بنەیانەو زیندانییا پەی ئازاڎیی جەسەیی ڕابەرو گەلو کوردی عەبدوڵا ئۆجالانی درێژە بە ئێشکگێریی داڎپەروەری مڎانێ. ئێشکگێرییەکەنە ئەوەخوای کریانۆ ئازاڎی گەلی بە ئازاڎیی ڕابەرو گەلو کوردی عەبدوڵا ئۆجالانیوە لکی دریان.
ئێشکگێریی قەوماو زیندانییا پەی ئازاڎیی جەسەیی ڕابەرو گەلو کوردی عەبدوڵا ئۆجالانی شارەکاو مێردین و ئامەد و ئێلح و ئیسەنبوڵینە بەردەواما، چالاکییەکانە درووشمو "بژیوۆ سەرۆک ئاپۆ"ی و "بێ سەرۆکی ژیوای نمەبۆ" و "بژیوۆ مدرامانو زیندان"ی و "ژەنی، ژیوای، ئازاڎی" بەرزێ کریێوە، ئەدێ هێلەکشا پۆشا و سەرشۆ نویسیابێ "گۆشەگیری تاوانێوەن دژو ئینسانیەتیین".
کادراو پەکەکەینە، فەرهاد کورتای و ٣ هامڕێ وەختو کودەتای سەروازی ساڵەو ١٩٨٠ینە زیندانو ئامەدینە دژو ئەشکەنجەی ئاویرشا جە جەسەیشا وەردا، واڵێ فەرهاد کورتای، ڕابیعە کورتای چالاکییەکەو مێردینینە واتش: "گەرەکمانە ڕاو ئاشتی بکریۆوە و ڕۆڵەکێما ئازاڎێ بانێ. کە سەرەمڕ ئینێ زیندانەکانە. قابیلا داواو چێشی مکەرمێ؟ جگە جە داواو مافو ئینسانی و زوانو وێما؟ داواو خێرێ وەنەو کەسی نمەکەرمێ. ئینە دۆزو ئێمەن. ئێمە پەی ئی دۆزەیە ئینایمێ ئێشکگێریینە، ئێمە یەکسانی و مافو وێماما گەرەکەن".
چالاکییەکەو ئامەدینە، پەرلەمانتارو پارتی چەپو ئەڵمانیای گۆکای ئاکبولوت چەنی شاندێو پەی چەمڎاری ورچنیەی ئەڵمانیاوە سەرشا دا. شاندەکە گۆششا جە داواو قەوماو زیندانییا گێرت و پەشتیوانییشا پەی بەروستێ.
قەومێ زیندانییا داواشا کەرد فشارو دلێ زیندانەکا دماییش بێ و درێژە بە چالاکییەکەیچشا مڎا.
چالاکییەکەو ئێلحینە، سافورە ئاکینە ئەداو زیندانیی یونس ئاکینی، واتش: زیاتەر جە مانگێوەن کوڕەکەش ئینا زینداننە گۆشەگیریێوی تندنە و ڕووبەڕوو ئەشکەنجەی تندی بییەنۆ، داوای هەستیارەش جە ڕای گردینێ کەرد و واتش: "کوڕەکەم سەرمڕ ماچۆ، هەڕەشێ مەردەیما وەنە مکەرانێ و هاگاتا چەنەما بۆ".
چالاکییەکەو ئیسەنبوڵینە، چالاکێو تەڤگەرو ژەنە ئازاڎا (تەژەئا) خەجێ باشکالە تیشکەش وستە سەرو گۆشەگیریی تندو سەرو ڕابەرو گەلو کوردی عەبدوڵا ئۆجالانی و واتش: "تا گۆشەگیری سەرو عەبدوڵا ئۆجالان نەمەڕیۆن و ئازاڎی جەسەیی مسۆگەر نەکریۆن، کەس ئازاڎ نمەبۆن".
