ئەوەتەقایۊکەو ڕۊو چوارشەممەی، ١٣و بەفرانبار و شاروو کرمانی جە وەختوو لووای ڕاوەو مەراسیموو یاڎکەرڎەیۆ قاسم سلێمانینە ژمارېوە فرە کوشیۍ و زامڎارېش ۋنەکۊتۍ کە بە تێکڕا بی بە مایۍ نیگەرانی، پەژارە و خەمباری گەلاو ئێرانی. جە هەمان وەختەنە جەمۍ هەڕەشۍ و گوڕەشېش ۋنەکۊتۍ کە نیگەرانی و تەرسیش پۍ  گیسناینە و وەربڵاوبیەی جەنگېوە تازەی و یانە وێرانکەری جە مەنتیقەکەنە زیاتەر کەرڎ.

کردەوۍ مەترسیڎارتەرۍ بەرۆک و رژێمی گېرۊوە

هەڵبەت دماو ڕووېوە چەتەکۍ داعشی وەرپەرسی وێش چا تەقینەوە مەرگبارەیشا جەئەستۆ گێرت، بەڵام تا چن قەناعەت پنەکریان و متمانە بەخشا، جە ئایندەنە دیار بۆ. سەرەڕاو ئانەیچ تەقینەوېوە تەم و تواڵیا کە ئامانجە بنەڕەتیەکېش هەڵای پۍ رای گرڎی ناڕۊشنېنۍ. بەڵام ئانەی کە ڕۊشنا سیاسەتەکۍ رژێمینۍ جە دژوو گەلاو دلېینەو ئێرانی و گەلاو مەنتیقەکەی و لووت بەرزی و هاش و هووش کەردەی ۋەرپەرسا رژێمی ئا ئاکامشە شۊنەو ۋېشەرە ئارڎ. واتە رژێم ۋەروو ئانەی تا ئیسە حیچ لایێش جە ویس و داواو رەواو گەلاو ئێرانی نەکەردەنۆ، بە پێچەوانەیچۆ چەمپۊشیش جە درووشمەکاو ئاخېزوو "ژەنۍ، ژیۋای، ئازاڎیی" کەرڎ کە ئانە پۍ ۋېش زەنگێوە مەترسیڎارا. جە هەمان وەختەنە پەیوەندیە پەنهانیەکېش چنی ئەمریکای پېسە هەلێوە زێڕینی پۍ سەرکوتی و چەوەسنایۆ گەلا قۆستۆ و ترۊمبېلوو جە قەنارەدایش دژوو سەرمەشقەکا ئاخېزوو "ژەنۍ، ژیۋای، ئازاڎیی" و دژبەراو رژێمی وست گەڕوو کە چی قۆناخېنە فرەتەرین رێژەو جە قەنارەدای ئەنجام دریا. واتە ۋەرپەرسا رژێمی بە شێوېوە چەواشەکارانە مەراسیموو سەرکۊتەیشا سەروو ئاخېزوو "ژەنۍ، ژیۋای، ئازاڎیی"رە گێڵنا. بەڵام بە راسی رژێم پا جەنگە تایبەتەی کە ڕاوەش بەرڎ و بەرۊش، چ دەسکۊتێش بە دەس ئارڎوو؟ گریما کە رژێم سەرانسەروو گلېرگەکا ئێرانیش کۆنتڕۆڵ کەردەبۆ و مەترسیەکېش سەروو ۋېش لابەردۍ با و ئاخېزوو ژەنېچش مرکنابۊرە و گرڎوو دژبەرەکاو ۋېش بێ کاریگەر و لاوازۍ کەردۍ با! سەرەڕاو ئا بانگەشا، پۍ چی ئا ئەوتەقایۆ جە وەخت و ساتێوە پاسە گرنگەنە کە تەدبیری ئەمنی ئینا قولەپۊپەنە، پێکئاما؟

