دەستگاو بەخشو زایەڵە کتێبی بەردەوامەن جە خزمەتکەردەی بە کتێبخانە و ڕۆشنویری هەورامانی و کوردستانی و جە بەردەوامی پڕۆژەکانو چاپ و وەڵاکەردەی کتێبەکانشەنە، کتێبو (خەرمانە گەورە)و نویسەر ”سوبحان ئەمینی“ش چاپ و وەڵاوکەردەوە.
خەرمانە گەورە، ئا بەرهەمە تایبەت و بەیاگەنە هەکە دماو ساڵانێوە زەحمەت و شۆنیەرەلوای، بە قەڵەموو نویسەر و پەیجۆرکاری ڕۆح سووک؛ بەڕێز سوبحان ئەمینی، ئامادە کریان و چی ڕوانە ئێنتشاراتوو زایەڵەی چاپ و پەخش کەردەن.
بەڕێز سوبحان ئەمینی جە دەسپێکوو ئی کتیبیەنە ماچۆ:
"ئی بەرویرە کۆما و خەرمانێوە جە مەسەلا، قسە نەسەقا، مۆچیاریە نەختا و هەرپاسە کەنایا و تەجرەبان. پەوچی سەرجەم گردی پێسە مەسەلێ نامدریا مەکەروو تا وەردەنگ و وانەری وردسەرنج، لۆمەما نەکەرۆ. بەپاو ئا پەیجۆریا کەردێنێم و ئا سەرچەما وشکنێنێم تا ئیسە بە پتەوی کەس نەتاوانش بەینوو ئینیشانە بارووم و جیاوێزیە پتەو وزۆ وەروو دەسی و هەیت هەیت و بەش بەش جیاشا کەرۆوە، بەڵام سەرجەم تاومێ گردوو ئینیشا دلێ فایلێوەنە بە نامێ "واتەو وەڵینا" دەسەبەندی کەرمێ و وزمێشا وەروو دەسی."  
ئی کتیبە نزیکەو ٥٨٠ لاپەلان و بە شێوەی ڕێک و پێک ئامادە و چاپ کریان. 
سانای و وانایۆ هەر بەرهەمێوە، هەنگامێوە مەحکەمە و کۆمەکێوە گەورەن بە پارێزنای و گەشەدای بە فەرهەنگی.