گەریلۍ یەژاستاری ئەزدا ئاندۆکە بۆنەو ساڵیاڎو گەشمەرڎەبیەو بێریتانۍ (گوڵناز کاراتاش)ۍ و ساڵیاڎو ئەرەمەرزناو سوپاو ژەنۍ ئازادو یەژاستاری قسێش پەی کەردیمۍ.

ئەزدا ئاندۆکە پی جۆرە دووا:

"ئارۆ ٣٢ەمین ساڵیاڎو گەشمەرڎەبیەو هەڤاڵ بێریتانۍ (گوڵناز کاراتاش)ێن. جە هەمانکاتەنە ئی مانگۍ پېسە مانگەو گەشمەرڎا ژەنۍ پێناسە مکریۆ. چی مانگێنە چڼین فەرماندۍ گۆرێما پېسە مریەم، هێلین چەرکەس، جاندا تورک و ئارین میرکانۍ گەشمەرڎۍ بیێنۍ. سەرەتا ۋەردەمو یادەوەری ئی هەڤاڵانە بە رێزۆ سەرەو ۋێم منامنورە و یاڎێشا مارووە. بەمەڵامەتوو گەشمەرڎەبیەو هەڤاڵ بێریتانۍ رابەر ئاپۆ بە سوپابیەو ژەناش ئەرەیاۋنا. ئارۆیچەنە ئێمە پېسە جەنگاوەرا رێکوستەی پایۍ وزمێنە ٣٢ ەمین ساڵیاڎو بە سوپابیەو ژەناوە. ئێمە ئی ڕووەیە، ساڵیاڎو ئەرەمەرزناو بە سوپابیەو ژەنۍ جە گرڎو ژەنا، هەڤاڵە بەشدارەکاما جە ئەرەکۊشای و هەمڕایا ژەنۍ پیرۆز مکەرمۍ.

پېسە مزانیۆ فەرماندۍ گۆرێما هەمڕا بێریتانە، پەی گرڎو هەڤاڵا ژەنۍ بیە بە هێڵۆو ئازادی. جە ۋەرا ۋەرو ۋێدایدەسۆی و خیانەتینە تا دما نەفەس ۋێڕاگریش کەرڎ و گەشمەرڎۍ بیە. حەجگیز خیانەت و ۋێدایدەسۆیش قبوڵ نەکەرد. ئێمەیچ ئارۆنە پېسە جەنگاوەرا و شەڕڤانا ئی رێکوستەیە سەرو ڕاو هەمڕا بێریتانۍ هەنگامە منیەیمۍ و گەرەکمانە دلۍ ئی هێڵێنە درێژە بە ئەرەکۊشایما بڎەیمۍ. هەمڕا بێریتانە بیە بە نمونە و ڕەمزەو ژەنۍ ئازادۍ کە جە ۋەرا ۋەرو خیانەتینە چۆکش نەڎارە. بیە بە ڕەمزەو گیانبازی. ئێمەیچ ئارۆ جە سەنگەرەکامانە سەرو ئا هێڵۍ ئەرەکۆشمۍ و گژیەیمۍ. ئێمە گرڎ کاتۍ سەرو ئا هێڵۍ هەنگامە منیەیمۍ و درێژە بە ئەرەکۊشایما مڎەیمۍ.

هەمڕا بێریتانە بیە بە شکۆو گرڎو ژەنا. بیە بە نمونێوە کە ئێمە گرڎما سەربەرزێنمۍ پاڎێوە و فەخرش پۊوە مکەرمۍ. ئێمەیچ سەرو هەمان رێبازی تا دما نەفەس هەنگامە منیەیمۍ".