ئێشکگیری سەرو سنوورو نسێبینی بە سەرمەشقایەتی تەژەئای و دەبەپەی و دەم پارتی جە ١٣ و کانوونو یوەمیۆ دژو هرووژمەکا سەرو وەرنیشتی بەردەواما. ئارۆ ڕێکوزییەکا تەژەئای و دەم پارتی و دەبەپەی سلۆپی و جزیرە و مێردیننە ئامێ سەرو سنووری و پەشگیری چالاکییەکەیشا کەرد. چالاکوانەو تەژەئای گوڵسەرەن یەڵدرمە سەرنجش وست سەرو هرووژمەکا سەرو وەرنیشتی، واتش: "جەنگ سەرو گەلەکەیما وەرنیشتەنە قەبووڵ نمەکریۆ. شۆڕشو وەرنیشتی بییەن بە نمونێوە پەی جەهانی و مرۆڤایەتی. شۆڕشو وەرنیشتی شۆڕشو بەهاکا مرۆڤایەتیین. شۆڕشو ئازادکەردەی بەهاکا مرۆڤایەتیین. چی شۆڕشەنە یەکسانی و ئازادی و قبووڵکەردەی گردو شناسنامە و باوەڕییەکا هەن. یەکسانی گردو پێکئامایەکا هەن".

"ستەمکارێ شکستشا ئارد"

گوڵسەرەنە ئەرەیاوناش ئانێ هرووژم مکەرا سەرو وەرنیشتی زاڕۆڵێ و ژەنکوشێنێ ، ماف و یاسێ مەشناسا، جەختش کەردۆ سەرو گەشمەرڏەی ڕۆنامەوانا نازم داشتان و جیهان بیلگینۍ جەختش کەردۆ ئاڎێ تەنیا ڕاسی و حەقیقەت فاڕێنێ، واتش: "جە تاریخەنە گردوەختۍ ستەمکارێ شکستشا ئاردەن. شمەیچ هامشێوەو ئەسەدیندێ، شمەیچ کە نکۆڵی جاڎیشا مکەردۍ و کوشدێشا، چارەنوویستا هەر شکسا. واتش: " بەڵام ئارۆ گەلو کوردی سەرو خاکو وێش ئەرەکۆشای پەی بییەی و ئازادی مکەرۆ. گەرەکشا بە زوانو و ڕەنگ و شناسنامەکەیش ستاتۆش بۆنە. پەیچی کاتێ باس مێ سەرو کوردی،  نەیارێ گەلو کوردی ئنە تەرسا؟ ئێمە پێسەو کوردی ئا پەیامەیە مڎەیمێ کە بڕواما پنەش هەن. ئایا خاستەر نییا دەسەڵاتو ئاکەپە-مەهەپەی جیاتی هامکاریکەردەی چەتەکا داعشی، ئاشتی و ڕێککەوتەی چنی گەلو کوردی بکەرۆ؟ چی ئارۆ دەسەڵات ئا چەتا هۆرچنۆ. چی نەیاری گەلو کوردی مکەرۆ؟ گەلو کوردی گرد هەلومەرجێ و کاتێنە داواو ئاشتی و چارەسەری دیموکراتیکی مکەرۆ. گەلو کوردی گرد وەختێ پەی دیموکراسی و چارەسەری دیموکراتیکی. بەڵام دەسەڵات گۆشێش وزتێنێرە. تەنیا بە فێڵ و تەڵەکە جە گەلو کوردی نزیک بۆوە".

کورد شکۆو مرۆڤایەتیش پارێزنا

پەرلەمانتار زەکی ئیرمەز سەرنجش وست سەرو ئەرەکۆشای وەرنیشتی دژو چەتەکا داعشی، واتش: "ئاکاتە کورد مرۆڤایەتیش پارێزنا. شکۆو مرۆڤایەتیش پارێزنا. کۆبانێنە داعشش ماڕا. گەلو کوردی گرد یاگێنە وەرگری کەرێ. گردو دوژمنا مرۆڤایەتی و گەلو کوردی شکستشا ئارد. سەدام دوژمنایەتی کوردیش کەرد، وڕا. بەشار ئەسەدیچ بەهەمان جۆر".

زەکی ئەرەیاوناش ئەر دەسەڵاتو ئاکەپە_مەهەپەیچ دوژمنایەتی کوردی بکەرۆ، شکس مارۆنە؛ گەلو کوردی مافدارا، ئەر کۆمکوژی سەرو گەلو کوردی سەپنا شکس مارا و وڕا؛ داواش جە گەلو کوردی کەرد چی قۆناغەنە یۆبییەو وێشا بنیات بنیا و بە یەکڕیزی بلا دیمەشق، واتش: "هرووژمەکێ سەرو وەرنیشتی شکس مارا. ئەر ئی یۆبییەی و هامپەیمانییە بێنە دی، نەوەک هەر پەی گەلو کوردی، بەڵکوم ڕاوەشکەرا پەی ئانەی گەلو کوردی جە چوارپارچەو کوردەسانی چنی گەلا تەری بەشێوێ دیموکراتیک و ئازاد بژیوۆ".

"ئازادی عەبدوڵا ئۆجالانی فەرزا"

زەکی ئیرمەز واتش: "ئێژا عەبدوڵا ئۆجالان دیدگێوەش پەی دەسەڵاتو ئاکەپە_مەهەپەی نیشانەدا. واتش "ئەر هەلومەرج گونجیا بۆ، ئامادەنا پەی مڏرناو جەنگی و دەسپنەکەردەو پرۆسەو یاسایی و سیاسیی".

پەنەوازا دەسەڵاتو ئاکەپە-مەهەپەی دەمودەس بەرەکا ئیمراڵی نکەرۆوە. پەنەوازا دیدارێ جنی بەڕێز عەبدوڵڵا ئۆجالانی ئەنجام دریۆ. پەی ئانەی ئاشتی جە وەرکەوتوو مېیامینی وەڵێ گنۆ و تورکیا دیموکراتیک بۆ، ئازادی بەڕێز عەبدوڵا ئۆجالانی فەرزا. ئەر تورکیا کوشتەی و قڕکەردەی و نکۆڵی سەرو گەلو کوردی سەپنۆنە، ئیتر کورد و گەلا وەرکەوتوو مېیامینی ئینەی قەبوڵ نمەکەرا. تا دمای دژو ئینەی مڏرامان مکەرمێ. ساڵەو ٢٠١٤ کە ئەبو لەیلا دروشمو "بژیوۆ مڏرامانو کۆبانێ" جە کۆبانێنە دژو داعشی بەرز کەردۆ، ئارۆ هەمان دروشم جە تشرین و کۆبانێ و وەرنیشتەنە هەن. ئی مڏرامانە جە گردو جەهانینە وەڵابییەنۆ. پەنەوازا دەسەڵاتو ئاکەپە-مەهەپەی دەمودەس ئی هرووژمێ پەی سەرو وەرنیشتی مڎردنا. بەتایبەت چنی گەلو وەرنیشتی و ڕێکوزیاکا وەرنیشتی بنیشارە. ئێمە گەرەکمانە چنی گردو گەلا بە ئاشتی و ئازادی بژیومێ".