دەزگای هەواڵگێری نیشتیمانی (میت) بە بۆنەو ٢٣ێ نیسانیوە داوا وەنەو زارۆڵا مکەرۆ بە کەلیمەکاش "ئاسایش" و "هەواڵگێری" و "سیخوڕیی نهێنی" ڕسمێ بکێشا یان نامە بنویسا. جە ئەرەیاوناو پەلیانەو میتینە داوا وەنەو زارۆڵە ٥-١٤ ساڵا کریان هێزو خەیاڵیشا بەکاربارا. داوا وەنەو زارۆڵا کریان بە کەلیمێ "ئاسایش" و هەواڵگێری" و "سیخوڕیی نهێنی" پێناسەو بوارو هەرمانەو میتی بکەرا، چی ڕووە ڕسم بکێشا یان نامە بنویسا. داوا وەنەو بنەیانەو زارۆڵەکا کریان، ڕسم و زارۆڵەکاشا ڕاو پۆستەی ئەلیکترۆنییوە بکیانا.

سەندیکاو کرێکاراو زانستی و پەروەردەیی (ئەیتەم سەن) سەر بە کۆنفیدراسیۆنو سەندیکاو کرێکاراو جەماوەری (کەسک) ناڕەزایەتییش وەراوەرو ئی هەرمانێ نیشانە دا و ماچۆ ئی هەرمانێ بەرو ئەرکی و وەرپەرسیی دەزگاکاو هامشێوەو میتین.

ئەیتەم سەن واتش نمەبۆ زارۆڵێ پەی ئی بابەتا بەکار بەیا، مپەرسۆ ئاخۆ پەرسی بە وەزارەتو پەروەردەی کرییێنە و ماچۆ: "ئەگەر پەرسی بە وەزارەتەکەی نەکریێنە، ئانە کێشەن. ئەگەر پەرسی بە وەزارەتەکەیش کەردێنە، وەزارەت ڕاش نەدان پەنە، ئانە کێشێوی گەورەتەرا".

هەرپاسە ئەیتەم سەن تیشکەش وست سەرو پرۆژەو "خاوەنداریی جە بەهاکام مکەرو، وەراوەرو دەوروبەریم هەستیارنا"، کە جە چوارچوەو پرۆتۆکۆڵێونە بە ئیمزاو سەرۆکایەتیی هەرمانوکاری ئایینی ئیمزا کریان،  دلێنە و بەرو مەکتەبەکانە چالاکی سەرو زارۆڵارە مسەپنۆ.

ئەیتەم سەن جەخت مکەرۆوە، ئی جۆرە هەرمانێ کاریگەریێوی نەرێیی مکەرانێ سەرو زیهنو زاڕۆی و ماچۆ: "نمەبۆ دەزگاکا پێسەو دیانەتی و میتی بەرو بوارو وێشاوە هەرمانە بکەرا و کاریگەری سەرو زاڕواوە بنیارە. ئی ڕەوشە دژو مافو زاڕوان و سایکۆلۆژیاو زاڕوا جە ڕووەو پێداگۆگییوە ناڕاسا. پێویسا ئی هەرمانێ دەمودەس بمردنیا".