جە دژو هرووژمەکا دۆڵەتو ترکی ئەرەگیری و چەتەکاش پەی سەرو ۋەرنیشتوو کوردەسانی، رێکوستەی ژەنا پانیشتوو کوردەسانی جە جبەرو وڵاتی، داواو چڕکەردەیۆ هەوڵەکا پەی ڕاگێرتەی جە قڕکەردەی جە ۋەرنیشتەنە مکەرا.
ژەنا پانیشتوو کوردەسانی جە جبەرو وڵاتی جە بارەو ئاژەو ۋەرنیشتوو کوردەسانیۆ و هرووژمو دۆڵەتو توركی و چەتەكاشۆ پەی سەرو ناوچەكەی ئەرەیاۋنێوەش وەڵا کەرڎۆ.
جە ئەرەیاۋناکەینە ئامان، وڕای ڕژێمو دیکتاتۆری بەعسی بەشار ئەسەدی و ئا فاڕیایۍ کە جە گلێرگەو سووریاینە ئامێنۍ وەڵۍ، چڼە مایۆ دڵ وەشی بۆ کە بەشار دەسەڵاتش دمایش ئامان، بارتەقەو ئانەی مشۆم هەستیاریی و ۋەرپرسیاری جە ئایندەو سازکەردەیۆ پەیكەرو حکومڕانی و لوای ڕاوەو ڕێکوستەیۆ یەکەکا ژیۋای نەتەوەی و پێکئامایەکا و رێساو یاساکا ژیۋای هامبەشی و بەهرەداربیەی جە ماف و ئازادییەکا گرڎ سەلەمیا.
ئانەیچ وزیان ڕووە، چنی ساتەکاو وڕای سیستەمی سەروازی و دەسەڵاتو بەشار ئەسەدی، چەتە مرۆڤ کوژو تیرۆریستەکۍ دۆڵەتو تورکی پەلامارەو ۋێڕاوەبەری و هێزەکا قەسەدەیشا دا، بیۍ بە مایۍ تەرسێوە گۆرۍ سەرو ژیۋای هەزاران کەسا جە گەلو ئێمەی مەدەنی و ئاوارەکاو کەمپەکا شەهبای و ئا هەرێمەیە.
جە ئەرەیاۋناکەینە ئانەیچ ئامان کە، پېسە گرڎ لێوە ئاگاڎارێنۍ تا ئارۆیچ ئا هرووژم و پەلاماردایۍ پەی سەرو ۋێڕاوەبەری دیموکراتی سەرنیشتی و ۋەرنیشتو سووریای و قەسەدەی بەردەوامێنۍ.
گەلەكەما مزانۆ جە ٢٠١٢ پیلاوە ۋەرنیشتوو کوردەسانی بە ۋنەو کناچا و کوراما تاوییا خۆسەریێوە دیموکراتی جە ۋەرنیشتوو کوردەسانیەنە پێکبۍ پارێزنای ئا دەسکەوتە دیموکراتیکیە ئەرکو هەریۆ جە ئێمەی ژەنا پانیشتوو کوردەسانین جە جبەرو وڵاتی.
ئەرەیاۋنانیچشا، ئێمە پېسە چنی پەی کۆبانی سەرو پەیاوە بێنمۍ و بەڕۆحو مڎرامانوو کوبانۍ جاڎەکا ئەوروپای و ئەمریکای و کەنەدای و گرڎو جەهانیما ئاگاڎار کەردۆ، ئیساتێچ بە هەمان ڕۆح و هەستو مڎرامانوو کوبانێوە مشۆم سەرو پەیاوە بیمۍ.
باسشا چانەیچ کەرڎەن، ئی مۆدێلە دیمۆکراتییە کە ئامان بەرهەم و مافو گرڎ کەسێش چنە پارێزیان، بە شۆڕش و ڕۆحو ژەنۍ ئازادۍ ۋێش تۆمار کەردەن و دەسکەوتەکۍ ئازادیی ژەنۍ پېسە هەڤی و ژیۋگەپارێزنی و بنیاڎ نیای نەتەوەی دیموکراتی مشۆم پېسە هەناسەو ۋێما تەماشەش بکەرمۍ و پارێزنمێش.
ئاماژە پانەیچ کریان، ئیساتۍ دۆڵەتو ئەرەگیرو تورکې و چەتەكێش چەمێشا پی وەڵێکۊتەیە هۆرنمەیا و گەرەکشانە جارێوەتەر و بەرەنگێوە تەر ئا دەسکەوتە گۆرەیە دلێنە بەرا و ئامانج چنەش قرکەردەی و دلێنەبەردەو گەلو کوردی و وەڵێکۊتەیەکاشا، هەرپاسە چڼە جە کناچا و ژەنا کوردی بڕفانیێنۍ جە لایەنو ئا هێزە تیرۆرستیاوە و گەلو ئا هەرێما دەورو شارو کوبانی تەوقە دریێنۍ، ئیساتێچ چارەنوویس و خەڵکو ئا هەرێمەیۆ دیار نییا چێش مەبۆ و تا حەفتێوە ئایێر بەس ئەرەیاوییان.
واتەنیچشا، ئانەی ئاشکران پەی گرڎ کەسۍ پلانەو دۆڵەتو تورکی و چەتەکاشا کە گەرەکشانە هرووژم و جەنگێوە یانە وێرانکەر و نامرۆڤانە خوڵقنا ؛پۊکەی ئیمە پېسە ژەنا پانیشتوو کوردەسانی جە جبەرو وڵاتی داوا جە رای گرڎینی مکەرمۍ کە بەزووتەرین کات فشارێوە گەورە بکەرا تا ئی جەنگو قڕکاریە چەمەڕاکریایە مردنا و ئا جەنگە تیرۆرستیەو دۆڵەتو تورکی مردنا سەرو گەلو ئێمە.
ئانەیچ ئامان، بەشداریی ئێمەی گەلو ئازادیوازو کوردی و ژەنا بەتایبەتی متاومۍ هەم پەشتیوانی قەوەتو مڎرامانوو ۋەرنیشتی و کوبانی بیمۍ هەم دەورو ئێمە جە فشار کەردەی پەی ئازادکەردەی دیلەکا و هەرپاسە کۆکەردەیۆ هامکاری ماددی و مەعنەوی پەی گەلوو کوردی جە ۋەرنیشتی.
جە بەشێوە تەرو ئەرەیاۋناکەینە ئانە وزیان ڕووە، هەوڵەکۍ پا ئاراستەنۍ کە دڎاننیای پۊرەی ڕسمی بە ۋێڕاوەبەری دیموکراتی سەرنیشتوو ۋەرنیشتوو سووریایرە جە لایەنو نەتەوە یۆگێرتەکاوە.
جە دمادماینە ماچمۍ، داوا جە گرڎو گەلوو پانیشتوو کوردەسانی مکەرمۍ بەتایبەت ژەنا دەنگتا بوزدۍ پاڵ و دەنگو ئیمە دژو ئا جەنگو ئەرەگیریا مرداوە. داواکارێنمۍ بەزوتەرین کات بەرەو سێمێلكای بکریۆوە تا هامکارییە مادییەکۍ بیاوا بە واڵە و براکاما جە ۋەرنیشتوو کوردەسانی.
