ئەندامو ئەنجوومەنو لۆزانو سویسرای و هامسەرۆکو لۆزانو پارتو سەوزی، ئیلاس پانچارد سەبارەت بە دۆخو سووریای و وەرنیشتی پەی ئاژانسو هەواڵو فوراتی ( ANF) قسێش کەردێ.

پانچارد سەرنجش وست سەرو سیستەمو هامسەرۆکایەتی جە وەرنیشتوو کوردەسانینە و واتش: "هەر شارەوانییێ جە لایەنو ژەنێ و پیێوە بە شێوێوە دەسەکۆ و هامبەش ملۆڕاوە. چنی ئا دۆخە گرژییە کە هەن ئیرادێوە جا جۆرە ئینا ئارانە کە ڕا بە ڕاوەبەری دەسەکۆی مڏۆنە.

جە بابەتو دیموکراسینە هەمان چێو وینریۆنە، چنی هرووژمەکا، سەرەڕاو هرووژمی و قورسی و نەبییەو وەڵکەوتەو ئابووری جە بڕێ هەرێمێنە، ڕێکوزتێوە دیموکراتیک هەن کە جە گلێرگەنە دەسش پنەکەردەن. جە بابەتو ئیکۆلۆژی نزیکایەتییێ شکۆمەندانە جە ئاسو ئیکۆلۆژینە نیشانەدریۆ. پڕۆژێوە دیموکراتیک، پشتیوانی و وەڵکەوتەی مێ ئاراوە.

پانچارد ئاماژەش پانەیە کەرد کە مرۆڤەکێ جە وەرنیشتەنە دلێ هەلومەرجێوە فرە قورسی ئەمنی و سەروازینە ئی سیستەمەشا ئەرەمەرزنا، پۆکەی شایەنو ڕێزبوەنە گێرتەینێ و ئاماژەش پانەیەدا کە ئی مۆدێلە پەی ئایبدەو سووریای تاوۆنە بۆ بە نموونە.

جە بەردەوامیینە واتش: "مشۆم زانمێنە جە سووریانە ئەرەمەرزیارەو دۆڵەت- نەتەوەی ئیتر کاتش سەرشییەن. جە عێراقیشەنە ئاڕاسەو دۆخەکەی هەمان ئاڕاسەش هۆرگێرت. عەقڵیەتو دۆڵەت-نەتەوەو وەڵینی کە جە ئەنجامو عەقڵیتو دەسەڵاتوازی ئیمریالیستی ئەرەمەرزیارە ئیتر بییەیش نییا. مشۆم ئانەی جە یاڏ نەکەرمێ کە سنوور و بڕێ وڵاتێ جە لایەنو ئینگلیز و فەڕەنسییەکاوە بە هەمان ویروڕاو ئیمپرالیستییۆ دیاری کریێ.

بە بڕواو من پارادایمو کۆنفیدراڵیزمو دیموکراتیکی، سیستەمو کانتۆنی یان فیدراڵین پەی ئاییندەین. ڕۆشنا کە ئا سیستەمەی جە وەرنیشتەنە هەن متاویۆند جابەجێ کریۆنە. هەر پۆکەی بانگەواز جە وەزیرا چبەرو سویسرای و ئەندامو کۆنسەو فیدراڵی ئیگنازیۆ کاسیس مکەرو پەنەوازا وەرنیشتی پارێزنۆنە و پشتیوانی ئی مۆدێلەیە بۆ.

دیموکراسی پڕۆژێوە درێژخایەنا و بە بڕواو من پەنەوازا سویسرا پشتیوانی و هامکاری قۆناغو ڕاگوزەری سووریای کەرۆنە".

دەربارەو ئانەی پەنەوازا جە ئاستی مییاننەتەوەیینە چ هەنگامێوە نریۆنە پەی پارێزناو وەرنیشتی پانچارد واتش: "جە ئاسو سیاسیینە بڕێ چێوێ هەنێ پەنەوازێنێ ئەنجام دریانە. بە بڕواو من فشاری ئەساسی کە سویسرا و یۆبییەی ئەوروپای ئەنجامش دانە مدرناو ورەتەو چەکین بە تورکیای. سویسرا ڕاستەوخۆ چەک مەورەشۆنە بەڵکوم ئا کەرەسێ کە پێسەو پەنەوازی جەنگی بەکارش مارۆنە ورەشۆش بە تورکیای".

جە کۆتایینە پانچارد سەرنجش وست سەرو جابەجێکەردەو و پەشتگیرییە ئابووریییەکا و جەختش کەردۆ چانەی مشۆم سویسرا هەنگامە بنیۆ جە وەراوەرو ئۆلیگارش و بازرگانێ تورکیای چی پەیوەندی بە باڵوێز و کونسوڵخانەکاوە مەکەرا، ئەر ڕەمزیچ بۆنە هەنگامێ سەرەتایی بنیەیدی و واتش: "پێسە چنین جە دژو هرووژمەکا ڕووسیای دژ بە ئۆکرانییا هەلوێس گیریانە وەر، مشۆم بە هەمان شێوە قەرار و هەڵوێس هۆرگێردێ. ڕەنگە پەنەوازی بە پشتیوانی ڕاشکاوانە و تەنانەت قەدەغەکاریش بۆنە. هەرپاسە مشۆم داوا جە گلێرگەو سویسرای کەرمێنە پشتگیری جە گلێرگەو کوردی کەرانە و چا ڕوانگۆ هەنگامە بنیا.