تا مۍ سەروو ئاستی نەتەوەیی و میان نەتەوەی هەڵوێسوو ناڕازیبیەی جە ۋەرا ۋەروو هۊرکوای سەروو ستۆدیۆکاو مەدیا خەبەری و ستێرک تیڤی زیاتەرۍ با، کە جە تەرەفوو پۆلیسی فیدراڵی بەلجیکایۆ و سەروو داواو پۆلیسوو فەرەنسای ئی هجوومە ئەنجامدریا. چا بارۆ یاردیدەدرو سەرۆکوو گرڎیی پارێزنەرا بێسنووری و پارێزنەروو نوسینگەو پاریسی ئیتیان لێساج پەی ئاژانسوو هەواڵوو فورات (ANF)ی قسێش کەردۍ.

'ئۆپراسیۆنێوە سیاسیا'

ئیتیان لێساج باسش چانەی کەرد هجوومەکۍ سەروو مەدیا خەبەری و ستێرک تیڤی ئینۍ چوارچێوەو هەوڵدایۍ سیاسینە و واتش: "دلېینە و وردەکاری دۆسیەکەی مەزانوو، پارێزنەروو دۆسیەکەی نیەنا بەڵام متاوو واچوو ئینە جاری یووەم نیا بەلجیکانە دژوو دەزگایی میدیایی کوردی هجووم  کریۆ. جە هەمان شێوەو ئی هجوومەینە، جە ساڵەو ٢٠١٠یچەنە هجووم کریا سەروو میدیایی کوردی بەلجیکانە. سەرەڕاو گرڎوو ڕەهەندەکا ئی هجوومەیە، متاوو واچوو ئینە هجووم و هەوڵدایۍ سیاسیا."

ئیتیان لێساج ئانەیچش دەسنیشانکەرد هجوومەکە سەروو داواو پۆلیسوو فەرەنسای ئەنجامدریان و واتش: "جە بەینوو دەوڵەتوو فەرەنسای و بەلجیکاینە ڕێکۊتەی دووەلایەنە هەن. پێویسا میدیایی کوردی جە ۋەرا ۋەروو ئی هجوومانە هەنگامەی پێویسە بنیۆ."

'ئانەی پۆلیسی کەردش، کارێوە نایاساییا'

پارێزنەر ئیتیان لێساج سەرەنجش وست سەروو هەوڵدای پۆلیسوو بەلجیکای و پی جۊرە بەردەوام بۍ: " کاروو پۆلیسەکا جە وەختوو وشکناینە نایاساییا و حەرپاسە یاگۍ سەرسورمەنەیچا. پۊکەی شەرمەزارکەردەی ئی گېڵاو پۆلیسوو بەلجیکایە فرە گرنگا. پەی دماییئاردەی پی ۋنەپەرسایۆ پۆلیسی، پێویسا سەردای دەزگاکاو بەلجیکای بکریۆ."

'ئی هجوومە زەرەرداین جە دیموکراسی و یاسای'

ئیتیان لێساج باسش جە نیگەرانی ۋێش جە ۋەرا ۋەروو ئی هجوومانە بەربڕی و واتش: "فرە ناڕەحەتەنا جە ئەنجامدای ئی هجووما پەی سەروو دەزگایی میدیایی، کە گرڎ کەسێ بە شێوێوە ئازاڎ ۋێش بەربڕۆ. هۊرکوای سەر و هجووم دژوو چاپەمەنی و تەلەفیزیۆنی فرە بەکەمی و بەین بەین ڕووە مڎا. پۊکاتی ئی هجوومە یاگۍ سەرەسوڕمەنەین و زەرەر یاۋناین بە دیموکراسی و یاسای."

'فەرەنسا جیای ئانەی مافوو مرۆڤی پارێزنۆ، هامپەیمانی سەروازی هۊرچنۆ'

ئیتیان لێساج باسش چانەی کەرد نزیکایەتی و مامەڵەو ئی دماییەو فەرەنسای دژوو کوردی گوماناوییا و نیگەرانیش چنە گنۊوە و واتش: " هەڵوێسوو فەرەنسای و وڵاتا ئەوروپی دژوو کوردا یاگۍ نیگەرانییا. دەوڵەتوو فەرەنسای جیای ئانەی پارێزنەروو مافوو مرۆڤی بۆ، بژاردەو پەیوەندی دیبلۆماسی هۊرچنۆ. ڕۊشنا ئی بژاردەیە جە چوارچێوەو ناتۆینە جابەجێمکەرۆ کە خاوەنوو هامپەیمانێتیێوە ۋەرفراوانی سەروازییا."