قامیشلۊ

ئارۊ جە زانکۊو وەرنیشتینە  شاروو قامیشلۊی- سەرنیشت و وەرکەوتوو سووریاینە، پەی پەشتیوانیی تەلەبەکاو وەرکەوتوو کورڎسانی و ئێرانی، کە ڕووبەڕوو پەلامارە و ژەعراویکەرڎەی بیێنێوە، هاموەخت پەی ئرمانای هەڵوێسوو وێشا سەروو ئا هەرمانە دڕندانۍ، بە ئامادەبییەی دەیان تەلەباو زانکۊی، کۊمەڵەو تەلەباو زانکۊو وەرنیشتی بەیاننامێوەشا واناوە.

"دەوروو تەلەبە کناچا وەڵێوەبییەینە یەکلاکەرەوە بییەن"

نویسیایەکە جە لاو  "سەلوە عەبود"ێوە قسەکەرەو کۊمەڵەو تەلەباو زانکۊو وەرنیشتیوە ونیاوە و واتش: "سەرەوردای "ژەنی، ژیوای، ئازادی" کە بە کوشتەی "ژینا ئەمینی"یۍ جە وەرکەوتوو کورڎسانی و ئێراننە دەسش پەنە کرد و شش مانگێش پەڕ کەرڎۊ، دەور و نەخشوو تەلەبا دلێشنە فرە گرنگ بۍ، سەروو ئاستوو وەڵێوەبییەی، بەتایبەتی دەوروو تەلەبە کناچا، ئا گجییە سیاو و تەنگە، کە لەو ڕژێمی ستەمکاروو ئێرانیوە بە سەرکوت و زۊرداری ورازیابۍ، بە بە وەڵێوەبییەی ژەنە گەنجا جە لاو گلێرگەیۊ یوە یوەی دڕیۍ، ئینەیچە تەرسی وزۊ دلۍ دڵوو ڕژێمی چەوسنەرەوەو ئێرانیوە، کە گەرەکشا ڕژێمەکەی هەمیشەیی کەرۊ، پەوکای ئا پلانا منیۊرە و پەلامارۍ دڕندانۍ مڎۊ. 

"زیاد جە ٧ هەزار تەلەبا  ژەعراویۍ بیێنێ"

"سەلوە عەبود"ە  جە ئەرەیاوناکەینە ئاماژەش پانەیە دا، کە زیادتەر جە ٧هەزار تەلەبا ژەعراویۍ بیێنۍ، کە چوارشا مەردێنۍ و واتش: ماوەو ٤٤ ساڵان ڕژێموو ئێرانی دەسش بە گێرتەی و کوشتەی و خنیکنای کەرڎەن ئا شێوازە، کە ئاد وەرگێرییش پەنە جە ڕژێمەکەیش کەرۊ، چی دمایۊ زیادش کەرڎەن، پەی ژەعراویبییەی تەلەبە کناچا، بێگومان ئینە ئامانجێوە ئاسایی و ڕێککەوت نییا، جە ژەعراویکەرڎەی شارەکاو وەرکەوتوو کورڎسانینە پێسە "سنەی و مەهابادی و ئیلامی و کرماشانی و سەقزی و مەریوانی و بۊکانی" و جە شارەکاو ئێرانینە "تاران و قوم و ئەسفەهان و کەرەج و شیراز"نە ١٧٠ مەکتەبۍ پەلامارەو ژەعراویکەرڎەیشا دریێنە، تا ئیساتۍ زیادتەر جە ٧ هەزار تەلەبا ژەعراویۍ کریێنۍ و بە لایەنی کەمۊ ٤ تەلەبۍ مەردێنۍ، تەلەبۍ زانکۊیشا چەنەنۍ وەلێم فرێشا تەلەبۍ ناوەندی و ئامادەیینۍ.