 زیهنیەتوو رژێمی پۍ ۋېش حیچ جیاوازیێوەش چا مژارەینە نییا، چون ئا کردەوۍ بەرهەموو زیاتەر جە ساڵېوە سەرکوتی و چەوەسنایۆ گەلا و تایبەت ژەنا کە رژێم ئەنجامش دېنۍ. پۊکەی رژێم پۍ ۋېش تەژنەو تنوتیژی، کوشتەی، جە قەنارەدای و تۆقنایش تا ئیسە وەڵا کەردەنۆ کە جە کرمان پا جۊرە بەرهەمەکەش بەرکۊت کە خودوو رژێمیش سەرسام و بەنج کەرڎ. ئەگەر رژێم جە حەقیقەتەنە دەرزۍ عالش جە ئاخېزوو "ژەنۍ، ژیۋای، ئازاڎیی"نە هۊرگێرتۍ و هەڵمەتەو فاڕیای بنەڕەتی پەی دیمۆکراتیزە کەردەی ئێرانی هۊرگێرتۍ، داخۆم ئا جەنگ و پشێویۍ کە هەناوو ڕژێمینە ملۆڕاوە، ئایا ئا ئەوەتەقایۆ کرمانی ڕووەدۍ، یان کردەوۍ چانەی مەترسیڎارتەر جە ئایندېوە نزیکەنە بەڕۆکوو رژێمی مەگېرۊوە کە خەڵکی بۍ گوناح زیاتەر با بە قوربانی؟!

ئەردۆغان تاتەو داعشیا

ئانەی سەرنج کېشا رژێم بە تۆمەتبارکەرڎەو لایەنێوە گەرەکشا، شۆڤینزم و دوژمنایەتی بەگوڕتەر کەرۆ و ئانەیچ وزۊنە خزمەتوو مەسڵەحەتوو تەسک و دەسەڵاڎداری ۋېش. واتە بە تۆمەتبارکەردەی لایەنېوە ڕاسیېوە پەردەپۆش کەرۆ. چون ئانەیچ ئینە وەختێنە کە داعش ئا تەقینەوە مەرگبارەشە جە ئەستۆ گرتەن. بەڵام یاگۍ پرسیارېنە کە چی ١٠ ساڵەو دماییەینە کام دەوڵەت پەشتیوان و مۆڵگەو چەتەکاو داعشی بیەن؟ ئا چەتۍ چکۊ مەشقشا پنە کریان و پڕچەک و چۆڵ کریېنۍ و کریا؟ گرووپەکۍ سەر بە داعشی جە سەرنیشت و ۋەرکەوتوو سوریای بە ئاڵاو کام وڵاتیوە دژوو گەلوو کوردی و گەلا مەنتیقەکەی جەنگ کەرا؟ خەلیفەو داعشی و ۋەرپەرسەکېشا جە کام وڵاتەنە داڵدە دریېنۍ و مڎریا؟ ئانەی کە کەس مەتاوۆ حەشاش چنە کەرۆ، داعشی راستەقینە، حکومەتوو ئاکەپە و مەهەپەینۍ. چون ئەردۆغان و باخچەلی تاتەو داعشینۍ. واتە بە بێ ئەمرەو ئەردۆغانی و هامپەیمانەکاش، داعش کردەوېوە تیرۆریسی ئەنجام مەڎۆ. تەنانەڎ هەڕەشۍ و گوڕەشەکۍ داعشی و بە ئامانج گرتەی بڕۍ وڵاتۍ تەری جە وەختوو جە ئەستۆ گرتەی تەقینەوەکەو کرمانینە، تەنیا جەتورکیا وەشیۊوە. ئانەی ڕۊشنا تا بە ئارۊیچ دەوڵەتوو فاشیستی تورکیای داڵدەو چەتەکاو داعشیش دان و پەشتیوانیشا ۋنەکەرۆ و پەی مەرامە چەپەڵەکاشا دژوو گەلاو هەرێمەکەی بە کارشا مارۆ. پۊکەی ئا تەقینەوە ئەرەبڕ نیا جە ئەردۆغانی و هامپەیمانەکاش. چون مشۊم داعش دووۍ تەقینەوۍ مەرگبارۍ ئەنجام بڎۊ و ئەردۆغان و جەماعەتەکەش چنەش بێ بەریۍ با و چا مژاریە بێ ئاگۍ با و بێ شەرمانە ۋېشا بە خەموەروو گەلاو ئێرانی وێنا کەرا. واتا دوور جە چەمەڕایی نییا کە ئا وڵاتۍ ئارۆ فشار وزا سەروو تورکیای، ئەردۆغان جە ڕاو هەڕەشۍ داعشیوە دەسەمۆشا کەرۆ. پۊکەی حکومەتوو ئاکەپەی پۍ ۋېش گەورەتەرین و مەترسیڎارتەرین هەڕەشېنە پۍ سەروو پېوەرە ژیۋای گەلا، ئارامی و ئاشتی مەنتیقەکەنە. چون داعش پۍ ۋېش دەمامکی راستەقینەو دەوڵەتوو فاشیستی تورکیایا، کە ئەردۆغان ئینا پەشتیشۆ.

