ئێشکگێریی داڎپەروەری: تا زانیاری جە عەبدوڵا ئۆجالانیوە ورنەگێرمێ، نمەمردمێ
ئەڎایاو ئاشتی ئێشکگێریی داڎپەروەریینە ئەوخوایشا کەردۆ، تا زانیاری جە ڕابەرو گەلو کوردی عەبدوڵا ئۆجالانیوە ورنەگێرمێ، نمەردمێ.
قەومێ زیندانییا پەی ئازادیی جەسەیی ڕابەرو گەلو کوردی عەبدوڵا ئۆجالانی و چارەسەری سیاسیی پەرسەو کوردی درێژە بە ئێشکگێریی داڎپەروەری مدانێ. چالاکییەکە شارەکاو مێرسین و ئەزمیر و مێردین و ئێلحینە بەردەواما. چالاکییەکانە درووشمو "بژیوۆ سەرۆک ئاپۆ" و "بێ سەرۆکی ژیوای نمەبۆ" و "بژیوۆ مدرامانو زیندان"ی و "ژەنی، ژیوای، ئازادی"ی بەرزێ کریێوە، ئەدێ هێلەکشا پۆشا و سەرشۆ نویسیابێ "گۆشەگیری تاوانێوی دژەئینسانییا".
چالاکییەکەو مێردینینە هامسەرۆکەو دەم پارتی مێردین نەجلا ئاجیبوجا گۆشەگیریی سەرو ڕابەرو گەلو کوردی عەبدوڵا ئۆجالانیش شەرمەزار کەرد، واتش: "حەرند گۆشەگیریی سەرو ڕابەرو گەلو کوردی بەردەوام بۆ، ئێمە سەرە نمەکۆمنمێرە و نمەمردمێ"، هەرپاسە جەژنەو ڕەمەزانی وەنەو زیندانییا و چالاکا مەبارەکە کەردە.
چالاکییەکەو ئەزمیرینە یوە جە ئەڎاو زیندانییا، سوڵتان یاگمەکانە واتش: "تا گۆشەگیریی سەرو ئۆجالانی ورنەگیریۆ، درێژە بە چالاکییەکەیما مدەیمێ. پێویسا بنەیانە و پارێزنەرێ چەنیش کوێ باوە. تا زانیاری عەبدوڵا ئۆجالانیوە ورنەگێرمێ، نمەمردمێ."
چالاکییەکەو مێرسینینە ئەڎاو ئاشتی مەریەم ئەربەیە ئەرەیاونا پەی چارەسەری دیموکراتیکو پەرسەو کوردی مشۆم دەمودەس بەرەکاو ئیمراڵی بکریاوە و چەنی ڕابەرو گەلو کوردی عەبدوڵا ئۆجالانی کوێ باوە، ئەوەخوایش کەردۆ تا یاوای پی ئامانجەیە چالاکی مکەرا.
دمایی پەرلەمانو دەم پارتی مێرسین عەلی بۆزان ئەرەیاوناش کێشەکاو وەڵاتی لکی دریێنێ بە گۆشەگیریی ئیمراڵییەوە، واتش: "تا گۆشەگیری بەردەوام بۆ، چارەسەرنەبییەی پەرسەو کوردی بەردەوام بۆ، تا پەرسەو کوردی چارەسەرە نەبۆ، تورکیانە و وەرکەوتو دلێڕاسەینە ماڵاییۆیرە و جەنگ بەردەوام مبۆ. ئەگەر جەنگ و قەیران وەڵاتێونە بۆ، ئارامی و وەڵێکەوتەی نمێ دی. پەوکای پێویسا گۆشەگیری دماییش بێ".
دمایی ئەدێ بە بۆنەو ڕۆوبییەی ڕابەرو گەلو کوردی عەبدوڵا ئۆجالانیوە پارکو یەڵماز گونەینە نەمامێشا نیێ و چالاکییەکە دماییش ئاما.