"ڕژێموو ئێرانی مەتاوۊ ڕا جە سیاواو فاڕیای و ئازادی گێرۊ"

"سەلوە عەبود"ە واتیچش، کە ڕژێموو فاشیستوو ئێرانی نەتاواش ڕا جە سیاواو فاڕیای و ئازادی گێرۊ و واتیچش: ئی پەلامارۍ دژوو ئا تەلەبانە، کە دیواروو تەرسێشا ماڕان و فاڕیایۍ دیموکراتیکیشا گەرەکا، وەلێم ئی پەلامار و ستەمۍ ڕژێمی ڕاگێرۍ مەبا جە سیاواو فاڕیای و ئازادی، ئی سیاواو ئازادییە ڕێخەش جە جمیەرە شۊڕشگێڵنەکاو گەنجاو ٦٨وە،  ور گێرتەن و ئیساتۍ جە گرڎوو کەشوکۊ و  دەشت و شارەکاو کورڎسانینە گێڵۊ، گەرەکمانە ویرۍ گرڎکەسیش وزمێوە، کە چی گەنجە شۊڕشگێڵنا، جمیەرێوە پێسە جمیەروو ڕزگاریوازوو کورڎی بەر کەوتەن، ئیسە سەرمەشقایەتیی گرڎوو گرووپ و گەلە چەوسیاوەکاو وەرکەوتوو دلێڕاسەی کەرۊ، ڕابەروو ئا جمیەری "ڕابەر ئاپۊ"ن، کە فەلسەفەو ئازادیی گلێرگەیش بە "ژەنی، ژیوای، ئازادی" متەنەرە، ئیسەنە ئی فەلسەفە بییەن بە دروشمی سەرەکیی ئی سەرەوردایە، ناوەندوو ٦٨وو گەنجە شۊڕشگێڵنا، جە ئەورووپانە بۍ، وەلێم چەنی شۊڕشوو وەرنیشتی و وەرکەوتی، ئیساتۍ ناوەندوو گەنجە شۊڕشگێڵنەکاو وەرکەوتوو دلێڕاسەی و عەلەمەو سەرمەشقبییەی ئینا دەسوو گەنجاو وەرکەوتی و ئێرانینە، ئی شەپۊلۍ ئازادیی ژەنا و گەلا، کە ئێمە بە "ژەنی، ژیوای، ئازادی" مجمێشرە، جە سەرنیشتنە درەوشیاوە و جە وەرنیشتنە و ئیساتۍ وەرکەوتنە یاوا لووتەکۍ.

شمە بەتەنیۍ نییەیندێ

"سەلوە عەبود"ە جە بەیاننامەکەنە دووەپاتش کەرڎۊ، کە تەلەبەکاو وەرکەوتوو کورڎسانی و ئێرانی تەنیۍ نییەنۍ و پەشتیوانیشا چەنە کەرمۍ و پێسە دماییش بە ئەرەیاوناکەی ئارد: پەوکای ماچمۍ، گەنجا و ژەناو وەرکەوتوو کورڎسان و ئێرانی تەنیۍ نییەنۍ، ئێمە پێسە تەلەباو زانکۊو وەرنیشتی بە گرڎ نۊعۍ ئینایمۍ پەشتیشاوە، داوا جە گرڎوو گەنجە شۊڕشگێڵنا و تەلەباو دنێۍ کەرمۍ، دڵوو شۊڕشوو ئازادی ئیسەنە، ئینا جە وەرکەوتنە و ئێراننە با پێوە چەنی گەنجا و تەلەباو وەرکەوتوو کورڎسانی و ئێرانی تۊڕەو پەشتیوانی وەشە کەرمۍ، ڕژێمە دیکتاتۊرۍ و هەژموونگەرێکۍ جە ڕاو پەشتیوانیی شۊڕشگێڵناوە چەوسییاوە".

بەیاننامەکە بە دروشموو "ژەنی، ژیوای، ئازادی" دماییش ئاما.

س.ز