ئارۊ پەنج-شەممە تازەتەرین هەوڵەکانە پەی بەعەربکەرڎەی شاروو کەرکوکوو پانیشتوو کورڎسانی، لاو ئیدارەی سەپنیاو شارەکەی و ڕاوبەروو پەروەرڎەو کەرکوکیوە، کە کەسوە بەنەتەوە عەرەب بەرۊش ڕاوە، قەرار دریا ئاڵاو هەرێموو پانیشتوو کورڎسانی قەدەغۍ کریۊ سەروو مەکتەب و تەماموو دامودەزگاکاو وانای و ورکەرڎەیی ئاڵاو عێراقی سەروو یاگەکاو وانای کوردیینە سەپییا، پی قەراریچە پڕۊسەو بەعەرەبکەرڎەی  کەرکوکنە پاش نیا  قۊناغێوە تازەوە، کە دلێشنە وانای کوردییچ شارەکەنە کریۊ بە عەرەبی.

ئارۊ پەنج-شەممە بەپاو نویسیاێوە کە ڕاوبەروو پەروەرڎەو کەرکوکین بەرش کەرڎە دەریکردووە ئاماژە پانەیە کەرۊ، کە ورکەرڎەی گرد نۊعە ئاڵاێوە مەکتەبەکاو (کوردی، عەرەبی، سریانی و تورکمان) قەدەغێنە جگە جە ئاڵاو عێراقی، یاگۍ ئاماژەینە  ئی قەرارە ڕاوبەروو پەروەرڎەو کەرکوکی بە پشتیبەستەین  بە یاساو ژمارە ٢٢ سەرڎەموو ڕژێموو بەعسی، کە ساڵەو ١٩٨٦ بەرشیێنە.

دەقوو نویسیاکەو منصور مذري سلوم ڕاوبەروو پەروەرڎەو کەرکوکینە ئامان، "بەپشتیبەستەی بە یاساو ئاڵای عێراقی ژمارەی ٢٢ ساڵەو ١٩٨٦، ورکەرڎەیی حەرئاڵێوە جگە جە ئاڵاو عێراقی سەروو دامودەزگاکاو سەر بە ڕاوبەرایەتییەکاماوە جە وانای (عەرەبی، کوردی، تورکمانی و سریانی) بەتەمامەتی قەدەغەن و ڕاش پەنە مەدریۊ،بۊنەو نەبییەی حیچ یاسێوە پەی ڕادای بە ورکەرڎەی حیچ ئاڵێوە تەری جگە هینەو عێراقی سەروو دامودەزگاکاو دەوڵەتیوە پارێزگاو کەرکوکینە، و  پەی پارێزنای شکۊمەندیی دەوڵەتی و قەوەتییش دەزگا پەروەردییەکۍ ئی قەرارەیە میاونا یاگۍ و پێچەوانەو  ڕانماییەکەی توشوو ڕاکاری یاسایی بۊوە".

یاگۍ باسینە دماو  ڕووەدایەکاو ١٦ ئۊکتۊبەروو ساڵەو ٢٠١٧ وەختیوە، کە سوپاو عێراقی شاروو کەرکوکیش بە زەبروو هێزوو ئەرەگیرکەرڎەی پێسە کاردایۊیۍ سەروو ڕیفراندۊمەکەو پەدەکەی، کە بە فیتوو تورکیای کەردش، چا وەختۊ پارێزگارێوەش بەوەکالەتوو عەرەبی شۊڤێنی سەپنیا سەروو شاروو کەرکوکیرە، کە تا ئارۊ بەرڎەواما جە ئیدارەدای شارەکەینە، حیزبە کورڎسانییەکاو کەرکووکی بەرڎەوام (ڕاکان جبوری)پارێزگاری سەپییاو کەرکوکی تۊمەتبار کەرا، پانەی کە بەرڎەواما جە پرۊسەو بەعەرەبکەرڎەی شارەکەی و ئەنجامدای جیاکاری جە پێشکەشکەرڎەیی خزمەتگوزاری و ئەرەمەرزنای گەڕەکە کوردییەکانە بەراورد بە مەنتێقە عەرەبنشینەکان.

جێگای باسینە وەڵۍ ڕوودایه‌كاو ١٦ ئۊكتۊبه‌روو ساڵەو ٢٠١٧ینە، كورد نزیكه‌و ٨٠٪ پۊسته‌ ئیدارى و ئه‌منییه‌كاو سنووروو پارێزگاو كه‌ركوكىش جەدەس دێبێنۍ، وەلۍ ڕووەدایە‌كاو ١٦ ئۊكتۊبه‌ری پاسەشا کەرد کورد ٥٠٪ پۊسته‌كان جەدەس بدۊ، کە کەرۊ ١١٠ پۊستۍ ئیداریۍ چا شارەنە، ئیدارەی وێسەپنوو شارەکەیچ جە ڕاو ئا دەسەڵاتاوە کە دەسش ملەرە گێرتێنۍ ماوەو زیاتەر جە ٦ ساڵاو وەڵێنە ڕۊ دماو ڕۊی هەوڵەکاش هەسۍ کەردێنیوە  پەی بەعەرەبکەرڎەی شارەکەی، کە بەینوو ئا هەوڵانە ئەرەگیرکەرڎەی زەمینی شارەکەنە بە هامکاریی سوپاو عێراقی و ئارڎەی عەرەبی ئامای پەی سەروو دەگا کوردنشینەکاو دەوروبەروو کەرکوکی و کە دماین هەوڵەکاش بەعەرەبکەرڎەینۍ، کە چند ڕۊی ویەرڎەنە جە ڕاو سوپاو عێراقیوە هەوڵۍ مدریا، گەڕەکەو نەورۊزی کوردنشینە چۊڵە کریۊ بە بەهانۍ ئانەیوە، کە ئا زەمینۍ سەرڎەموو بەعسینە موڵکەو سوپۍ بیێنە.

یاگۍ واتەینە، ئینە یوەم هەوڵۍ پەروەرڎەو کەرکوکی نیەنۍ پەی بەعەرەبکەرڎەیی شارەکەی دماو ڕووەدایەکاو ١٦ ئۊکتۊبەریوە، پەی نموونەی جە ئەرەمورزنای ساڵەو ٢٠١٩ مامۊستایاو کەرکوکینە، کە دلێشنە مەرزنای  دوو هەزارۍ و ٨٠٠ مامۊسا و فەرمانبەرانە جە پەروەرڎەو کەرکووکینە ئەرەیاونیا، کە چا ئەرەمەرزناینە بەشوو عەرەبی زیاتەر ٦٠٪ و کورد ٢٥٪ و تورکمان ١٥٪ بۍ، کە تەنیا پەی قەزاو حەویجەی ٨٠٠ ئەرەمەرزنایۍ نریێنێرە، کە زیاتەر جە ناوەندوو کەرکووکی وەر کەوتەن، ئینەیچ بۊنەو ئانەیوە پارێزگاری سەپنییاو کەرکووکی و ڕاوبەروو ئا وەختوو پەروەرڎەو کەرکوکی، کە هەردویشا عەرەبۍ ئامەنتێقەینۍ و ڕاو ئەرەمەرزناکەیوە نەوۍ تازەو مامۊسایاو عەرەبا سەروو شارەکەیرە سەپنا، ئینەیچ جە وەخێوەنە کە کورد کەرکوکنە فرەتەرینا شاروو کەرکوکی بەرڎەوام جە ورچنییەیەکانە کورد ٦٤٪ دەنگەکاش بەدەس ئاردێنۍ.