رژێم پۍ قڕکەردەی گەلا مار باوشەو ۋېشەنە وەی کەرۆ

پۍ چی رژێموو ئەرەگیری ئێرانی چنی دەوڵەتێوە ئینا پەیوەندینە کە مۆڵگەو چەتەکا داعشیا. رژێم چا پەیوەندیانە چ قازانجێوە کەرۆ؟ ئیبراهیم رەئیسی قەرار پاسە بۍ کە ڕووېوە دماو تەقینەوەکەی سەردای تورکیای کەرۆ و دیڎار چنی ئەردۆغانی ئەنجام بڎۆ. بەڵام تەقینەوەکە ئا دیڎارەشە پۍ وەختێوە نادیاری دماوست. ئاخۆ ئا دماوستەیە سەروو تێکشیەو بڕێ حیساب و کتابا نییا؟ بێگومان جە ئایندێوە نزیکەنە ئاکاموو ئی مژارەیە ۋنەکۊتەی قورسش پۍ ئێرانی بۆ. ئەگەر پاسە نەبۆ پێویسا رژێموو ئێرانی گرڎوو پەیوەندیەکاش چنی تورکیای مردنۆ و رەئیسی بە حیچ جۊرېوە دیڎار چنی ئەردۆغانی ئەنجام نەڎۆ. گەلاو ئێرانی کەی چا مژاریە دڵنیۍ باوە کە رژێم پۍ ۋېش دەسش چنی تورکیای تێکەڵ نییا، پێویسا لووایۆ پۊرەی جیدی سەروو سیاسەتەکاشا جە ۋەران ۋەروو تورکیاینە کەراوە. چون کاربەدەساو رژێمی پا پەیوەندیاشا مار جە باوشەو ۋېشانە پۍ قڕکەردەی گەلاو ئێرانی وەی کەرا. ئەگەر ئێران ملکەچ و تورکیای بۆ و گنۆ دلۍ دامەو ئەردۆغانیوە، ئانە گنۊ دلۍ گەمېوە کە دۆڕنای بەشەش بۆ و پێویسا ڕۊ جە دماو ڕۊی گەلاو دلېینەو ئێرانی باجوو ئا پەیوەندیە ناتەندروستیا بڎا.

