێلین ئومێدە واتش: "پەدەکە نەکوردا و نە کوردایەتی مکەرۆ، نە ئیسفاڎێچش پەی کوردایەتی هەن، بێجگە جە زەرەر یاونای بە کوردی هیچی تەرش نیا. پەدەکە جوانا کورڎی بە کوشتەی مڎۆ. متاوو بواچو ؛ گەر ڕوێوە ڕۆشنەو کوردا هەنە، ئاڎیچ پەکەکەن، چونکی پەکەکە گرڎ کاتۍ بیەن بە ڕوۍ پاکە، ڕۆشنە و ئازاڎیی. پەدەکەیچ ڕوەی تاریکەو کورڎەسانین، ڕوەی ترسناکە، قیزەونە و دماکۆتەین."

هێلین ئومێدە ئاماژەش پەنەیچ دا؛ سوپاو تورکی ١٥٠ بارەگێش وەشۍ کەردێنۍ، بە دەیان هەزار سەروازێش جە هەرێمەکەنە بنە پنە وستێنۍ و واتش: "ئی ژمارە جەلایەنو ۋێشاوە وزیان ڕووە. ئایا ئینە ئەرەگیری و چەسپنای نەبۆ، ئەی چێشا؟ ئینە چ عیلاقێوەش بە ئاسایش و ئەمنیەتیوە هەن؟ ئیسرائیلچ هەرمانێوە پی جۊرەشە نەکەرڎەن و نمەیارۆ بکەرۆش. بەڵێ جەنگو بۆردوومان مکەرۆ. ئانەی چا ڕوە مڎۆ کۆمکوژییا، ئینەی جە ڕوو قینۍ و کینەیۆ بەرمەبڕو، مەبەسم جە ڕوو پیادەکەرڎەی ڕێبازو جەنگکەردەیۆن. ڕێبازو جەنگکەردەیشا جە فرەو ڕواوە هامبەشا، بەڵام ئیسرائیل ئڼەو تورکیای سیاسەتو قڕکەردەی ئەنجام نمەڎۆ و ئەرەگیری نمەکەرۆ. موینمۍ حکومەتو عێراقی هەڵوێسێوە بێ ئیراڎە نیشانە مڎۆ. بە پەیلواو من ئی هەڵوێسەو حکومەتەکەو سودانی دلۍ حکومەتەکا تەرینە مبۆ بە ڕووسیاوی. باوەڕیم هەن کە ڕوۍ مۍ دلۍ گلێرگەو عێراقی، پانیشتوو کورڎةسانینە ناڕەزاییەکۍ گۆرەتەرۍ مبا. نمونێوە؛ چن ڕووۍ چێوەڵی ئامێدینە هرووژمشا کەرڎ سەرو ترۆمبێلێوە مەدەنی کە سەرنشینەکێش عەرەبۍ بێنۍ. سودانی سەرۆکوەزیرانێوە پا جۆرەنە.

جە ڕێککەوتننامەکا ئی دماییەیشانە ئێمەشا (پەکەکە) وستیمۍ دلۍ ڕێکوستەی قەڎەغەکریایۆ. جە کاتێنە ئێمە هیچ زەرەرێما پەی عێراقی نەبیەن. یاردەی عێراقیما دان. هەتا پەدەکە فریوش بۆ، بە پروپاگەنڎەکاو پەدەکەی فریوو بوەرۆ، زیاتەر گنۆ دلۍ گێجاوێوە. ۋەرو ئانەی پەدەکە ماچۆ؛ کە پەکەکە زەرەر ۋنەو کورڎی مڎۆ، پەکەکە جە عێراقەنە هەن پۊکاتی هرووژمەکۍ مکریا. ئینە چ عیلاقێوەش پانەیۆ هەن؟ پەکەکە بیەیش هەن پۊکەی کوردایەتی زیڼەن. گەر پەکەکە نەبۆ کەس نمەتاوۆ بواچۆ من کوردەنا. جە جبەرو پەکەکەیۆ نمەتاویۆ باسوو کوردایەتی بکریۆ. هەر ئانەی کە متاوا جە هەولێرەنە با، جە سەیەو پەکەکەیۆن. جە سەیەو دژایەتیکەرڎەی پەکەکەیۆ متاوا چا بانۍ."

'پەدەکە پارتێوە کورڎی نیا'

هێلین ئومێدە واتش: "وەڵۍ گرڎ چێوێنە پەنەوازا ئینسان ئی مژاریە ڕۆشن بکەرۆوە. پەدەکە پارتێوە کوردی نیا. عەیامێوەن ئی تایبەتمەندییەشە جە دەس دان. پەنەوازا ئینە ڕۆشن و وەڵا بکریۆوە و جە دژو پەدەکەی چالاکی کاریگەر ئەنجام بڎریۆ."

هەرپاسە هێلین ئومێدە ئەرەیاۋناش پەنەوازا هەڵوێسێوە ئەرەکۊشای هامبەش نیشانە بڎریۆ، تەماشەو میدیاکاشا نەکریۆ، جە گرڎ شۆنێنە دژوو پەدەکەی هەڵوێس نیشانە بڎریۆ، بەشداری گلێرۆبیەکاشا نەکریۆ و جە ۋەرا ۋەرەنە ئەرەکۊشای کاریگەر دژوو پەدەکەی ئەنجام بڎریۆ.

جە دمادمایی قسەکاشەنە هێلین ئومێدە ئاماژەش بە گرنگی ئەرەکۊشای گەلی جە دژوو ئەرەگیری کەرڎو واتش: "گەلەکەما دڵسۆزۍ ڕابەرایەتی و گەریلاینۍ. جە تورکیانە نەریتێوە گرنگی شۆڕشگێڵنی و دیموکراتیکی بیەیش هەن. جوانۍ ملکەچۍ نمەبا. پەنەوازا باوەڕیما بە جوانا بۆ. ڕا پەی ئەرەکۆشای جوانا بکەرمێوە و متمانەشا پنەبکەرمۍ. پی جۆرە ئەگەر فاشیزمو ئاکەپە-مەهەپەی بماڕمۍ، ئاینڎێوە وەش مکەرمۍ. سەرەتێوە ڕوەو پارادایمو مۆدێرنێتەی دیموکراتیکیرە مکریۆوە و سەرەتێوە ڕوەو ئازاڎییەکارە مکریۆوە. کاتێ ئینە مەڕیا، هەنگامێوە بەرەو سەردەمێوە تازەی جە تورکیا و کورڎەسان و ۋەرکۆتوو دلێڕاسەینە منریۆ.

ئینایمۍ دلۍ قۆناغێوە پی جۆرەینە و پەنەوازا گرڎ کەسۍ جە ئاستو ۋەرپرسیارینە بۆ، پۊکەی نمەبۆ ۋەرپرسیاریەکە تەنیا جە ئەستۆو گەریلاینە بۆ.

نمەبۆ گرڎ چەمەڕاییۍ وزیۆ ئەستۆو گەریلای. پېسە واتم؛ جەنگو گەلی شۆڕشگێڵنیا. باس جە جەنگ و ئەرەکۆشای گەلی مکەرمۍ. گەر گەل پێوەرە بەرێوە دژە فاشیست نیشانە بڎا، متاوا جەنگ ڕاوەبەر بکەرا و دژو فاشیزمی مرداوە. پی جۆرە پەیامو ١و ئەیلولیچ بڎەیمۍ."