ڕێکوزیاو ژەنە ئازاڎاو کوردستانی (ڕەژاک) بە بۊنەو یوەم ساڵیاڎوو کۊکوشیی دووەموو پاریسینە ئەرەیاوناێوەشا وەڵا کەرڎۊ.

ئەرەیاونایەکە ئینەن:

"کۊکوشیی ٢٣ کانوونوو یوەموو ٢٠٢٢ پاریسنە لاو سیستموو پیا-دەوڵەتیوە کریا. جە کەسایەتیی شۊڕشگێڵن و سەرمەشقەو ژەنا ئەڤین گۊیێنە هجووم کریا سەروو سەر کۊشیای و بەهاکاو ئەدا ژەنەو پەنج هەزار ساڵەی، جە کەسایەتیی هونەرمەندوو کوردی میر پەروەرینە هجووم کریا سەروو کولتوور و شناسنامەو کوردی و جە کەسایەتیی وەڵاتپارێزن عەبدولرەحمان کزڵینە هجوومێوە بۍ پەی سەروو ئا هۊگری و پێوەسبییەیە گەلوو کوردی بە پاڕادایموو گلێرگەی دیموکراتیک، ئیکۊلۊژیک و ئازاڎیوازوو ژەنۍ.

پێسە درێژکریاوەو پیلانگێڵنیی میاننەتەوەیی دژوو ڕابەر ئاپۊی سەروو ئا کۊکوشیەیوە مردمۍ، هەرپاسە درێژەو ئا کۊکوشیەیە، کە ٩ کانوونوو دووەموو ٢٠١٣ دژوو شۊڕشگێڵنیی ٤٠ ساڵەی و خەباتوو هامڕا سارۍ و هەردووە هامڕایاش کریا و بەرڎەوامیی ئا کۊکوشییە زەنگوو تەرسۍ بۍ، کە تا چە ئاستێوە ئەقڵیەتوو سەرمایەداری و نەتەوە- دەوڵەتی  دژوو کۊشیای ژەنە ئازاڎا قووڵ و بۍ پشوودرێژیین.

کەرڎەی ئامانجوو ژەنا، شۊڕشگێڵنا و سەرمەشقا، جە ئەنجاموو هەڵوێستی قارەمانانەیشا بۍ. وەروو ئانەیە ئا تایبەتمەندیۍ کەسایەتی وێشانە بونیاڎشا نیێبێنۍ دژوو ئا سیستمەیە بێنۍ، دژوو ئا ئەقڵیەتەیە بۍ، کە گرد ڕوۍ ژەنی پەی بەرژەوەندیی دەسەڵاتداریی وێشا کەرا قوربانی. ئا هجوومە، هجوومێوە پلانپەیمجیایرەی ڕەگەزپەرسی و سەرمایەداری بۍ. هجوومێوە  دژوو شۊڕشوو ژەنی، ژیوای، ئازاڎی. پەوکای داوا وەنەو گردوو ژەنا کەرمۍ، کە بە یەک گیان و یەک دەنگ شەپۊلەو کۊشیای قەوەتتەرە کەرا. ئێمەیچ پێسە ڕێکوزیاو ژەنە ئازاڎاو کوردستانی ئا کۊکوشییە بەتندی شەرمەزار  کەرمۍ و وەعدوو بەرڎەوامی و گوڕدای بە کۊشیای ئازاڎیی ژەنا مدەیمۍ. پێسە ژەنا ئێمە بە کۊشیای، ڕێکوستەی، ئیرادە و یۊبییەی وێما سیستموو پیا-دەوڵەتی وڕنمۍ و کۊشیای ئازاڎی میاونمۍ سەرکەوتەی. بە کۊشیای ژەنا تۊموو ئازاڎی تەماموو جیهانی و ئینسانیەتینە گەشە کەرۊ".