 ئایا دەوڵەتوو فاشیستوو تورکیای فرە بە پیلان و بەرنامە پۍ مجیایرەی نیا پەشتەو ئی کردەوە تیرۆریستیێوە؟ گریمان ئەگەر ئیسرائیلیچ چی کردەوېنە دەسش بۆ، بێگومان جە ڕاو ئەردۆغانیوە ئەمرە بە چەتەکا داعشی پۍ ئەنجامدای ئا تەقینەوەیە بەرکریان. چون داعش گرڎوو ئەمرەکا ۋېش جەئەردۆغانیوە هۊرگێرۆ. بەڵام ئەردۆغان پۍ ئانەی شک و گومانەکا سەروو ۋېشۊ لابەرۆ و پەنجەو تۆمەتەکاش پۍ نەکیشیۆ، چن ڕووۍ وەڵۍ تەقینەوەکەو کرمانینە، جە ڕاو یاونەریەکاشۆ گێرتەی ٣٠ کەسا جە چەتەکاو داعشیش ئەرەیاۋنا. داخوم وەڵا کەردەیۆ ئا هەواڵیە پۍ ۋېش بەشێوە جە پیلانەکۍ نییا و پۍ شارتەیۆ و چەواشەکاری پەیوەندی ئەردۆغانی و داعشی وەڵا نەکریاوە کە گوایا ئەردۆغان دژوو داعشی جەنگ کەرۆ؟!.

ئەردۆغان و رەئیسی پۍ کوشیایا تەقینەوەکەو کرمانی هەڵسی تیمساحیۍ مجا

ئەگەر پاسە بۆ پۍ چی رژێموو ئەرەگیری ئێرانی بە هامبەشی چنی دەوڵەتوو فاشیستی تورکیای پۍ کوشیایا ئا تەقینەوەیە هەڵسی تیمساحیۍ مجا. داخۆ کاربەدەسا رژێمی ئا حەقیقەتا مەزانا و مەویناشا؟ یان پۍ چی چەمپۊشی چا راسییە کەرا و نیشانۍ غەڵەتۍ پۍ دەنووکوو تووڕەیی گەلا منیارە؟ واتە ڕووېوە دماو ئا تەقینەوەیە ئەردۆغان و ئیبراهیم رەئیسی بە تەلەفۆن پېوەرە قسېشا کەردۍ و ئەردۆغان پېسە یووەمین دەوڵەتی خەمباری و دڵنیگەرانی ۋېش ئاراسەو رەئیسی کەرڎ. داخۆم کۆو قسەکا هەر دووە لایشا چېش بیەبۆ؟ سەروو چ مژارېوە ڕېکۍ کۊتۍ با و ۋەروو چ مەسڵەحەتێوە هامبەشیشا، گەرەکشانە راسییەکا ئاوەژ و کەراوە؟ ئەگەر کاربەدەساو رژێموو ئێرانی جە بەردەوامی پەیوەندیەکاشانە چنی دەوڵەتوو فاشیستی تورکیای پاگیری کەرا و جە ئایندەیچەنە رەئیسی سەردای تورکیای کەرۆ و چنی ئەردۆغانی دیڎار ئەنجام بڎۆ، مەترسیەکۍ پۍ سەروو گەلاو دلېینەو ئێرانی زیاتەرۍ با. چون ئەردۆغان و هامپەیمانەکېش، چەتەکاو داعشی پېسە چەکوشوو تەسلیمیەتی و بۆمبی چنیای جە دژوو ئێرانی بە کار مارۆ. تایبەت جە وەختێنە رژێموو ئێرانی دژوو مەسڵەحەتەکا تورکیای سەرەڕۆیی و دژایەتی کەرۆ، ئانە جە ڕاو هەڕەشۍ داعشیوە پەلکێشوو پیلانەکاو تورکیای کریۆ.

پۊکەی گەلاو ئێرانی پێویسا نیگەرانۍ با جە برەودای بە پەیوەندیەکاو ئێرانی و تورکیای و بە پەیوەندیېوە مەترسیڎار جەقەڵەمش بڎا. چون حەچ هێز و لایەنێوە چی قۆناخەنە چنی ئەردۆغانی جە پەیوەندینە بۆ، بە ماناو پەیوەندین چنی داعشی. تێکەڵ بیەی جە کردەوۍ تیرۆریستی و قڕکەردەو گەلانە. پۊکەی بە یاگۍ ئانەی کە ئارۆ گەلاو ئێرانی بە فیتوو رژێمی، ناچارۍ کریا کە درووشمۍ دژوو بڕۍ وڵاتا کە دوژمنۍ قەسەم واردەو رژێمینۍ، بڎا. بە پێچەوانۆ پێویسا دمابەدماو کردەوە تیرۆریستیەکەو کرمانی، درووشمۍ جە دژوو دەوڵەتوو فاشیستی تورکیای و ئا دەوڵەتا کە چنی تورکیای ئینۍ پەیوەندینە، بەرز کەراوە و کۊشیای دژوو ئا عەقڵیەتەیە بەقووەتتەر کەرا.

