جە مانگەو ئایارینە دژوو ئەرەگیری مدرامانوو جیلۆی گولانەی گۊرەتەر بۆ. گەریلاکۍ چنڎین چالاکیۍ کاریگەرێشا دژوو سوپاو ئەرەگیری تورکی کەردۍ، مەڕەکا جەنگینە جە جیلۆی گولانەنە بێنۍ بە جۆش و خرۆشێوە فرۆ ۋێشا پۍ چالاکییە تازەکا ئاماڎە کەرێنۍ. ڕۊو ٢ ئایاروو٢٠٢٢١، دماو ئانەی دوژمن حۊڵشدا بە چەکی کیمیاوی هجووم بکەرۆ سەروو گەریلاکا، گەریلا چالاکیێوە کاریگەرشا دژوو سوپاو تورکی ئەنجامدا. یۊ چا گەریلایا بەشداروو چالاکییەکەی بۍ و بە ڕۆحێوە فیداییانۆ دژوو ئەرەگیرا جەنگش کەرد، گەریلا زاگرۆس ئاڤاشین (فەردی مەرگەل) بۍ.

کوردسانەنە وڵاتپارێزنی جە خێزانۆ دەس پنەکەرۆ. پەیوەندی ئەڎا و تاتەی و خاک و هامسای، عەشرەت و هەڤاڵیەتی، دەگا و هامووڵاتی چێروو هەمان چەترێنە یاگۍ گێرا. ۋەروو ئی مەڵامەتینە بنەیانە کوردەکۍ دادپەروەری و پاکی، وەفاڎاریی و ئازاڎیی فێروو زاوڵەکاشا مکەرا.

زاگرۆس ئاڤاشین ساڵەو ١٩٩٦ دەگاو ڤارتنیسی سەر بە شاروو مووشینە جە بنەیانێوە وڵاتپارێزنی جە ئەڎۍ بیەن، بە سیفەتوو وەفاڎاریە بە قیمەتەکەو کوردا گەورە بیەن، جە تەمەنی گەنجیشەنە کۊشیای ئازاڎیی کوردسانیش ئشناسان. زاگرۆس کە دڕندەیی و چەوەسنایۆ دەوڵەتوو تورکیش سەروو گەلوو کوردی قبوڵ نەکەرد، چنڎین جارۍ گیریاو، عەزیەت کریا ، پۊکەی جە دوژمنی توڕە بۍ. گەشمەرڎە بیەو دووۍ مامۊزایاش دلۍ ڕیزەکاو گەریلاینە کاریگەری فرەشا سەر نیارە، قەرارش دا وەرمەکا زاوڵەیی ۋێش بەدیبارۆ و سەروو ئا بنەمایە ساڵەو ٢٠١٥ جە ئەیالەتوو خەرزانیوە پەیوەندی بە ڕیزەکاو گەریلایۆ مکەرۆ. پێسە ئانەی ئاینڎەو ۋێش بوینۆ، نامۍ زاگرۆس ئاڤاشین-یش هۊرچنیە.

دماو تەجرووبێوە کەمی ملۆ پەی هەرێمەکاو پارێزنای مەدیای. چا پەروەردەی سەرەتایی موینۆ، چنی جەمۍ جە گەریلایا ملۆ شەنگال. زاگرۆس ئاڤاشین، بە قارەمانیۆ وەرەنگاروو هجومی وەحشیانەو چەتەکاو داعشی بیۆ شەنگالەنە و بەشداریش جە چنڎین چالاکیۍ کاریگەرینە کەردەن و دژوو چەتەکاو داعشی جەنگش کەردەن. گەریلا زاگرۆس بە هامبەشی چنی هەڤاڵەکاش چەتەکۍ داعشیشا خاکی پیرۆزەنە ماڕۍ، جە تەرەفوو گەلی ئێزدیوە وەشەسیابۍ. دماو جابەجێکەردەی ئەرکە شۆڕشگێڵنیەکاش بە شێوێوە دروس، جارێوەتەر چنی یەکێوە گەریلای ملۆ پەی کەشەکا هەرێموو زاپی.

تا دما گوللۍ جەنگش کەرد

هەڤاڵ زاگرۆس دەورێوە گرنگش جە جەنگوو زاپینە و بە تایبەتی جە کەشی سیاوەنە گێڵنا. پەی ئانەی ڕا جە ئەرەگیری گێرۆ، بە ڕۆحێوە فیداییۆ سەروو دوژمنیرە لووان. حەرپاسە جە زاپەنە مدرامانێوە گەورەشا نیشانە دا و گورزەی قورسەشا ۋنەو دوژمنی دا، دماتەر ڕووەشا کەردە مەڕەکاو جەنگی جە هەرێموو جیلۆی گولانەینە. هەڤاڵ زاگرۆس ئاڤاشین جە ماوێوە کەمەنە بەشداریش جە چالاکییەکاو دلۍ مەڕەکا جەنگینە کەردەن، تەجرووبێوە گەورەو مدرامانیش دژوو سوپاو تورکی بەرد ڕاوە.

گەشمەرڎە زاگرۆس و ڕووناهیە بیۍ بە قەڵغانوو دلۍ مەڕەکا

وەختۍ سوپاو تورکی جە ٢٨و ئایاروو ٢٠٢١ینە جە جەنگوو مەڕەکا جیلۆی گولانەینە گەرەکش بۍ چەکی کیمیاۋیی بەکاربارۆ، گەریلا زاگرۆس ئاڤاشین چنی هەڤاڵ ڕووناهی خەلیلی دەسشا بە چالاکی کەرد و گورزەی قورسەشا ۋنەو دوژمنی شانا، گەشمەرڎە زاگرۆس ئاڤاشین تا دما گوللۍ دژوو دەوڵەتوو ئەرەگیری تورکی جەنگشا کەرد، چنی هەڤاڵەکێش ڕووناهیە خەلیلی لووۍ دلۍ قافڵەو گەشمەرڎاوە. گەشمەرڎە زاگرۆس و ڕووناهیە پۍ ئانەی دوژمن نەلۆ دلۍ مەڕەکا جەنگی بیۍ بە قەڵغانی زینڎە. ئارۆ بەهەزاران هەڤاڵێشا پۍ ئانەی بانۍ بە لایەقوو هەڤاڵا گەشمەرڎەی قارەمانیشا، جە گرڎ بوارەکانە مدرامانێوە گەورە جە دژوو دوژمنی ئەرەگیری بەرا ڕاوە.