مانگێرتەی زینڎانییە سیاسییا، کە جە ٢٧ تشرینوو دووەمیوە پەی ئازاڎیی جەستەیی ڕابەروو گەلوو کوردی عەبدوڵا ئۊجالانی دەسش پەنە کەرد، بەرڎەواما. زینڎانییۍ سیاسیۍ جە زینڎانوو ژمارە دووۍ کرکلاری شاروو بوجاینە جە ڕاو پارێزنەرەکاشاوە پەیامێوەشا وەڵا کەرڎۊ.

داواو وەرفراونکەرڎەی چالاکییەکا وەنەو گەلی کریا

پەیاموو زینڎانییە سیاسییەکا پێسنەن:

"ئێمە پێسە ٣٢ زینڎانییە سیاسییا زینڎانوو کرکلاروو ژمارە ٢ۍ شاروو بوجاو ئەوەڵ پێسە زینڎانییاو ئازاڎی، جە دڵۊ سڵام جە گردوو وەڵاتپارێزنا، ئاشتیوازا، دیموکراتەکا و پارێزنەرا و وەرگێریکاراو مافوو ئینسانی کەرمۍ، بەجۊشوخرۊشێوە فرەوە بەشداریما جە هەڵمەتەو 'ئازاڎیی پەی بەڕێز ئۊجالانی، چارەسەروو پرسەو کوردی' کەرڎەن. ئێمە بە ئیرادێوە بەرزۊ بەرڎەوامێنمۍ جە مانگێرتەی جە وارڎەی، دۊس و دوژمن مزانا بەڕێز ئۊجالان پەی ئێمە ئینا لای سەریی گرد چێوێوە. تورکیانە و وەرکەوتوو دلێڕاسەینە، ئانە ئاشتی، ئازاڎی و دیموکراسی گەرنتییش کەرۊ بەڕێز ئۊجالانا، گرد لایۍ فرە خاس مزانا، کە بەڕێز ئۊجالان وەرڎەنگوو چارەسەروو پەرسەو کوردین.

پەی ئازاڎیی بەڕێز ئۊجالانی، ئامادێنمۍ حەر جۊرە چالاکیێوە کەرمۍ، پەی بەیاگەیاونای گرد نۊعە وەرپەرسبییەێوە ئامادێنمۍ. چی قۊناغەنە حەفتانە دووۍ هامڕێما بە شێوەی نۊرەیی بەشداریی مانگێرتەکەی کەرا. ئێمە بە دەسەڵاتداراو دەوڵەتی و هامپەیمانەکاشا جیهانەنە ماچمێ؛ تا بەڕێز ئۊجالان ئازاڎ نەکریۊ، حەر جۊرە چالاکیێوە پەی ئێمە ڕەوان. ئامادۍ گیانفیدایینمۍ. ئێمە مزانمۍ بنەیانە و گەلەکەما ئینۍ چەنیما و بە دڵ و گیان پەشتگیریی چالاکییەکاما کەرا.  پەوکای واوەی داوا وەنەو گەلەکەیما کەرمۍ، کە پەنەوازا پەشتگیرییەکاشا پەی وەرفراوان کەرا، بە چالاکییە جۊراوجۊرەکاشا ئازاڎیی بەڕێز ئۊجالانی و کورڎسانی نزیکتەر کەراوە."