ئەردۆغان چەتەکاو داعشی پېسە بۆمبێوە تەوقیدکریای دژوو گەلا بە کار مارۆ

گەلوو کوردی عالتەرین تەجرووبەو جەنگیش جە وەران وەروو داعشینە هەن. تایبەت ئا مەنتیقۍ کە جە سەرنیشت و ۋەرنیشتوو سوریای جە تەرەفوو تورکیایۆ ئەرەگیرکریېنۍ، بیېنۍ بە مۆڵگەو چەتەکا داعشی و ئا مەنتیقېچە جە تەرەفوو تورکیایۆ رادەسوو چەتەکاو داعشی کریېنۍ. واتە ئارۆ ئەردۆغان، چەتەکاو داعشی پېسە بۆمبێوە تەوقیدکریای پۍ هەڕەشە و گوڕەشەو وڵاتا بە کار مارۆ و ۋېش بە خەلیفەو داعشی جە قەڵەم مڎۆ، پا جۊرە ئەردۆغان وەرپەرسوو راستەوخۆو ئا تەقینەوەینە. ئانەیچ عالتەرین بەڵگەو پەیوەندی داعشی و تورکیاین چنی یۊی کە گەلاو ئێرانی تایبەت ئاکادیمیۍ، سیاسەڎمەدارۍ، رۆشنویرا، هونەرمەنڎا، ژەنا و گەنجا ناچار پانەی کەرۆ کە لووایۆپۊرەیۍ بنەڕەتی سەروو درووشمەو بریقەدارۍ بە نامۍ دۆسایەتی و برایەتی دەوڵەتوو فاشیستی تورکیایرە کەرا و فریوو ئا ستایشی و چەواشەکاریا نەوەرا. چون هەر پەیوەندیېوە بەنوو ئا دووە وڵاتەیە جەروانگەو گەلیوە بە ماناو سەفەقەی ئابووری، سیاسی و ئەمنی پۍ  بەگوڕکەردەی کێشە و ناکۆکیەکا و کوشتەی خەڵکی بێ تاوانی پۍ مەنەیۊیشا جە دەسەڵاتەنە. پۊکەی پەنەوازش پانەی هەن کە گەلاو ئێرانی دژوو سیاسەتوو ملهوڕانە و فاشیستیانەو ئەردۆغانی و هامپەیمانەکاش مردا. چون بێدەنگی رەوایەت بە قڕکەردەی گەلا و پەیوەندی ناتەندروستانەو رژێمی بەخشۊ.

عالتەرین بژاردە پۍ ڕاگێرتەی جە بەردەوام بیەی ئا کردەوا ئانەنە کە رژێم لووایۆ پۊرە بە عەقڵیەتوو کۆنەپارێزانەو ۋېش بارۆ و جەبازنەو دەوڵەتوو فاشیستی تورکیای دوورەپەرێزی کەرۆ و جە زووتەرین وەختەنە هەنگامە پۍ چارەسەری پرسە کەڵەکەکریاکا دلېینەو ئێرانی هۊرگێرۆ. تایبەت پێویسا دڎان بە بیەی، ئیراڎە، باوەڕی و جیاوازیەکا دلېینەو ئێرانیرە بنیۆ و گەلایچ جە دژوو دەوڵەتوو فاشیستی تورکیای کە هامپەیمان و مۆڵگەو سەرەکی داعشیا و سەرچەمەو شېونای ئارامی، ئاشتی و پێوەرە ژیۋای گەلان، کۊشیایشا بەقووەتتەر و حێقمتەر کەرا.