ئەرەنیشتەی دۆسیەو دادگاییکەرڎەی چالاکەو کورڎی وەریشە مورادیۍ کە جە لایەنو هێزەکاو ئێرانیوە گیریێنە، بە بەهانۍ ئاماڎەنەبیەی نوێنەرو داواکاری گرڎی و راوێژکارو دادگای پەی جاری دووەمی دماوزیا.
تۆڕەو مافەکا مرۆڤو کورڎەسانی ئەرەیاۋناش، کە قەراربۍ هێزی ئەرەنیشتەی تایبەت بە دۆسیەو چالاکەو کورڎی وەریشە مورادیۍ بلۆڕاوە، بەڵام جارێوەتەر بە مەڵامەتو ئاماڎەنەبیەی نوێنەرو داواکاری گرڎی و راوێژکارو دادگای دادوەر عەموزادەی، پەی دووەم جاری ئەرەنیشتەکەی پەی کاتێوە نادیاری دماوزیا.
یاگۍ ئاماژەین کە وەریشە مورادییە نزیکەو ساڵێوەن جە لایەنو هێزەکاو ئێرانیوە زیڼانیە کریێنە، پەی شەرمەزارکەرڎەی سەپنای سزاو جە قەنارەدای سەرو پەخشان عەزیزیۍ و شەریفە محەمەدیێرە جە ٤و ئابینە بەشداریش جە ئەرەنیشتەو دۆسیەکەیشەنە ڕەڎ کەردەبێوە.
