ماوەو ٢٥ ساڵان گۆشەگیریێوە سەخت سەروو ڕابەروو گەلوو کوردی عەبدوڵا ئۆجالانی ئیمراڵینە ملۊڕاوە. بە تەمامی مافوو دیڎاری و چەمپنەکۊتەی بە پارێزنەری و بنەیانەکەیش پاشێل کریۆ. سی پی تی کە تەنیا ڕاو لوواینە پەی ئیمراڵی، بە هەڵوێسەکاش بیەن بە مەڵامەتوو قوڵتەربیەیۆ گۆشەگیری ئیمراڵی.

دژوو ئی گرڎ نا یاساییا هەڵمەتەو 'ئازاڎیی پەی ئۆجالانی، چارەسەری پەی پرسوو کورد'ی سەروو ئاستی میان نەتەوەی جە ١٠و تشرینی یووەمیۆ دەسشپنەکەرد و پڕاوە پەی قۆناغوو دووەموو ۋێش. گرڎوو بەشەکا گلېرگەینە و سەروو ئاستوو ئەرەمەرزیای و کەسایەتی سیاسی میان نەتەوەیی ناڕازی بیەیۍ فرە ۋەراۋەر بە گۆشەگیری ئیمراڵی ئینا ئارانە، داوا کریۆ ئازاڎیی جەستەی ڕابەروو گەلوو کوردی عەبدوڵا ئۆجالانی مسۆگەر کریۆنە.

یاگەگیروو سەرۆکایەتی گرڎینوو پارێزنەرا بێسنووری، یۆ جە پارێزنەرا نوسینگەو پاریسی پارێزنەر ئەتیەننە لەساگ پەیوەس بە ئازەو یاسایی گۆشەگیری ئیمراڵی پەی ئاژانسوو هەواڵوو فوراتی (ANF)ی قسێش کەردۍ.

'پێویسا تورکیا ۋەروو تاوانەو گۆشەگیری دادگای بکریۆ'

پارێزنەر ئەتیەننە لەساگ ئاماژەش پانەی کەرد کە گۆشەگیری سەروو عەبدوڵا ئۆجالانی کارێوە نامرۆڤانەن و واتش: "گۆشەگیری دژوو مافەکاو مرۆڤوو ئەوروپاین. تورکیا هەم ئیمزاش سەروو ئی پەیماننامەیۆ هەن ، هەم ئەنداموو ئەنجوومەنوو ئەوروپاین. پۊکەی ئی کارۍ تورکیای بە ماناو پاشێلکەردەی پەیمانەکۍ مۍ. گرڎوو ئا دەوڵەتا کە گۆشەگیری جە ۋەرا ۋەروو زینڎانیکریایانە سەپنانە، پێویسا ۋەروو تاوانەو ئەشکەنجەی و دڕندایەتی دادگایی بکریا چونکی گۆشەگیری جۆرێوەن جە ئەشکەنجەی."

'پێویسا دادگای میان نەتەوەی هەڵوێس نیشانە بڎۆ'

پارێزنەر ئەتیەننە لەساگ باسش چانەی کەرد کە دەوڵەتوو تورکی بە سەپنای ئا کارا سەروو عەبدوڵا ئۆجالانی و جە هەمان وەختەنە یاساو میان نەتەوەیی پاشێل مکەرۆ و واتش: "پێویسا دادگای میان نەتەوەیی ڕوبەڕوو فشاری دیپلۆماتیکی بۊوە، ئی پاشێلکارییا باس بکەرۆ و ویروو ۋێش بارۊوە. گێرتەو عەبدوڵا ئۆجالانی و گۆشەگیرکەردەیش مامەڵێوەن کە حورمەتوو مرۆڤایەتی پاشێل مکەرۆ. دیموو یاسای میان نەتەوەیچەرە پېسەنە ئەشکەنجەی. پێویسا بێنە ۋەروو باسی.

هەڵوێسوو سی پی تی ۋەرا ۋەر بە گۆشەگیری ئیمراڵی نا ڕۊشنا و لێڵا. بەمەڵامەتوو پەیوەندی دیپلۆماتیکیوە بێدەنگی ئەوروپای جە ۋەراۋەروو ئیمراڵینە ئینسانی وزۆ ۋەروو گومانی و قەلەقی. پۊکەی پێویسا گرڎوو پارێزنەرا ئەوروپای ڕێز ۋەراۋەر بە یاسای نیشانە بڎا و بە ئەرکوو ۋێشا هۊربېزا. ئازاڎیی عەبدوڵا ئۆجالانی فرە گرنگا، پۊکەی مەبۆ ئینسانێوە پەی ماوەو ٢٥ ساڵا چېروو بارۍ سەختینە زینڎانەنە زینڎانی بکریۆ. جۆرە زینڎانیکەردەیێوەن بە ماناو مەردەی ماوەدرێژی مۍ، مامەڵێوەن کە حورمەتوو ئینسانی پاشێل مکەرۆ و دژوو یاسای میان نەتەوەییا."

'زینڎانیکەردەی ماوەدرێژ جۆرێن جە مەردەی'

پارێزنەر ئەتیەننە لەساگ ئانەش دەسنیشان کەرد پێویسا مافوو هیوای پەی گرڎ زینڎانیۍ بۆ و پی جۊرە بەردەوام بۍ: "جە پەیمان و پراکتیکی ئەوروپاینە، زینڎانیکەردەی ماوە درێژ بێ مانا نیا، زینڎانیکەردەی ماوەدرێژ پېسەنە سزاو مەردەی و پاشلێکەردەی حورمەتوو ئینسانی تەماشە مکریۆ. ئینە شێوازێوە مەردەی ماوەدرێژا کە مافوو هیوای مەڎۆ بە کەسی زینڎانیکریای. ڕوانگېوە تەروو زینڎانیکەردەکەی کە دڎان بە مافوو هیوایرە مەنیۆ، دژوو پەیمانە میان نەتەوەییەکان."