ئۆسلۆ و ترۆندهەیمەنە پەی پەشتیوانی جە مڏرامانو وەرنیشتی چالاکی کریا
کوردەسانیاو دۆسەکێشا جە ئۆسلۆ وترۆندهەیم و نەرویجینە گلێرۆبیەی و پەشتیوانی مڏرامانو وەرنیشتوو کوردەسانیشا جە دژو هرووشمەکا ئەرەگیری دۆڵەتو تورکی نیشانەدا.
بە دیمەن
ئۆسلۆو پایتەختو نەرویجینە پەی شەرمەزارکەردەی هرووژمەکا دۆڵەتو تورکی و چەتەکاش پەی سەرو وەرنیشتی وێنیشاندای ئەنجامدریا.
وێنیشانداکەی وەردەمو وەزارەتو جبەرو نەرویجینە لواڕاوە. جگە جە کوردەسانیا ژمارێوە فرە جە نوێنەرا پارتە سیاسیەکا نەرویجی و نوێنەرا رێکوزییاکا کۆمەڵەی مەدەنی بەشدارێ بییێ
چالاکیەکەنە بێنتێ کانگێنهێڵم بە نوێنەرایەتی پارتو سەوزی قسێش کەردۍ و هرووژمە ئەرەگیرېیەکۍ سەرو وەرنیشتیش شەرمەزارۍ کەردۍ و داواش کەردە کە حکومەتو نەرویجی دمای بە بێدەنگی وێش وەراوەر پا هرووژما بارۆنە و واتیچش: "ئیتر تەنیا کەشەکێ دۆسێ کوردی نیەنێ، ئێمە گردما دۆسێ کوردینمێ"
هامکات نوێنەرا پارت و رێکوزیا نەوریچی و کوردەسانیەکاچ جە وتارەکاشانە چالاکیەکەنە سەرەڕاو شەرمەزارکەردەی هرووژمەکا و پەلامارەکا دۆڵەتو تورکی و چەتەکاش پەی سەرو وەرنیشتی، داواشا کەرد حکومەتو نەرویجی دمای بە ورەتەو چەکی بە تورکیای بارۆنە و وەرا وەر پا هرووژما و تاوانا وەراوەر بە وەرنیشتی مکەرۆشا، دەنگ هۆربڕۆ. هەرپاسە داواش جە گەلو کوردی کەرد، پەی پارێزناو وەرنیشتوو کوردەسانی وەراوەرو هرووژمە ئەرەگیریەکا گنا ئاماڎەکاری.
چالاکیەکەنە ئاڵاکۍ یەپەگەی و یەپەژەی بەرزۍ کریێوە و دروشمەکۍ "بژیوۆنە مڏرامانو وەرنیشتی"، "مەردەی پەی فاشیزمی"، "بژیوۆ یەپەگە" و "بژیوۆ یەپەژە"
ترۆندهەیم
شارو ترۆندهەیمیچ نەکوردێ و دۆسەکێ نەرویجی سەرو بانگەوازو کۆمەڵەو کلتوری کوردی پەی شەرمەزارکەردەی هرووژمەکا دۆڵەتو تورکی ئەرەگیری و چەتەکاش پەی سەرو وەرنیشتی مجیێرە مېڎان.
گلێرۆبییەکەی جە نۆردر گەیت سازکریا و سڵام جە مڏرامانو گەلا وەرنیشتی کریا.
سەربارو سەرداو و سڵەوەی سەڏان کەسێ بەشداریشا جە گلێرۆبییەکەینە کەرد و بە نامێ "پەشتیوانی جە کوردەسانیا" ئاسۆ ئامەدیان و مەهناز عەزیزیانە قسێشا کەردێ. جە گلێرۆبییەکەینە دروشمەکێ "بژیوۆنە مڏرامانو وەرنیشتی"، "گەشمەرڏۍ مەمرا" و "ژەنی، ژیوای، ئازادی" وچیێوە.
