سلێمان ئەحمەڎ ڕۆنامەنوویس و هەواڵسازوو بەشوو عەرەبی ئاژانسوو رۆژ نیوزی، جە ١و تشرینوو یوۋەمیۆ، پۍ سەردای خێزانەکەیش و بەشداریکەرڎەی جە تەعزیەو تاتەیشەنە لووابۍ پۍ ۋەرنیشتوو کوردسانی، دماو گېڵایۊیش پۍ پانیشتوو کوردسانی، جە دەروازەی ڕسمی فیشخاپووریۆ، جە تەرەفوو هێزەکاو پەدەکەیوە گیریا و بێسەروشۊنکریان.

 دماو شش ڕووا جە بڕفانای ئا رۆنامەنوویسەیە شەوەو ٣٠ی تشرینوو یوۋەمی ئاسایشوو پەدەکەی جە دهۆک پۍ هۊرخەڵەتنای ڕای گرڎی و ڕاوەشکەرڎەی پۍ ئانەی هامشێوەو چالاکا و رۆنامەوانا بادینانی سزاش سەرەرە بسەپنۆ، ئەرەیاۋناش، گېرتەو سلێمان ئەحمەڎیی پەیوەندیش بە هەرمانەو رۆنامەوانییوە نییا.

دماتەر ئاژانسوو رۆژنیوزی جە ئەرەیاۋنېوەنە وەڵاش کەرڎۆ،"ئی مامەڵەو پەدەکەی ۋەران ۋەروو ڕۊنامەنویسا ئیڎانەکەرمۍ و داواکارېنمۍ دەموودەس هەواڵسازەکەما ئازاڎ بکریۆ و جە ئیسەیچەنە سڵامەتی گیانوو ئا رۆنامەنووسەیچە ئینا ئەستۆو پەدەکەینە".

ڕۊو ٢٢ مانگەی ۋیەرڎۍ نەریمان ئەحمەڎ، یۆ جە ئەنداما تیموو پارێزنەرا سلێمان ئەحمەڎیی ئەرەیاۋنابېش: چا وەختۊن سلێمان ئەحمەڎشا بڕفانان ئێمە حۊڵمڎەیمۍ ۋینمېش و دۆسییەکەیش وانمېوە، سەردای ئاسایشوو گرڎیما کەرڎ جە دهۆک ، سەرەتا بە بەهانۍ ئانەی، کە نیا چا ڕاشا ۋنەگېرتیمۍ، حەرچنە دڵنیېبێنمۍ، کە ئینا چا و زانیارییما بۍ ئینا دلۍ چ یاگېنە ئاسایشوو دهۆکینە، دماتەر واتشا ئینا چېروو ئەوەکۊڵیاینە مەتاودۍ ویندېش.

باسش چانەیچ کەرڎ، جە ڕاو سەرچەمېوە ۋېماوە زانیارییما پنەیاوا، کە کەیسەکەش ئینا چېروو دەسوو دەزگاو پارېزناینە، پېسە تیمێوەیچ جە حۊڵەکاما بەردەوامۍ بیمۍ و گرڎوو حۊڵوو ۋېما وزمۍ گەڕ.

بڕفانای و بێسەروشۊنکەرڎەی ئا رۆنامەنوویسەیە سەروو ئاستوو کوردسانی و عێراقی و جەهانی کاروەدای و ناڕەزایەتی رێکوزیاکا و رۆنامەنوویسا و ئازاڎیی هەرمانەو رۆنامەنوویسیش ۋنەکۊتۆ و بێسەروشۊنکەرڎەی ئا رۆنامەوانەیشا شەرمەسار کەرڎ و داوایچشا کەرڎ دەموو دەس سلێمان ئەحمەڎ ئازاڎ بکریۆ.

جە چن ساڵی ۋیەردەنە پەدەکە فشارەکېش پۍ سەروو ڕۊنامەنوویسا ئازاڎی و چالاکا و رەخنەگرا چڕتەر کەردەنۆ و بە تیرۆرکەردەی، گېرتەی و بڕەمنای حۊڵوو کپ کەردەیشا مڎۆ، ئینەیچ جە تەرەفوو نوێنەرایەتی دیپلۆماسی وڵاتاوە جە عێراق و هەرێم و رێکوزیا میان نەتەوەییەکاو داکۆکیکار جە ئازاڎیی ڕابەربڕیەی و ئازاڎیی هەرمانەو رۆنامەوانی رووبەڕوو رەخنەی و کاروەدای تنی بیەنۆ.